2. කතාපත්තිවාරො

1. පාරාජිකකණ්ඩං

228. අවස්සුතා භික්ඛුනී අවස්සුතස්ස පුරිසපුග්ගලස්ස කායසංසග්ගං සාදියන්තී කති ආපත්තියො ආපජ්ජති? අවස්සුතා භික්ඛුනී අවස්සුතස්ස පුරිසපුග්ගලස්ස කායසංසග්ගං සාදියන්තී තිස්සො ආපත්තියො ආපජ්ජති. අධක්ඛකං උබ්භජාණුමණ්ඩලං ගහණං සාදියති, ආපත්ති පාරාජිකස්ස; උබ්භක්ඛකං අධොජාණුමණ්ඩලං ගහණං සාදියති, ආපත්ති ථුල්ලච්චයස්ස; කායපටිබද්ධං ගහණං සාදියති, ආපත්ති දුක්කටස්ස – අවස්සුතා භික්ඛුනී අවස්සුතස්ස පුරිසපුග්ගලස්ස කායසංසග්ගං සාදියන්තී ඉමා තිස්සො ආපත්තියො ආපජ්ජති.

වජ්ජප්පටිච්ඡාදිකා භික්ඛුනී වජ්ජං පටිච්ඡාදෙන්තී කති ආපත්තියො ආපජ්ජති? වජ්ජප්පටිච්ඡාදිකා භික්ඛුනී වජ්ජං පටිච්ඡාදෙන්තී තිස්සො ආපත්තියො ආපජ්ජති. ජානං පාරාජිකං ධම්මං පටිච්ඡාදෙති, ආපත්ති පාරාජිකස්ස; වෙමතිකා පටිච්ඡාදෙති, ආපත්ති ථුල්ලච්චයස්ස; ආචාරවිපත්තිං පටිච්ඡාදෙති, ආපත්ති දුක්කටස්ස – වජ්ජප්පටිච්ඡාදිකා භික්ඛුනී වජ්ජං පටිච්ඡාදෙන්තී ඉමා තිස්සො ආපත්තියො ආපජ්ජති.

උක්ඛිත්තානුවත්තිකා භික්ඛුනී යාවතතියං සමනුභාසනාය න පටිනිස්සජ්ජන්තී කති ආපත්තියො ආපජ්ජති? උක්ඛිත්තානුවත්තිකා භික්ඛුනී යාවතතියං සමනුභාසනාය න පටිනිස්සජ්ජන්තී තිස්සො ආපත්තියො ආපජ්ජති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති පාරාජිකස්ස – උක්ඛිත්තානුවත්තිකා භික්ඛුනී යාවතතියං සමනුභාසනාය න පටිනිස්සජ්ජන්තී ඉමා තිස්සො ආපත්තියො ආපජ්ජති.

අට්ඨමං වත්ථුං පරිපූරෙන්තී කති ආපත්තියො ආපජ්ජති? අට්ඨමං වත්ථුං පරිපූරෙන්තී තිස්සො ආපත්තියො ආපජ්ජති. පුරිසෙන – ‘‘ඉත්ථන්නාමං ඔකාසං [ඉත්ථන්නාමං ගහනං (සී.), ඉත්ථන්නාමං ගබ්භං (ස්‍යා.)] ආගච්ඡා’’ති වුත්තා ගච්ඡති, ආපත්ති දුක්කටස්ස; පුරිසස්ස හත්ථපාසං ඔක්කන්තමත්තෙ ආපත්ති ථුල්ලච්චයස්ස; අට්ඨමං වත්ථුං පරිපූරෙති, ආපත්ති පාරාජිකස්ස – අට්ඨමං වත්ථුං පරිපූරෙන්තී ඉමා තිස්සො ආපත්තියො ආපජ්ජති.

පාරාජිකා නිට්ඨිතා.

2. සඞ්ඝාදිසෙසකණ්ඩං

229. උස්සයවාදිකා භික්ඛුනී අඩ්ඩං කරොන්තී තිස්සො ආපත්තියො ආපජ්ජති. එකස්ස ආරොචෙති, ආපත්ති දුක්කටස්ස; දුතියස්ස ආරොචෙති, ආපත්ති ථුල්ලච්චයස්ස; අඩ්ඩපරියොසානෙ ආපත්ති සඞ්ඝාදිසෙසස්ස.

චොරිං වුට්ඨාපෙන්තී තිස්සො ආපත්තියො ආපජ්ජති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති සඞ්ඝාදිසෙසස්ස.

