5. පාරාජිකාදිආපත්ති

339. ‘පාරාජික’න්ති යං වුත්තං, තං සුණොහි යථාතථං;

චුතො පරද්ධො භට්ඨො ච, සද්ධම්මා හි නිරඞ්කතො;

සංවාසොපි තහිං නත්ථි, තෙනෙතං ඉති වුච්චති.

‘සඞ්ඝාදිසෙසො’ති යං වුත්තං, තං සුණොහි යථාතථං;

සඞ්ඝොව දෙති පරිවාසං, මූලාය පටිකස්සති;

මානත්තං දෙති අබ්භෙති, තෙනෙතං ඉති වුච්චති.

‘අනියතො’ති යං වුත්තං, තං සුණොහි යථාතථං;

අනියතො න නියතො, අනෙකංසිකතං පදං;

තිණ්ණමඤ්ඤතරං ඨානං, ‘අනියතො’ති පවුච්චති.

‘ථුල්ලච්චය’න්ති යං වුත්තං, තං සුණොහි යථාතථං;

එකස්ස මූලෙ යො දෙසෙති, යො ච තං පටිගණ්හති;

අච්චයො තෙන සමො නත්ථි, තෙනෙතං ඉති වුච්චති.

‘නිස්සග්ගිය’න්ති යං වුත්තං, තං සුණොහි යථාතථං;

සඞ්ඝමජ්ඣෙ ගණමජ්ඣෙ, එකස්සෙව ච එකතො;

නිස්සජ්ජිත්වාන දෙසෙති, තෙනෙතං ඉති වුච්චති.

‘පාචිත්තිය’න්ති යං වුත්තං, තං සුණොහි යථාතථං;

පාතෙති කුසලං ධම්මං, අරියමග්ගං අපරජ්ඣති;

චිත්තසංමොහනට්ඨානං, තෙනෙතං ඉති වුච්චති.

‘පාටිදෙසනීය’න්ති යං වුත්තං, තං සුණොහි යථාතථං;

භික්ඛු අඤ්ඤාතකො සන්තො, කිච්ඡා ලද්ධාය භොජනං;

සාමං ගහෙත්වා භුඤ්ජෙය්‍ය, ‘ගාරය්හ’න්ති පවුච්චති.

නිමන්තනාසු භුඤ්ජන්තා ඡන්දාය, වොසාසති තත්ථ භික්ඛුනිං;

අනිවාරෙත්වා තහිං භුඤ්ජෙ, ගාරය්හන්ති පවුච්චති.

සද්ධාචිත්තං කුලං ගන්ත්වා, අප්පභොගං අනාළියං [අනාළ්හියං (සී. ස්‍යා.)];

අගිලානො තහිං භුඤ්ජෙ, ගාරය්හන්ති පවුච්චති.

යො චෙ අරඤ්ඤෙ විහරන්තො, සාසඞ්කෙ සභයානකෙ;

අවිදිතං තහිං භුඤ්ජෙ, ගාරය්හන්ති පවුච්චති.

භික්ඛුනී අඤ්ඤාතිකා සන්තා, යං පරෙසං මමායිතං;

සප්පි තෙලං මධුං ඵාණිතං, මච්ඡමංසං අථො ඛීරං;

දධිං සයං විඤ්ඤාපෙය්‍ය භික්ඛුනී, ගාරය්හපත්තා සුගතස්ස සාසනෙ.

‘දුක්කට’න්ති යං වුත්තං, තං සුණොහි යථාතථං;

අපරද්ධං විරද්ධඤ්ච, ඛලිතං යඤ්ච දුක්කටං.

යං මනුස්සො කරෙ පාපං, ආවි වා යදි වා රහො;

‘දුක්කට’න්ති පවෙදෙන්ති, තෙනෙතං ඉති වුච්චති.

‘දුබ්භාසිත’න්ති යං වුත්තං, තං සුණොහි යථාතථං;

දුබ්භාසිතං දුරාභට්ඨං, සංකිලිට්ඨඤ්ච යං පදං;

යඤ්ච විඤ්ඤූ ගරහන්ති, තෙනෙතං ඉති වුච්චති.

‘සෙඛිය’න්ති යං වුත්තං, තං සුණොහි යථාතථං;

සෙක්ඛස්ස සික්ඛමානස්ස, උජුමග්ගානුසාරිනො.

ආදි චෙතං චරණඤ්ච, මුඛං සඤ්ඤමසංවරො;

සික්ඛා එතාදිසී නත්ථි, තෙනෙතං ඉති වුච්චති.

[උදා. 45 උදානෙපි] ඡන්නමතිවස්සති, විවටං නාතිවස්සති;

තස්මා ඡන්නං විවරෙථ, එවං තං නාතිවස්සති.

ගති මිගානං පවනං, ආකාසො පක්ඛිනං ගති;

විභවො ගති ධම්මානං, නිබ්බානං අරහතො ගතීති.

ගාථාසඞ්ගණිකං.

තස්සුද්දානං –

සත්තනගරෙසු පඤ්ඤත්තා, විපත්ති චතුරොපි ච;

භික්ඛූනං භික්ඛුනීනඤ්ච, සාධාරණා අසාධාරණා;

සාසනං අනුග්ගහාය, ගාථාසඞ්ගණිකං ඉදන්ති.

ගාථාසඞ්ගණිකං නිට්ඨිතං.