3. සඤ්චරිත්තසමුට්ඨානං

260. සඤ්චරී කුටි විහාරො, ධොවනඤ්ච පටිග්ගහො;

විඤ්ඤත්තුත්තරි අභිහට්ඨුං, උභින්නං දූතකෙන ච.

කොසියා සුද්ධද්වෙභාගා, ඡබ්බස්සානි නිසීදනං;

රිඤ්චන්ති රූපිකා චෙව, උභො නානප්පකාරකා.

ඌනබන්ධනවස්සිකා, සුත්තං විකප්පනෙන ච;

ද්වාරදානසිබ්බානි [ද්වාරදානසිබ්බිනී (සී. ස්‍යා.)] ච, පූවපච්චයජොති ච.

රතනං සූචි මඤ්චො ච, තූලං නිසීදනකණ්ඩු ච;

වස්සිකා ච සුගතෙන, විඤ්ඤත්ති අඤ්ඤං චෙතාපනා.

ද්වෙ සඞ්ඝිකා මහාජනිකා, ද්වෙ පුග්ගලලහුකා ගරු;

ද්වෙ විඝාසා සාටිකා ච, සමණචීවරෙන ච.

සමපඤ්ඤාසිමෙ ධම්මා, ඡහි ඨානෙහි ජායරෙ;

කායතො න වාචාචිත්තා, වාචතො න කායමනා.

කායවාචා න ච චිත්තා [න චිත්තතො (සී. ස්‍යා.)], කායචිත්තා න වාචිකා [න වාචතො (සී. ස්‍යා.)];

වාචාචිත්තා න කායෙන, තීහි ද්වාරෙහි [තීහි ඨානෙහි (ස්‍යා.)] ජායරෙ.

ඡසමුට්ඨානිකා එතෙ, සඤ්චරිත්තෙන සාදිසා.

සඤ්චරිත්තසමුට්ඨානං නිට්ඨිතං.