එකා ගාමන්තරං ගච්ඡන්තී තිස්සො ආපත්තියො ආපජ්ජති. ගච්ඡති, ආපත්ති දුක්කටස්ස; පඨමං පාදං පරික්ඛෙපං අතික්කාමෙති, ආපත්ති ථුල්ලච්චයස්ස; දුතියං පාදං අතික්කාමෙති, ආපත්ති සඞ්ඝාදිසෙසස්ස.

සමග්ගෙන සඞ්ඝෙන උක්ඛිත්තං භික්ඛුනිං ධම්මෙන විනයෙන සත්ථුසාසනෙන අනපලොකෙත්වා කාරකසඞ්ඝං අනඤ්ඤාය ගණස්ස ඡන්දං ඔසාරෙන්තී තිස්සො ආපත්තියො ආපජ්ජති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති සඞ්ඝාදිසෙසස්ස.

අවස්සුතා භික්ඛුනී අවස්සුතස්ස පුරිසපුග්ගලස්ස හත්ථතො ඛාදනීයං වා භොජනීයං වා සහත්ථා පටිග්ගහෙත්වා භුඤ්ජන්තී තිස්සො ආපත්තියො ආපජ්ජති. ‘‘ඛාදිස්සාමි භුඤ්ජිස්සාමී’’ති පටිග්ගණ්හාති, ආපත්ති ථුල්ලච්චයස්ස; අජ්ඣොහාරෙ අජ්ඣොහාරෙ ආපත්ති සඞ්ඝාදිසෙසස්ස; උදකදන්තපොනං පටිග්ගණ්හාති, ආපත්ති දුක්කටස්ස.

‘‘කිං තෙ, අය්‍යෙ, එසො පුරිසපුග්ගලො කරිස්සති අවස්සුතො වා අනවස්සුතො වා, යතො ත්වං අනවස්සුතා! ඉඞ්ඝ, අය්‍යෙ, යං තෙ එසො පුරිසපුග්ගලො දෙති ඛාදනීයං වා භොජනීයං වා, තං ත්වං සහත්ථා පටිග්ගහෙත්වා ඛාද වා භුඤ්ජ වා’’ති උය්‍යොජෙන්තී තිස්සො ආපත්තියො ආපජ්ජති. තස්සා වචනෙන ඛාදිස්සාමි භුඤ්ජිස්සාමීති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති ථුල්ලච්චයස්ස; භොජනපරියොසානෙ ආපත්ති සඞ්ඝාදිසෙසස්ස.

කුපිතා භික්ඛුනී යාවතතියං සමනුභාසනාය න පටිනිස්සජ්ජන්තී තිස්සො ආපත්තියො ආපජ්ජති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති සඞ්ඝාදිසෙසස්ස.

කිස්මිඤ්චිදෙව අධිකරණෙ පච්චාකතා භික්ඛුනී යාවතතියං සමනුභාසනාය න පටිනිස්සජ්ජන්තී තිස්සො ආපත්තියො ආපජ්ජති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති සඞ්ඝාදිසෙසස්ස.

සංසට්ඨා භික්ඛුනියො යාවතතියං සමනුභාසනාය න පටිනිස්සජ්ජන්තියො තිස්සො ආපත්තියො ආපජ්ජන්ති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති සඞ්ඝාදිසෙසස්ස.

‘‘සංසට්ඨාව, අය්‍යෙ, තුම්හෙ විහරථ. මා තුම්හෙ නානා විහරිත්ථා’’ති උය්‍යොජෙන්තී යාවතතියං සමනුභාසනාය න පටිනිස්සජ්ජන්තී තිස්සො ආපත්තියො ආපජ්ජති. ඤත්තියා දුක්කටං; ද්වීහි කම්මවාචාහි ථුල්ලච්චයා; කම්මවාචාපරියොසානෙ ආපත්ති සඞ්ඝාදිසෙසස්ස.

සඞ්ඝාදිසෙසා නිට්ඨිතා.

3. නිස්සග්ගියකණ්ඩං

230. පත්තසන්නිචයං කරොන්තී එකං ආපත්තිං ආපජ්ජති. නිස්සග්ගියං පාචිත්තියං.

අකාලචීවරං ‘‘කාලචීවර’’න්ති අධිට්ඨහිත්වා භාජාපෙන්තී ද්වෙ ආපත්තියො ආපජ්ජති. භාජාපෙති, පයොගෙ දුක්කටං; භාජාපිතෙ නිස්සග්ගියං පාචිත්තියං.

