3. නග්ගවග්ගො

1. පඨමසික්ඛාපදං

883. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන සම්බහුලා [මහාව. 350] භික්ඛුනියො අචිරවතියා නදියා වෙසියාහි සද්ධිං නග්ගා එකතිත්ථෙ නහායන්ති. වෙසියා තා භික්ඛුනියො උප්පණ්ඩෙසුං – ‘‘කිං නු ඛො නාම තුම්හාකං, අය්‍යෙ, දහරානං [දහරානං දහරානං (සී.)] බ්‍රහ්මචරියං චිණ්ණෙන, නනු නාම කාමා පරිභුඤ්ජිතබ්බා! යදා ජිණ්ණා භවිස්සථ තදා බ්‍රහ්මචරියං චරිස්සථ. එවං තුම්හාකං උභො අත්ථා පරිග්ගහිතා භවිස්සන්තී’’ති. භික්ඛුනියො වෙසියාහි උප්පණ්ඩියමානා මඞ්කූ අහෙසුං. අථ ඛො තා භික්ඛුනියො උපස්සයං ගන්ත්වා භික්ඛුනීනං එතමත්ථං ආරොචෙසුං. භික්ඛුනියො භික්ඛූනං එතමත්ථං ආරොචෙසුං. භික්ඛූ භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘තෙන හි, භික්ඛවෙ, භික්ඛුනීනං සික්ඛාපදං පඤ්ඤපෙස්සාමි දස අත්ථවසෙ පටිච්ච – සඞ්ඝසුට්ඨුතාය…පෙ… විනයානුග්ගහාය. එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

884. ‘‘යා පන භික්ඛුනී නග්ගා නහායෙය්‍ය, පාචිත්තිය’’න්ති.

885. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

නග්ගා නහායෙය්‍යාති අනිවත්ථා වා අපාරුතා වා නහායති, පයොගෙ දුක්කටං. නහානපරියොසානෙ ආපත්ති පාචිත්තියස්ස.

886. අනාපත්ති අච්ඡින්නචීවරිකාය වා නට්ඨචීවරිකාය වා, ආපදාසු, උම්මත්තිකාය, ආදිකම්මිකායාති.

පඨමසික්ඛාපදං නිට්ඨිතං.

2. දුතියසික්ඛාපදං

887. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන භගවතා භික්ඛුනීනං [මහාව. 351] උදකසාටිකා අනුඤ්ඤාතා හොති. ඡබ්බග්ගියා භික්ඛුනියො – ‘‘භගවතා උදකසාටිකා අනුඤ්ඤාතා’’ති අප්පමාණිකායො උදකසාටිකායො ධාරෙසුං [ධාරෙන්ති (පාචි. 531-545)]. පුරතොපි පච්ඡතොපි ආකඩ්ඪන්තා ආහිණ්ඩන්ති. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛුනියො අප්පමාණිකායො උදකසාටිකායො ධාරෙස්සන්තී’’ති…පෙ… සච්චං කිර, භික්ඛවෙ, ඡබ්බග්ගියා භික්ඛුනියො අප්පමාණිකායො උදකසාටිකායො ධාරෙන්තීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ඡබ්බග්ගියා භික්ඛුනියො අප්පමාණිකායො උදකසාටිකායො ධාරෙස්සන්ති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

888. ‘‘උදකසාටිකං පන භික්ඛුනියා කාරයමානාය පමාණිකා කාරෙතබ්බා. තත්‍රිදං පමාණං – දීඝසො චතස්සො විදත්ථියො, සුගතවිදත්ථියා; තිරියං ද්වෙ විදත්ථියො. තං අතික්කාමෙන්තියා ඡෙදනකං පාචිත්තිය’’න්ති.

889. උදකසාටිකා නාම යාය නිවත්ථා [නිවත්ථාය (ස්‍යා.)] නහායති.

කාරයමානායාති කරොන්තියා වා කාරාපෙන්තියා වා.

පමාණිකා කාරෙතබ්බා. තත්‍රිදං පමාණං – දීඝසො චතස්සො විදත්ථියො, සුගතවිදත්ථියා; තිරියං ද්වෙ විදත්ථියො. තං අතික්කාමෙත්වා කරොති වා කාරාපෙති වා, පයොගෙ දුක්කටං. පටිලාභෙන ඡින්දිත්වා පාචිත්තියං දෙසෙතබ්බං.

