5. චිත්තාගාරවග්ගො
235. රාජාගාරං වා චිත්තාගාරං වා ආරාමං වා උය්‍යානං වා පොක්ඛරණිං වා දස්සනාය ගච්ඡන්තී ද්වෙ ආපත්තියො ආපජ්ජති. ගච්ඡති, ආපත්ති දුක්කටස්ස; යත්ථ ඨිතා පස්සති, ආපත්ති පාචිත්තියස්ස.
ආසන්දිං වා පල්ලඞ්කං වා පරිභුඤ්ජන්තී ද්වෙ ආපත්තියො ආපජ්ජති. පරිභුඤ්ජති, පයොගෙ දුක්කටං; පරිභුත්තෙ, ආපත්ති පාචිත්තියස්ස.
සුත්තං කන්තන්තී ද්වෙ ආපත්තියො ආපජ්ජති. කන්තති, පයොගෙ දුක්කටං; උජ්ජවුජ්ජවෙ, ආපත්ති පාචිත්තියස්ස.
ගිහිවෙය්‍යාවච්චං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ, ආපත්ති පාචිත්තියස්ස.
භික්ඛුනියා – ‘‘එහාය්‍යෙ ඉමං අධිකරණං වූපසමෙහී’’ති වුච්චමානා – ‘‘සාධූ’’ති පටිස්සුණිත්වා නෙව වූපසමෙන්තී න වූපසමාය උස්සුක්කං කරොන්තී එකං ආපත්තිං ආපජ්ජති. පාචිත්තියං.
අගාරිකස්ස වා පරිබ්බාජකස්ස වා පරිබ්බාජිකාය වා සහත්ථා ඛාදනීයං වා භොජනීයං වා දෙන්තී ද්වෙ ආපත්තියො ආපජ්ජති. දෙති, පයොගෙ දුක්කටං; දින්නෙ, ආපත්ති පාචිත්තියස්ස.
ආවසථචීවරං අනිස්සජ්ජිත්වා පරිභුඤ්ජන්තී ද්වෙ ආපත්තියො ආපජ්ජති. පරිභුඤ්ජති, පයොගෙ දුක්කටං; පරිභුත්තෙ, ආපත්ති පාචිත්තියස්ස.
ආවසථං අනිස්සජ්ජිත්වා චාරිකං පක්කමන්තී ද්වෙ ආපත්තියො ආපජ්ජති. පඨමං පාදං පරික්ඛෙපං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.
තිරච්ඡානවිජ්ජං පරියාපුණන්තී ද්වෙ ආපත්තියො ආපජ්ජති. පරියාපුණාති, පයොගෙ දුක්කටං; පදෙ පදෙ ආපත්ති පාචිත්තියස්ස.
තිරච්ඡානවිජ්ජං වාචෙන්තී ද්වෙ ආපත්තියො ආපජ්ජති. වාචෙති, පයොගෙ දුක්කටං; පදෙ පදෙ ආපත්ති පාචිත්තියස්ස.
චිත්තාගාරවග්ගො පඤ්චමො.