භික්ඛුනියා සද්ධිං චීවරං පරිවත්තෙත්වා අච්ඡින්දන්තී ද්වෙ ආපත්තියො ආපජ්ජති. අච්ඡින්දති, පයොගෙ දුක්කටං; අච්ඡින්නෙ නිස්සග්ගියං පාචිත්තියං.

අඤ්ඤං විඤ්ඤාපෙත්වා අඤ්ඤං විඤ්ඤාපෙන්තී ද්වෙ ආපත්තියො ආපජ්ජති. විඤ්ඤාපෙති, පයොගෙ දුක්කටං; විඤ්ඤාපිතෙ නිස්සග්ගියං පාචිත්තියං.

අඤ්ඤං චෙතාපෙත්වා අඤ්ඤං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අඤ්ඤදත්ථිකෙන පරික්ඛාරෙන අඤ්ඤුද්දිසිකෙන සඞ්ඝිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අඤ්ඤදත්ථිකෙ පරික්ඛාරෙන අඤ්ඤුද්දිසිකෙන සඞ්ඝිකෙන සංයාචිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අඤ්ඤදත්ථිකෙන පරික්ඛාරෙන අඤ්ඤුද්දිසිකෙන මහාජනිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අඤ්ඤදත්ථිකෙන පරික්ඛාරෙන අඤ්ඤුද්දිසිකෙන මහාජනිකෙන සංයාචිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අඤ්ඤදත්ථිකෙන පරික්ඛාරෙන අඤ්ඤුද්දිසිකෙ පුග්ගලිකෙන සංයාචිකෙන අඤ්ඤං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අතිරෙකචතුක්කංසපරමං ගරුපාවුරණං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

අතිරෙකඅඩ්ඪතෙය්‍යකංසපරමං ලහුපාවුරණං චෙතාපෙන්තී ද්වෙ ආපත්තියො ආපජ්ජති. චෙතාපෙති, පයොගෙ දුක්කටං; චෙතාපිතෙ නිස්සග්ගියං පාචිත්තියං.

නිස්සග්ගියා පාචිත්තියා නිට්ඨිතා.

4. පාචිත්තියකණ්ඩං

1. ලසුණවග්ගො

231. ලසුණං ඛාදන්තී ද්වෙ ආපත්තියො ආපජ්ජති. ඛාදිස්සාමීති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාචිත්තියස්ස.

සම්බාධෙ ලොමං සංහරාපෙන්තී ද්වෙ ආපත්තියො ආපජ්ජති. සංහරාපෙති, පයොගෙ දුක්කටං; සංහරාපිතෙ ආපත්ති පාචිත්තියස්ස.

තලඝාතකං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ ආපත්ති පාචිත්තියස්ස.

ජතුමට්ඨකං ආදියන්තී ද්වෙ ආපත්තියො ආපජ්ජති. ආදියති, පයොගෙ දුක්කටං, ආදින්නෙ ආපත්ති පාචිත්තියස්ස.

අතිරෙකද්වඞ්ගුලපබ්බපරමං උදකසුද්ධිකං ආදියන්තී ද්වෙ ආපත්තියො ආපජ්ජති. ආදියති, පයොගෙ දුක්කටං; ආදින්නෙ ආපත්ති පාචිත්තියස්ස.

භික්ඛුස්ස භුඤ්ජන්තස්ස පානීයෙන වා විධූපනෙන වා උපතිට්ඨන්තී ද්වෙ ආපත්තියො ආපජ්ජති. හත්ථපාසෙ තිට්ඨති, ආපත්ති පාචිත්තියස්ස; හත්ථපාසං විජහිත්වා තිට්ඨති, ආපත්ති දුක්කටස්ස.

ආමකධඤ්ඤං විඤ්ඤාපෙත්වා භුඤ්ජන්තී ද්වෙ ආපත්තියො ආපජ්ජති. භුඤ්ජිස්සාමීති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාචිත්තියස්ස.

උච්චාරං වා පස්සාවං වා සඞ්කාරං වා විඝාසං වා තිරොකුට්ටෙ වා තිරොපාකාරෙ වා ඡඩ්ඩෙන්තී ද්වෙ ආපත්තියො ආපජ්ජති. ඡඩ්ඩෙති, පයොගෙ දුක්කටං; ඡඩ්ඩිතෙ ආපත්ති පාචිත්තියස්ස.