890. අත්තනා විප්පකතං අත්තනා පරියොසාපෙති, ආපත්ති පාචිත්තියස්ස. අත්තනා විප්පකතං පරෙහි පරියොසාපෙති, ආපත්ති පාචිත්තියස්ස. පරෙහි විප්පකතං අත්තනා පරියොසාපෙති, ආපත්ති පාචිත්තියස්ස. පරෙහි විප්පකතං පරෙහි පරියොසාපෙති, ආපත්ති පාචිත්තියස්ස.

අඤ්ඤස්සත්ථාය කරොති වා කාරාපෙති වා, ආපත්ති දුක්කටස්ස. අඤ්ඤෙන කතං පටිලභිත්වා පරිභුඤ්ජති, ආපත්ති දුක්කටස්ස.

891. අනාපත්ති පමාණිකං කරොති, ඌනකං කරොති, අඤ්ඤෙන කතං පමාණාතික්කන්තං පටිලභිත්වා ඡින්දිත්වා පරිභුඤ්ජති, විතානං වා භූමත්ථරණං වා සාණිපාකාරං වා භිසිං වා බිබ්බොහනං වා කරොති, උම්මත්තිකාය, ආදිකම්මිකායාති.

දුතියසික්ඛාපදං නිට්ඨිතං.

3. තතියසික්ඛාපදං

892. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරිස්සා භික්ඛුනියා මහග්ඝෙ චීවරදුස්සෙ චීවරං දුක්කටං හොති දුස්සිබ්බිතං. ථුල්ලනන්දා භික්ඛුනී තං භික්ඛුනිං එතදවොච – ‘‘සුන්දරං ඛො ඉදං තෙ, අය්‍යෙ, චීවරදුස්සං; චීවරඤ්ච ඛො දුක්කටං දුස්සිබ්බිත’’න්ති. ‘‘විසිබ්බෙමි, අය්‍යෙ, සිබ්බිස්සසී’’ති? ‘‘ආමාය්‍යෙ, සිබ්බිස්සාමී’’ති. අථ ඛො සා භික්ඛුනී තං චීවරං විසිබ්බෙත්වා ථුල්ලනන්දාය භික්ඛුනියා අදාසි. ථුල්ලනන්දා භික්ඛුනී – ‘‘සිබ්බිස්සාමි සිබ්බිස්සාමී’’ති නෙව සිබ්බති න සිබ්බාපනාය උස්සුක්කං කරොති. අථ ඛො සා භික්ඛුනී භික්ඛුනීනං එතමත්ථං ආරොචෙසි. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා භික්ඛුනියා චීවරං විසිබ්බාපෙත්වා නෙව සිබ්බිස්සති න සිබ්බාපනාය උස්සුක්කං කරිස්සතී’’ති…පෙ… සච්චං කිර, භික්ඛවෙ, ථුල්ලනන්දා භික්ඛුනී භික්ඛුනියා චීවරං විසිබ්බාපෙත්වා නෙව සිබ්බති න සිබ්බාපනාය උස්සුක්කං කරොතීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී භික්ඛුනියා චීවරං විසිබ්බාපෙත්වා නෙව සිබ්බිස්සති න සිබ්බාපනාය උස්සුක්කං කරිස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

893. ‘‘යා පන භික්ඛුනී භික්ඛුනියා චීවරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බෙය්‍ය න සිබ්බාපනාය උස්සුක්කං කරෙය්‍ය, අඤ්ඤත්‍ර චතූහපඤ්චාහා, පාචිත්තිය’’න්ති.

894. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

භික්ඛුනියාති අඤ්ඤාය භික්ඛුනියා.

චීවරං නාම ඡන්නං චීවරානං අඤ්ඤතරං චීවරං.

විසිබ්බෙත්වාති සයං විසිබ්බෙත්වා. විසිබ්බාපෙත්වාති අඤ්ඤං විසිබ්බාපෙත්වා.

