6. ආරාමවග්ගො

236. ජානං සභික්ඛුකං ආරාමං අනාපුච්ඡා පවිසන්තී ද්වෙ ආපත්තියො ආපජ්ජති. පඨමං පාදං පරික්ඛෙපං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.

භික්ඛුං අක්කොසන්තී පරිභාසන්තී ද්වෙ ආපත්තියො ආපජ්ජති. අක්කොසති, පයොගෙ දුක්කටං; අක්කොසිතෙ, ආපත්ති පාචිත්තියස්ස.

චණ්ඩීකතා ගණං පරිභාසන්තී ද්වෙ ආපත්තියො ආපජ්ජති. පරිභාසති, පයොගෙ දුක්කටං; පරිභාසිතෙ, ආපත්ති පාචිත්තියස්ස.

නිමන්තිතා වා පවාරිතා වා ඛාදනීයං වා භොජනීයං වා භුඤ්ජන්තී ද්වෙ ආපත්තියො ආපජ්ජති. ‘‘ඛාදිස්සාමි භුඤ්ජිස්සාමී’’ති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාචිත්තියස්ස.

කුලං මච්ඡරායන්තී ද්වෙ ආපත්තියො ආපජ්ජති. මච්ඡරායති, පයොගෙ දුක්කටං; මච්ඡරිතෙ, ආපත්ති පාචිත්තියස්ස.

අභික්ඛුකෙ ආවාසෙ වස්සං වසන්තී ද්වෙ ආපත්තියො ආපජ්ජති. ‘‘වස්සං වසිස්සාමී’’ති සෙනාසනං පඤ්ඤපෙති පානීයං පරිභොජනීයං උපට්ඨපෙති පරිවෙණං සම්මජ්ජති, ආපත්ති දුක්කටස්ස; සහ අරුණුග්ගමනා ආපත්ති පාචිත්තියස්ස.

වස්සංවුට්ඨා භික්ඛුනී උභතොසඞ්ඝෙ තීහි ඨානෙහි න පවාරෙන්තී එකං ආපත්තිං ආපජ්ජති. පාචිත්තියං.

ඔවාදාය වා සංවාසාය වා න ගච්ඡන්තී එකං ආපත්තිං ආපජ්ජති. පාචිත්තියං.

උපොසථම්පි න පුච්ඡන්තී ඔවාදම්පි න යාචන්තී එකං ආපත්තිං ආපජ්ජති. පාචිත්තියං.

පසාඛෙ ජාතං ගණ්ඩං වා රුධිතං වා අනපලොකෙත්වා සඞ්ඝං වා ගණං වා පුරිසෙන සද්ධිං එකෙනෙකා භෙදාපෙන්තී ද්වෙ ආපත්තියො ආපජ්ජති. භෙදාපෙති, පයොගෙ දුක්කටං; භින්නෙ, ආපත්ති පාචිත්තියස්ස.

ආරාමවග්ගො ඡට්ඨො.