උච්චාරං වා පස්සාවං වා සඞ්කාරං වා විඝාසං වා හරිතෙ ඡඩ්ඩෙන්තී ද්වෙ ආපත්තියො ආපජ්ජති. ඡඩ්ඩෙති, පයොගෙ දුක්කටං; ඡඩ්ඩිතෙ ආපත්ති පාචිත්තියස්ස.

නච්චං වා ගීතං වා වාදිතං වා දස්සනාය ගච්ඡන්තී ද්වෙ ආපත්තියො ආපජ්ජති. ගච්ඡති, ආපත්ති දුක්කටස්ස; යත්ථ ඨිතා පස්සති වා සුණාති වා, ආපත්ති පාචිත්තියස්ස.

ලසුණවග්ගො පඨමො.

2. රත්තන්ධකාරවග්ගො

232. රත්තන්ධකාරෙ අප්පදීපෙ පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති. හත්ථපාසෙ තිට්ඨති, ආපත්ති පාචිත්තියස්ස; හත්ථපාසං විජහිත්වා තිට්ඨති, ආපත්ති දුක්කටස්ස.

පටිච්ඡන්නෙ ඔකාසෙ පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති. හත්ථපාසෙ තිට්ඨති, ආපත්ති පාචිත්තියස්ස; හත්ථපාසං විජහිත්වා තිට්ඨති, ආපත්ති දුක්කටස්ස.

අජ්ඣොකාසෙ පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති. හත්ථපාසෙ තිට්ඨති, ආපත්ති පාචිත්තියස්ස; හත්ථපාසං විජහිත්වා තිට්ඨති, ආපත්ති දුක්කටස්ස.

රථිකාය වා බ්‍යූහෙ වා සිඞ්ඝාටකෙ වා පුරිසෙන සද්ධිං එකෙනෙකා සන්තිට්ඨන්තී ද්වෙ ආපත්තියො ආපජ්ජති. හත්ථපාසෙ තිට්ඨති, ආපත්ති පාචිත්තියස්ස; හත්ථපාසං විජහිත්වා තිට්ඨති, ආපත්ති දුක්කටස්ස.

පුරෙභත්තං කුලානි උපසඞ්කමිත්වා ආසනෙ නිසීදිත්වා සාමිකෙ අනාපුච්ඡා පක්කමන්තී ද්වෙ ආපත්තියො ආපජ්ජති. පඨමං පාදං අනොවස්සකං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.

පච්ඡාභත්තං කුලානි උපසඞ්කමිත්වා සාමිකෙ අනාපුච්ඡා ආසනෙ නිසීදන්තී ද්වෙ ආපත්තියො ආපජ්ජති. නිසීදති, පයොගෙ දුක්කටං; නිසින්නෙ ආපත්ති පාචිත්තියස්ස.

විකාලෙ කුලානි උපසඞ්කමිත්වා සාමිකෙ අනාපුච්ඡා සෙය්‍යං සන්ථරිත්වා වා සන්ථරාපෙත්වා වා අභිනිසීදන්තී ද්වෙ ආපත්තියො ආපජ්ජති. අභිනිසීදති, පයොගෙ දුක්කටං; අභිනිසින්නෙ ආපත්ති පාචිත්තියස්ස.

දුග්ගහිතෙන දූපධාරිතෙන පරං උජ්ඣාපෙන්තී ද්වෙ ආපත්තියො ආපජ්ජති. උජ්ඣාපෙති, පයොගෙ දුක්කටං; උජ්ඣාපිතෙ ආපත්ති පාචිත්තියස්ස.

අත්තානං වා පරං වා නිරයෙන වා බ්‍රහ්මචරියෙන වා අභිසපන්තී ද්වෙ ආපත්තියො ආපජ්ජති. අභිසපති, පයොගෙ දුක්කටං; අභිසපිතෙ ආපත්ති පාචිත්තියස්ස.

අත්තානං වධිත්වා වධිත්වා රොදන්තී ද්වෙ ආපත්තියො ආපජ්ජති. වධති රොදති, ආපත්ති පාචිත්තියස්ස; වධති න රොදති, ආපත්ති දුක්කටස්ස.

රත්තන්ධකාරවග්ගො දුතියො.

3. නහානවග්ගො

233. නග්ගා නහායන්තී ද්වෙ ආපත්තියො ආපජ්ජති. නහායති, පයොගෙ දුක්කටං; නහානපරියොසානෙ ආපත්ති පාචිත්තියස්ස.