සා පච්ඡා අනන්තරායිකිනීති අසති අන්තරායෙ.

නෙව සිබ්බෙය්‍යාති න සයං සිබ්බෙය්‍ය. න සිබ්බාපනාය උස්සුක්කං කරෙය්‍යාති න අඤ්ඤං ආණාපෙය්‍ය.

අඤ්ඤත්‍ර චතූහපඤ්චාහාති ඨපෙත්වා චතූහපඤ්චාහං. ‘‘නෙව සිබ්බිස්සාමි න සිබ්බාපනාය උස්සුක්කං කරිස්සාමී’’ති ධුරං නික්ඛිත්තමත්තෙ ආපත්ති පාචිත්තියස්ස.

895. උපසම්පන්නාය උපසම්පන්නසඤ්ඤා චීවරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බති න සිබ්බාපනාය උස්සුක්කං කරොති, අඤ්ඤත්‍ර චතූහපඤ්චාහා, ආපත්ති පාචිත්තියස්ස. උපසම්පන්නාය වෙමතිකා චීවරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බති න සිබ්බාපනාය උස්සුක්කං කරොති, අඤ්ඤත්‍ර චතූහපඤ්චාහා, ආපත්ති පාචිත්තියස්ස. උපසම්පන්නාය අනුපසම්පන්නසඤ්ඤා චීවරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බති න සිබ්බාපනාය උස්සුක්කං කරොති, අඤ්ඤත්‍ර චතූහපඤ්චාහා, ආපත්ති පාචිත්තියස්ස.

අඤ්ඤං පරික්ඛාරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බති න සිබ්බාපනාය උස්සුක්කං කරොති, අඤ්ඤත්‍ර චතූහපඤ්චාහා, ආපත්ති දුක්කටස්ස. අනුපසම්පන්නාය චීවරං වා අඤ්ඤං වා පරික්ඛාරං විසිබ්බෙත්වා වා විසිබ්බාපෙත්වා වා සා පච්ඡා අනන්තරායිකිනී නෙව සිබ්බති න සිබ්බාපනාය උස්සුක්කං කරොති, අඤ්ඤත්‍ර චතූහපඤ්චාහා, ආපත්ති දුක්කටස්ස. අනුපසම්පන්නාය උපසම්පන්නසඤ්ඤා, ආපත්ති දුක්කටස්ස. අනුපසම්පන්නාය වෙමතිකා, ආපත්ති දුක්කටස්ස. අනුපසම්පන්නාය අනුපසම්පන්නසඤ්ඤා, ආපත්ති දුක්කටස්ස.

896. අනාපත්ති සති අන්තරායෙ, පරියෙසිත්වා න ලභති, කරොන්තී චතූහපඤ්චාහං අතික්කාමෙති, ගිලානාය, ආපදාසු, උම්මත්තිකාය, ආදිකම්මිකායාති.

තතියසික්ඛාපදං නිට්ඨිතං.

4. චතුත්ථසික්ඛාපදං

897. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන භික්ඛුනියො භික්ඛුනීනං හත්ථෙ චීවරං නික්ඛිපිත්වා සන්තරුත්තරෙන ජනපදචාරිකං පක්කමන්ති. තානි චීවරානි චිරං නික්ඛිත්තානි කණ්ණකිතානි හොන්ති. තානි භික්ඛුනියො ඔතාපෙන්ති. භික්ඛුනියො තා භික්ඛුනියො එතදවොචුං – ‘‘කස්සිමානි, අය්‍යෙ, චීවරානි කණ්ණකිතානී’’ති? අථ ඛො තා භික්ඛුනියො භික්ඛුනීනං එතමත්ථං ආරොචෙසුං. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛුනියො භික්ඛුනීනං හත්ථෙ චීවරං නික්ඛිපිත්වා සන්තරුත්තරෙන ජනපදචාරිකං පක්කමිස්සන්තී’’ති…පෙ… සච්චං කිර, භික්ඛවෙ, භික්ඛුනියො භික්ඛුනීනං හත්ථෙ චීවරං නික්ඛිපිත්වා සන්තරුත්තරෙන ජනපදචාරිකං පක්කමන්තීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, භික්ඛුනියො භික්ඛුනීනං හත්ථෙ චීවරං නික්ඛිපිත්වා සන්තරුත්තරෙන ජනපදචාරිකං පක්කමිස්සන්ති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

898. ‘‘යා පන භික්ඛුනී පඤ්චාහිකං සඞ්ඝාටිචාරං [සඞ්ඝාටිවාරං (ස්‍යා.)] අතික්කාමෙය්‍ය, පාචිත්තිය’’න්ති.

899. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

පඤ්චාහිකං සඞ්ඝාටිචාරං අතික්කාමෙය්‍යාති පඤ්චමං දිවසං පඤ්ච චීවරානි නෙව නිවාසෙති න පාරුපති න ඔතාපෙති, පඤ්චමං දිවසං අතික්කාමෙති, ආපත්ති පාචිත්තියස්ස.

900. පඤ්චාහාතික්කන්තෙ අතික්කන්තසඤ්ඤා, ආපත්ති පාචිත්තියස්ස. පඤ්චාහාතික්කන්තෙ වෙමතිකා, ආපත්ති පාචිත්තියස්ස. පඤ්චාහාතික්කන්තෙ අනතික්කන්තසඤ්ඤා, ආපත්ති පාචිත්තියස්ස.

පඤ්චාහානතික්කන්තෙ අතික්කන්තසඤ්ඤා, ආපත්ති දුක්කටස්ස. පඤ්චාහානතික්කන්තෙ වෙමතිකා, ආපත්ති දුක්කටස්ස. පඤ්චාහානතික්කන්තෙ අනතික්කන්තසඤ්ඤා, අනාපත්ති.

901. අනාපත්ති පඤ්චමං දිවසං පඤ්ච චීවරානි නිවාසෙති වා පාරුපති වා ඔතාපෙති වා, ගිලානාය, ආපදාසු, උම්මත්තිකාය, ආදිකම්මිකායාති.

චතුත්ථසික්ඛාපදං නිට්ඨිතං.

5. පඤ්චමසික්ඛාපදං

902. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරා භික්ඛුනී පිණ්ඩාය චරිත්වා අල්ලචීවරං පත්ථරිත්වා විහාරං පාවිසි. අඤ්ඤතරා භික්ඛුනී තං චීවරං පාරුපිත්වා ගාමං පිණ්ඩාය පාවිසි. සා නික්ඛමිත්වා භික්ඛුනියො පුච්ඡි – ‘‘අපාය්‍යෙ, මය්හං චීවරං පස්සෙය්‍යාථා’’ති? භික්ඛුනියො තස්සා භික්ඛුනියා එතමත්ථං ආරොචෙසුං. අථ ඛො සා භික්ඛුනී උජ්ඣායති ඛිය්‍යති විපාචෙති – ‘‘කථඤ්හි නාම භික්ඛුනී මය්හං චීවරං අනාපුච්ඡා පාරුපිස්සතී’’ති! අථ ඛො සා භික්ඛුනී භික්ඛුනීනං එතමත්ථං ආරොචෙසි. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛුනී භික්ඛුනියා චීවරං අනාපුච්ඡා පාරුපිස්සතී’’ති…පෙ… සච්චං කිර, භික්ඛවෙ, භික්ඛුනී භික්ඛුනියා චීවරං අනාපුච්ඡා පාරුපතීති [පාරුපීති (ක.)]? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, භික්ඛුනී භික්ඛුනියා චීවරං අනාපුච්ඡා පාරුපිස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

903. ‘‘යා පන භික්ඛුනී චීවරසඞ්කමනීයං ධාරෙය්‍ය, පාචිත්තිය’’න්ති.

904. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

චීවරසඞ්කමනීයං නාම උපසම්පන්නාය පඤ්චන්නං චීවරානං අඤ්ඤතරං චීවරං තස්සා වා අදින්නං තං වා අනාපුච්ඡා නිවාසෙති වා පාරුපති වා, ආපත්ති පාචිත්තියස්ස.

