2. දුතියපාරාජිකසමුට්ඨානං

259. අදින්නං විග්ගහුත්තරි, දුට්ඨුල්ලා අත්තකාමිනං;

අමූලා අඤ්ඤභාගියා, අනියතා දුතියිකා.

අච්ඡින්දෙ පරිණාමනෙ, මුසා ඔමසපෙසුණා;

දුට්ඨුල්ලා පථවීඛණෙ, භූතං අඤ්ඤාය උජ්ඣාපෙ.

නික්කඩ්ඪනං සිඤ්චනඤ්ච, ආමිසහෙතු භුත්තාවී;

එහි අනාදරි භිංසා, අපනිධෙ ච ජීවිතං.

ජානං සප්පාණකං කම්මං, ඌනසංවාසනාසනා;

සහධම්මිකවිලෙඛා, මොහො අමූලකෙන ච.

කුක්කුච්චං ධම්මිකං චීවරං, දත්වා [කුක්කුච්චං ධම්මිකං චීවරං (සී.), කුක්කුච්චං ධම්මිකං දත්වා (ස්‍යා.)] පරිණාමෙය්‍ය පුග්ගලෙ;

කිං තෙ අකාලං අච්ඡින්දෙ, දුග්ගහී නිරයෙන ච.

ගණං විභඞ්ගං දුබ්බලං, කථිනාඵාසුපස්සයං;

අක්කොසචණ්ඩී මච්ඡරී, ගබ්භිනී ච පායන්තියා.

ද්වෙවස්සං සික්ඛා සඞ්ඝෙන, තයො චෙව ගිහීගතා;

කුමාරිභූතා තිස්සො ච, ඌනද්වාදසසම්මතා.

අලං තාව සොකාවාසං, ඡන්දා අනුවස්සා ච ද්වෙ;

සික්ඛාපදා සත්තතිමෙ, සමුට්ඨානා තිකා කතා.

කායචිත්තෙන න වාචා, වාචාචිත්තං න කායිකං;

තීහි ද්වාරෙහි ජායන්ති, පාරාජිකං දුතියං යථා.

දුතියපාරාජිකසමුට්ඨානං නිට්ඨිතං.