පමාණාතික්කන්තං උදකසාටිකං කාරාපෙන්තී ද්වෙ ආපත්තියො ආපජ්ජති. කාරාපෙති, පයොගෙ දුක්කටං; කාරාපිතෙ, ආපත්ති පාචිත්තියස්ස.

භික්ඛුනියා චීවරං විසිබ්බෙත්වා වා විසිබ්බාපෙත්වා වා නෙව සිබ්බෙන්තී න සිබ්බාපනාය උස්සුක්කං කරොන්තී එකං ආපත්තිං ආපජ්ජති. පාචිත්තියං.

පඤ්චාහිකං සඞ්ඝාටිචාරං අතික්කාමෙන්තී එකං ආපත්තිං ආපජ්ජති. පාචිත්තියං. චීවරසඞ්කමනීයං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

ගණස්ස චීවරලාභං අන්තරායං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ, ආපත්ති පාචිත්තියස්ස.

ධම්මිකං චීවරවිභඞ්ගං පටිබාහන්තී ද්වෙ ආපත්තියො ආපජ්ජති. පටිබාහති, පයොගෙ දුක්කටං; පටිබාහිතෙ, ආපත්ති පාචිත්තියස්ස.

අගාරිකස්ස වා පරිබ්බාජකස්ස වා පරිබ්බාජිකාය වා සමණචීවරං දෙන්තී ද්වෙ ආපත්තියො ආපජ්ජති. දෙති, පයොගෙ දුක්කටං; දින්නෙ, ආපත්ති පාචිත්තියස්ස.

දුබ්බලචීවරපච්චාසා චීවරකාලසමයං අතික්කාමෙන්තී ද්වෙ ආපත්තියො ආපජ්ජති. අතික්කාමෙති, පයොගෙ දුක්කටං; අතික්කාමිතෙ, ආපත්ති පාචිත්තියස්ස.

ධම්මිකං කථිනුද්ධාරං පටිබාහන්තී ද්වෙ ආපත්තියො ආපජ්ජති. පටිබාහති, පයොගෙ දුක්කටං; පටිබාහිතෙ, ආපත්ති පාචිත්තියස්ස.

නහානවග්ගො තතියො.

4. තුවට්ටවග්ගො

234. ද්වෙ භික්ඛුනියො එකමඤ්චෙ තුවට්ටෙන්තියො ද්වෙ ආපත්තියො ආපජ්ජන්ති. නිපජ්ජන්ති, පයොගෙ දුක්කටං; නිපන්නෙ, ආපත්ති පාචිත්තියස්ස.

ද්වෙ භික්ඛුනියො එකත්ථරණපාවුරණා තුවට්ටෙන්තියො ද්වෙ ආපත්තියො ආපජ්ජන්ති. නිපජ්ජන්ති, පයොගෙ දුක්කටං; නිපන්නෙ, ආපත්ති පාචිත්තියස්ස.

භික්ඛුනියා සඤ්චිච්ච අඵාසුං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ, ආපත්ති පාචිත්තියස්ස.

දුක්ඛිතං සහජීවිනිං නෙව උපට්ඨෙන්තී න උපට්ඨාපනාය උස්සුක්කං කරොන්තී එකං ආපත්තිං ආපජ්ජති. පාචිත්තියං.

භික්ඛුනියා උපස්සයං දත්වා කුපිතා අනත්තමනා නික්කඩ්ඪන්තී ද්වෙ ආපත්තියො ආපජ්ජති. නික්කඩ්ඪති, පයොගෙ දුක්කටං; නික්කඩ්ඪිතෙ, ආපත්ති පාචිත්තියස්ස.

සංසට්ඨා භික්ඛුනී යාවතතියං සමනුභාසනාය න පටිනිස්සජ්ජන්තී ද්වෙ ආපත්තියො ආපජ්ජති. ඤත්තියා දුක්කටං; කම්මවාචාපරියොසානෙ ආපත්ති පාචිත්තියස්ස.

අන්තොරට්ඨෙ සාසඞ්කසම්මතෙ සප්පටිභයෙ අසත්ථිකා චාරිකං චරන්තී ද්වෙ ආපත්තියො ආපජ්ජති. පටිපජ්ජති, පයොගෙ දුක්කටං; පටිපන්නෙ, ආපත්ති පාචිත්තියස්ස.