905. උපසම්පන්නාය උපසම්පන්නසඤ්ඤා චීවරසඞ්කමනීයං ධාරෙති, ආපත්ති පාචිත්තියස්ස. උපසම්පන්නාය වෙමතිකා චීවරසඞ්කමනීයං ධාරෙති, ආපත්ති පාචිත්තියස්ස. උපසම්පන්නාය අනුපසම්පන්නසඤ්ඤා චීවරසඞ්කමනීයං ධාරෙති, ආපත්ති පාචිත්තියස්ස.

අනුපසම්පන්නාය චීවරසඞ්කමනීයං ධාරෙති, ආපත්ති දුක්කටස්ස. අනුපසම්පන්නාය උපසම්පන්නසඤ්ඤා, ආපත්ති දුක්කටස්ස. අනුපසම්පන්නාය වෙමතිකා, ආපත්ති දුක්කටස්ස. අනුපසම්පන්නාය අනුපසම්පන්නසඤ්ඤා, ආපත්ති දුක්කටස්ස.

906. අනාපත්ති සා වා දෙති, තං වා ආපුච්ඡා නිවාසෙති වා පාරුපති වා, අච්ඡින්නචීවරිකාය, නට්ඨචීවරිකාය, ආපදාසු, උම්මත්තිකාය, ආදිකම්මිකායාති.

පඤ්චමසික්ඛාපදං නිට්ඨිතං.

6. ඡට්ඨසික්ඛාපදං

907. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ථුල්ලනන්දාය භික්ඛුනියා උපට්ඨාකකුලං ථුල්ලනන්දං භික්ඛුනිං එතදවොච – ‘‘භික්ඛුනිසඞ්ඝස්ස, අය්‍යෙ, චීවරං දස්සාමා’’ති. ථුල්ලනන්දා භික්ඛුනී – ‘‘තුම්හෙ බහුකිච්චා බහුකරණීයා’’ති අන්තරායං අකාසි. තෙන ඛො පන සමයෙන තස්ස කුලස්ස ඝරං ඩය්හති. තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා අම්හාකං දෙය්‍යධම්මං අන්තරායං කරිස්සති! උභයෙනාම්හ පරිබාහිරා [පරිහීනා (සී.)], භොගෙහි ච පුඤ්ඤෙන චා’’ති. අස්සොසුං ඛො භික්ඛුනියො තෙසං මනුස්සානං උජ්ඣායන්තානං ඛිය්‍යන්තානං විපාචෙන්තානං. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා ගණස්ස චීවරලාභං අන්තරායං කරිස්සතී’’ති…පෙ… සච්චං කිර, භික්ඛවෙ, ථුල්ලනන්දා භික්ඛුනී ගණස්ස චීවරලාභං අන්තරායං අකාසීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී ගණස්ස චීවරලාභං අන්තරායං කරිස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

908. ‘‘යා පන භික්ඛුනී ගණස්ස චීවරලාභං අන්තරායං කරෙය්‍ය, පාචිත්තිය’’න්ති.

909. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

ගණො නාම භික්ඛුනිසඞ්ඝො වුච්චති.

චීවරං නාම ඡන්නං චීවරානං අඤ්ඤතරං චීවරං විකප්පනුපගං පච්ඡිමං.

අන්තරායං කරෙය්‍යාති ‘‘කථං ඉමෙ චීවරං න [ඉමං චීවරං (ක.)] දදෙය්‍යු’’න්ති අන්තරායං කරොති, ආපත්ති පාචිත්තියස්ස. අඤ්ඤං පරික්ඛාරං අන්තරායං කරොති, ආපත්ති දුක්කටස්ස. සම්බහුලානං භික්ඛුනීනං වා එකභික්ඛුනියා වා අනුපසම්පන්නාය වා චීවරං වා අඤ්ඤං වා පරික්ඛාරං අන්තරායං කරොති, ආපත්ති දුක්කටස්ස.

910. අනාපත්ති ආනිසංසං දස්සෙත්වා නිවාරෙති, උම්මත්තිකාය, ආදිකම්මිකායාති.

ඡට්ඨසික්ඛාපදං නිට්ඨිතං.

