4. තුවට්ටවග්ගො

234. ද්වෙ භික්ඛුනියො එකමඤ්චෙ තුවට්ටෙන්තියො ද්වෙ ආපත්තියො ආපජ්ජන්ති. නිපජ්ජන්ති, පයොගෙ දුක්කටං; නිපන්නෙ, ආපත්ති පාචිත්තියස්ස.

ද්වෙ භික්ඛුනියො එකත්ථරණපාවුරණා තුවට්ටෙන්තියො ද්වෙ ආපත්තියො ආපජ්ජන්ති. නිපජ්ජන්ති, පයොගෙ දුක්කටං; නිපන්නෙ, ආපත්ති පාචිත්තියස්ස.

භික්ඛුනියා සඤ්චිච්ච අඵාසුං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ, ආපත්ති පාචිත්තියස්ස.

දුක්ඛිතං සහජීවිනිං නෙව උපට්ඨෙන්තී න උපට්ඨාපනාය උස්සුක්කං කරොන්තී එකං ආපත්තිං ආපජ්ජති. පාචිත්තියං.

භික්ඛුනියා උපස්සයං දත්වා කුපිතා අනත්තමනා නික්කඩ්ඪන්තී ද්වෙ ආපත්තියො ආපජ්ජති. නික්කඩ්ඪති, පයොගෙ දුක්කටං; නික්කඩ්ඪිතෙ, ආපත්ති පාචිත්තියස්ස.

සංසට්ඨා භික්ඛුනී යාවතතියං සමනුභාසනාය න පටිනිස්සජ්ජන්තී ද්වෙ ආපත්තියො ආපජ්ජති. ඤත්තියා දුක්කටං; කම්මවාචාපරියොසානෙ ආපත්ති පාචිත්තියස්ස.

අන්තොරට්ඨෙ සාසඞ්කසම්මතෙ සප්පටිභයෙ අසත්ථිකා චාරිකං චරන්තී ද්වෙ ආපත්තියො ආපජ්ජති. පටිපජ්ජති, පයොගෙ දුක්කටං; පටිපන්නෙ, ආපත්ති පාචිත්තියස්ස.

තිරොරට්ඨෙ සාසඞ්කසම්මතෙ සප්පටිභයෙ අසත්ථිකා චාරිකං චරන්තී ද්වෙ ආපත්තියො ආපජ්ජති. පටිපජ්ජති, පයොගෙ දුක්කටං; පටිපන්නෙ, ආපත්ති පාචිත්තියස්ස.

අන්තොවස්සං චාරිකං චරන්තී ද්වෙ ආපත්තියො ආපජ්ජති. පටිපජ්ජති, පයොගෙ දුක්කටං; පටිපන්නෙ, ආපත්ති පාචිත්තියස්ස.

වස්සංවුට්ඨා භික්ඛුනී චාරිකං න පක්කමන්තී එකං ආපත්තිං ආපජ්ජති. පාචිත්තියං.

තුවට්ටවග්ගො චතුත්ථො.