තිරොරට්ඨෙ සාසඞ්කසම්මතෙ සප්පටිභයෙ අසත්ථිකා චාරිකං චරන්තී ද්වෙ ආපත්තියො ආපජ්ජති. පටිපජ්ජති, පයොගෙ දුක්කටං; පටිපන්නෙ, ආපත්ති පාචිත්තියස්ස.

අන්තොවස්සං චාරිකං චරන්තී ද්වෙ ආපත්තියො ආපජ්ජති. පටිපජ්ජති, පයොගෙ දුක්කටං; පටිපන්නෙ, ආපත්ති පාචිත්තියස්ස.

වස්සංවුට්ඨා භික්ඛුනී චාරිකං න පක්කමන්තී එකං ආපත්තිං ආපජ්ජති. පාචිත්තියං.

තුවට්ටවග්ගො චතුත්ථො.

5. චිත්තාගාරවග්ගො

235. රාජාගාරං වා චිත්තාගාරං වා ආරාමං වා උය්‍යානං වා පොක්ඛරණිං වා දස්සනාය ගච්ඡන්තී ද්වෙ ආපත්තියො ආපජ්ජති. ගච්ඡති, ආපත්ති දුක්කටස්ස; යත්ථ ඨිතා පස්සති, ආපත්ති පාචිත්තියස්ස.

ආසන්දිං වා පල්ලඞ්කං වා පරිභුඤ්ජන්තී ද්වෙ ආපත්තියො ආපජ්ජති. පරිභුඤ්ජති, පයොගෙ දුක්කටං; පරිභුත්තෙ, ආපත්ති පාචිත්තියස්ස.

සුත්තං කන්තන්තී ද්වෙ ආපත්තියො ආපජ්ජති. කන්තති, පයොගෙ දුක්කටං; උජ්ජවුජ්ජවෙ, ආපත්ති පාචිත්තියස්ස.

ගිහිවෙය්‍යාවච්චං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ, ආපත්ති පාචිත්තියස්ස.

භික්ඛුනියා – ‘‘එහාය්‍යෙ ඉමං අධිකරණං වූපසමෙහී’’ති වුච්චමානා – ‘‘සාධූ’’ති පටිස්සුණිත්වා නෙව වූපසමෙන්තී න වූපසමාය උස්සුක්කං කරොන්තී එකං ආපත්තිං ආපජ්ජති. පාචිත්තියං.

අගාරිකස්ස වා පරිබ්බාජකස්ස වා පරිබ්බාජිකාය වා සහත්ථා ඛාදනීයං වා භොජනීයං වා දෙන්තී ද්වෙ ආපත්තියො ආපජ්ජති. දෙති, පයොගෙ දුක්කටං; දින්නෙ, ආපත්ති පාචිත්තියස්ස.

ආවසථචීවරං අනිස්සජ්ජිත්වා පරිභුඤ්ජන්තී ද්වෙ ආපත්තියො ආපජ්ජති. පරිභුඤ්ජති, පයොගෙ දුක්කටං; පරිභුත්තෙ, ආපත්ති පාචිත්තියස්ස.

ආවසථං අනිස්සජ්ජිත්වා චාරිකං පක්කමන්තී ද්වෙ ආපත්තියො ආපජ්ජති. පඨමං පාදං පරික්ඛෙපං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.

තිරච්ඡානවිජ්ජං පරියාපුණන්තී ද්වෙ ආපත්තියො ආපජ්ජති. පරියාපුණාති, පයොගෙ දුක්කටං; පදෙ පදෙ ආපත්ති පාචිත්තියස්ස.

තිරච්ඡානවිජ්ජං වාචෙන්තී ද්වෙ ආපත්තියො ආපජ්ජති. වාචෙති, පයොගෙ දුක්කටං; පදෙ පදෙ ආපත්ති පාචිත්තියස්ස.

චිත්තාගාරවග්ගො පඤ්චමො.

6. ආරාමවග්ගො

236. ජානං සභික්ඛුකං ආරාමං අනාපුච්ඡා පවිසන්තී ද්වෙ ආපත්තියො ආපජ්ජති. පඨමං පාදං පරික්ඛෙපං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.

භික්ඛුං අක්කොසන්තී පරිභාසන්තී ද්වෙ ආපත්තියො ආපජ්ජති. අක්කොසති, පයොගෙ දුක්කටං; අක්කොසිතෙ, ආපත්ති පාචිත්තියස්ස.

චණ්ඩීකතා ගණං පරිභාසන්තී ද්වෙ ආපත්තියො ආපජ්ජති. පරිභාසති, පයොගෙ දුක්කටං; පරිභාසිතෙ, ආපත්ති පාචිත්තියස්ස.

නිමන්තිතා වා පවාරිතා වා ඛාදනීයං වා භොජනීයං වා භුඤ්ජන්තී ද්වෙ ආපත්තියො ආපජ්ජති. ‘‘ඛාදිස්සාමි භුඤ්ජිස්සාමී’’ති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාචිත්තියස්ස.

කුලං මච්ඡරායන්තී ද්වෙ ආපත්තියො ආපජ්ජති. මච්ඡරායති, පයොගෙ දුක්කටං; මච්ඡරිතෙ, ආපත්ති පාචිත්තියස්ස.

අභික්ඛුකෙ ආවාසෙ වස්සං වසන්තී ද්වෙ ආපත්තියො ආපජ්ජති. ‘‘වස්සං වසිස්සාමී’’ති සෙනාසනං පඤ්ඤපෙති පානීයං පරිභොජනීයං උපට්ඨපෙති පරිවෙණං සම්මජ්ජති, ආපත්ති දුක්කටස්ස; සහ අරුණුග්ගමනා ආපත්ති පාචිත්තියස්ස.

වස්සංවුට්ඨා භික්ඛුනී උභතොසඞ්ඝෙ තීහි ඨානෙහි න පවාරෙන්තී එකං ආපත්තිං ආපජ්ජති. පාචිත්තියං.

ඔවාදාය වා සංවාසාය වා න ගච්ඡන්තී එකං ආපත්තිං ආපජ්ජති. පාචිත්තියං.

උපොසථම්පි න පුච්ඡන්තී ඔවාදම්පි න යාචන්තී එකං ආපත්තිං ආපජ්ජති. පාචිත්තියං.

පසාඛෙ ජාතං ගණ්ඩං වා රුධිතං වා අනපලොකෙත්වා සඞ්ඝං වා ගණං වා පුරිසෙන සද්ධිං එකෙනෙකා භෙදාපෙන්තී ද්වෙ ආපත්තියො ආපජ්ජති. භෙදාපෙති, පයොගෙ දුක්කටං; භින්නෙ, ආපත්ති පාචිත්තියස්ස.

ආරාමවග්ගො ඡට්ඨො.

7. ගබ්භිනීවග්ගො

237. ගබ්භිනිං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පායන්තිං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

ද්වෙ වස්සානි ඡසු ධම්මෙසු අසික්ඛිතසික්ඛං සික්ඛමානං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

ද්වෙ වස්සානි ඡසු ධම්මෙසු සික්ඛිතසික්ඛං සික්ඛමානං සඞ්ඝෙන අසම්මතං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

ඌනද්වාදසවස්සං ගිහිගතං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පරිපුණ්ණද්වාදසවස්සං ගිහිගතං ද්වෙ වස්සානි ඡසු ධම්මෙසු අසික්ඛිතසික්ඛං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පරිපුණ්ණද්වාදසවස්සං ගිහිගතං ද්වෙ වස්සානි ඡසු ධම්මෙසු සික්ඛිතසික්ඛං සඞ්ඝෙන අසම්මතං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

සහජීවිනිං වුට්ඨාපෙත්වා ද්වෙ වස්සානි නෙව අනුග්ගණ්හන්තී නානුග්ගණ්හාපෙන්තී එකං ආපත්තිං ආපජ්ජති. පාචිත්තියං.

වුට්ඨාපිතං පවත්තිනිං ද්වෙ වස්සානි නානුබන්ධන්තී එකං ආපත්තිං ආපජ්ජති. පාචිත්තියං.

සහජීවිනිං වුට්ඨාපෙත්වා නෙව වූපකාසෙන්තී න වූපකාසාපෙන්තී එකං ආපත්තිං ආපජ්ජති. පාචිත්තියං.

ගබ්භිනීවග්ගො සත්තමො.

8. කුමාරීභූතවග්ගො

238. ඌනවීසතිවස්සං කුමාරිභූතං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පරිපුණ්ණවීසතිවස්සං කුමාරිභූතං ද්වෙ වස්සානි ඡසු ධම්මෙසු අසික්ඛිතසික්ඛං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පරිපුණ්ණවීසතිවස්සං කුමාරිභූතං ද්වෙ වස්සානි ඡසු ධම්මෙසු සික්ඛිතසික්ඛං සඞ්ඝෙන අසම්මතං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

ඌනද්වාදසවස්සා වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පරිපුණ්ණද්වාදසවස්සා සඞ්ඝෙන අසම්මතා වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

‘‘අලං තාව තෙ, අය්‍යෙ, වුට්ඨාපිතෙනා’’ති වුච්චමානා ‘‘සාධූ’’ති පටිස්සුණිත්වා පච්ඡා ඛීයනධම්මං ආපජ්ජන්තී ද්වෙ ආපත්තියො ආපජ්ජති. ඛිය්‍යති, පයොගෙ දුක්කටං; ඛිය්‍යිතෙ, ආපත්ති පාචිත්තියස්ස.

සික්ඛමානං – ‘‘සචෙ මෙ ත්වං, අය්‍යෙ, චීවරං දස්සසි, එවාහං තං වුට්ඨාපෙස්සාමී’’ති වත්වා නෙව වුට්ඨාපෙන්තී න වුට්ඨාපනාය උස්සුක්කං කරොන්තී එකං ආපත්තිං ආපජ්ජති. පාචිත්තියං.

සික්ඛමානං – ‘‘සචෙ මං ත්වං, අය්‍යෙ, ද්වෙ වස්සානි අනුබන්ධිස්සසි, එවාහං තං වුට්ඨාපෙස්සාමී’’ති වත්වා නෙව වුට්ඨාපෙන්තී න වුට්ඨාපනාය උස්සුක්කං කරොන්තී එකං ආපත්තිං ආපජ්ජති. පාචිත්තියං.

පුරිසසංසට්ඨං කුමාරකසංසට්ඨං චණ්ඩිං සොකාවාසං සික්ඛමානං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

මාතාපිතූහි වා සාමිකෙන වා අනනුඤ්ඤාතං සික්ඛමානං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

පාරිවාසිකඡන්දදානෙ සික්ඛමානං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

අනුවස්සං වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

එකං වස්සං ද්වෙ වුට්ඨාපෙන්තී ද්වෙ ආපත්තියො ආපජ්ජති. වුට්ඨාපෙති, පයොගෙ දුක්කටං; වුට්ඨාපිතෙ, ආපත්ති පාචිත්තියස්ස.

කුමාරීභූතවග්ගො අට්ඨමො.

9. ඡත්තුපාහනවග්ගො

239. ඡත්තුපාහනං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

යානෙන යායන්තී ද්වෙ ආපත්තියො ආපජ්ජති. යායති, පයොගෙ දුක්කටං; යායිතෙ, ආපත්ති පාචිත්තියස්ස.

සඞ්ඝාණිං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

ඉත්ථාලඞ්කාරං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

ගන්ධවණ්ණකෙන නහායන්තී ද්වෙ ආපත්තියො ආපජ්ජති. නහායති, පයොගෙ දුක්කටං; නහානපරියොසානෙ, ආපත්ති පාචිත්තියස්ස.

වාසිතකෙන පිඤ්ඤාකෙන නහායන්තී ද්වෙ ආපත්තියො ආපජ්ජති. නහායති, පයොගෙ දුක්කටං; නහානපරියොසානෙ, ආපත්ති පාචිත්තියස්ස.

භික්ඛුනියා උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

සික්ඛමානාය උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

සාමණෙරියා උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

ගිහිනියා උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

භික්ඛුස්ස පුරතො අනාපුච්ඡා ආසනෙ නිසීදන්තී ද්වෙ ආපත්තියො ආපජ්ජති. නිසීදති, පයොගෙ දුක්කටං; නිසින්නෙ, ආපත්ති පාචිත්තියස්ස.

අනොකාසකතං භික්ඛුං පඤ්හං පුච්ඡන්තී ද්වෙ ආපත්තියො ආපජ්ජති. පුච්ඡති, පයොගෙ දුක්කටං; පුච්ඡිතෙ, ආපත්ති පාචිත්තියස්ස.

අසඞ්කච්චිකා ගාමං පවිසන්තී ද්වෙ ආපත්තියො ආපජ්ජති. පඨමං පාදං පරික්ඛෙපං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.

ඡත්තුපාහනවග්ගො නවමො.

ඛුද්දකං නිට්ඨිතං.

5. පාටිදෙසනීයකණ්ඩං

240. සප්පිං විඤ්ඤාපෙත්වා භුඤ්ජන්තී ද්වෙ ආපත්තියො ආපජ්ජති. භුඤ්ජිස්සාමීති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාටිදෙසනීයස්ස.