7. සත්තමසික්ඛාපදං

911. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන භික්ඛුනිසඞ්ඝස්ස අකාලචීවරං උප්පන්නං හොති. අථ ඛො භික්ඛුනිසඞ්ඝො තං චීවරං භාජෙතුකාමො සන්නිපති. තෙන ඛො පන සමයෙන ථුල්ලනන්දාය භික්ඛුනියා අන්තෙවාසිනියො භික්ඛුනියො පක්කන්තා හොන්ති. ථුල්ලනන්දා භික්ඛුනී තා භික්ඛුනියො එතදවොච – ‘‘අය්‍යෙ, භික්ඛුනියො පක්කන්තා, න තාව චීවරං භාජීයිස්සතී’’ති. චීවරවිභඞ්ගං පටිබාහි. භික්ඛුනියො න තාව චීවරං භාජීයිස්සතීති පක්කමිංසු [විපක්කමිංසු (ස්‍යා.)]. ථුල්ලනන්දා භික්ඛුනී අන්තෙවාසිනීසු භික්ඛුනීසු ආගතාසු තං චීවරං භාජාපෙසි. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා ධම්මිකං චීවරවිභඞ්ගං පටිබාහිස්සතී’’ති…පෙ… සච්චං කිර, භික්ඛවෙ, ථුල්ලනන්දා භික්ඛුනී ධම්මිකං චීවරවිභඞ්ගං පටිබාහතීති [පටිබාහීති (ක.)]? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී ධම්මිකං චීවරවිභඞ්ගං පටිබාහිස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

912. ‘‘යා පන භික්ඛුනී ධම්මිකං චීවරවිභඞ්ගං පටිබාහෙය්‍ය, පාචිත්තිය’’න්ති.

913. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

ධම්මිකොනාම චීවරවිභඞ්ගො සමග්ගො භික්ඛුනිසඞ්ඝො සන්නිපතිත්වා භාජෙති.

පටිබාහෙය්‍යාති කථං ඉමං චීවරං න භාජෙය්‍යාති [චීවරං භාජෙය්‍යාති (ක.)] පටිබාහති, ආපත්ති පාචිත්තියස්ස.

914. ධම්මිකෙ ධම්මිකසඤ්ඤා පටිබාහති, ආපත්ති පාචිත්තියස්ස. ධම්මිකෙ වෙමතිකා පටිබාහති, ආපත්ති දුක්කටස්ස. ධම්මිකෙ අධම්මිකසඤ්ඤා පටිබාහති, අනාපත්ති. අධම්මිකෙ ධම්මිකසඤ්ඤා, ආපත්ති දුක්කටස්ස. අධම්මිකෙ වෙමතිකා, ආපත්ති දුක්කටස්ස. අධම්මිකෙ අධම්මිකසඤ්ඤා, අනාපත්ති.

915. අනාපත්ති ආනිසංසං දස්සෙත්වා පටිබාහති, උම්මත්තිකාය, ආදිකම්මිකායාති.

සත්තමසික්ඛාපදං නිට්ඨිතං.

8. අට්ඨමසික්ඛාපදං

916. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ථුල්ලනන්දා භික්ඛුනී නටානම්පි නටකානම්පි ලඞ්ඝකානම්පි සොකජ්ඣායිකානම්පි [සොකසායිකානම්පි (සී.)] කුම්භථූණිකානම්පි [කුම්භථුණිකානම්පි (ක.)] සමණචීවරං දෙති – ‘‘මය්හං පරිසති [පරිසතිං (සී.)] වණ්ණං භාසථා’’ති. නටාපි නටකාපි ලඞ්ඝකාපි සොකජ්ඣායිකාපි කුම්භථූණිකාපි ථුල්ලනන්දාය භික්ඛුනියා පරිසති වණ්ණං භාසන්ති – ‘‘අය්‍යා ථුල්ලනන්දා බහුස්සුතා භාණිකා විසාරදා පට්ටා ධම්මිං කථං කාතුං; දෙථ අය්‍යාය, කරොථ අය්‍යායා’’ති. යා තා භික්ඛුනියො අප්පිච්ඡා, තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා අගාරිකස්ස සමණචීවරං දස්සතී’’ති…පෙ… සච්චං කිර, භික්ඛවෙ, ථුල්ලනන්දා භික්ඛුනී අගාරිකස්ස සමණචීවරං දෙතීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී අගාරිකස්ස සමණචීවරං දස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

917. ‘‘යා පන භික්ඛුනී අගාරිකස්ස වා පරිබ්බාජකස්ස වා පරිබ්බාජිකාය වා සමණචීවරං දදෙය්‍ය, පාචිත්තිය’’න්ති.

918. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

අගාරිකො නාම යො කොචි අගාරං අජ්ඣාවසති.

පරිබ්බාජකො නාම භික්ඛුඤ්ච සාමණෙරඤ්ච ඨපෙත්වා යො කොචි පරිබ්බාජකසමාපන්නො.

පරිබ්බාජිකා නාම භික්ඛුනිඤ්ච සික්ඛමානඤ්ච සාමණෙරිඤ්ච ඨපෙත්වා යා කාචි පරිබ්බාජිකසමාපන්නා.

සමණචීවරං නාම කප්පකතං වුච්චති. දෙති, ආපත්ති පාචිත්තියස්ස.

919. අනාපත්ති මාතාපිතූනං දෙති, තාවකාලිකං දෙති, උම්මත්තිකාය, ආදිකම්මිකායාති.

අට්ඨමසික්ඛාපදං නිට්ඨිතං.

9. නවමසික්ඛාපදං

920. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ථුල්ලනන්දාය භික්ඛුනියා උපට්ඨාකකුලං ථුල්ලනන්දං භික්ඛුනිං එතදවොච – ‘‘සචෙ මයං, අය්‍යෙ, සක්කොම, භික්ඛුනිසඞ්ඝස්ස චීවරං දස්සාමා’’ති. තෙන ඛො පන සමයෙන වස්සංවුට්ඨා භික්ඛුනියො චීවරං භාජෙතුකාමා සන්නිපතිංසු. ථුල්ලනන්දා භික්ඛුනී තා භික්ඛුනියො එතදවොච – ‘‘ආගමෙථ, අය්‍යෙ, අත්ථි භික්ඛුනිසඞ්ඝස්ස චීවරපච්චාසා’’ති. භික්ඛුනියො ථුල්ලනන්දං භික්ඛුනිං එතදවොචුං – ‘‘ගච්ඡාය්‍යෙ, තං චීවරං ජානාහී’’ති. ථුල්ලනන්දා භික්ඛුනී යෙන තං කුලං තෙනුපසඞ්කමි; උපසඞ්කමිත්වා තෙ මනුස්සෙ එතදවොච – ‘‘දෙථාවුසො, භික්ඛුනිසඞ්ඝස්ස චීවර’’න්ති. ‘‘න මයං, අය්‍යෙ, සක්කොම භික්ඛුනිසඞ්ඝස්ස චීවරං දාතු’’න්ති. ථුල්ලනන්දා භික්ඛුනී භික්ඛුනීනං එතමත්ථං ආරොචෙසි. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා දුබ්බලචීවරපච්චාසාය චීවරකාලසමයං අතික්කාමෙස්සතී’’ති…පෙ… සච්චං කිර, භික්ඛවෙ, ථුල්ලනන්දා භික්ඛුනී දුබ්බලචීවරපච්චාසාය චීවරකාලසමයං අතික්කාමෙතීති [අතික්කාමෙසීති (ක.)]? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී දුබ්බලචීවරපච්චාසාය චීවරකාලසමයං අතික්කාමෙස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

921. ‘‘යා පන භික්ඛුනී දුබ්බලචීවරපච්චාසාය චීවරකාලසමයං අතික්කාමෙය්‍ය, පාචිත්තිය’’න්ති.

922. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

දුබ්බලචීවරපච්චාසා නාම ‘‘සචෙ මයං සක්කොම, දස්සාම කරිස්සාමා’’ති වාචා භින්නා හොති.

චීවරකාලසමයො නාම අනත්ථතෙ කථිනෙ වස්සානස්ස පච්ඡිමො මාසො, අත්ථතෙ කථිනෙ පඤ්ච මාසා.

චීවරකාලසමයං අතික්කාමෙය්‍යාති අනත්ථතෙ කථිනෙ වස්සානස්ස පච්ඡිමං දිවසං අතික්කාමෙති, ආපත්ති පාචිත්තියස්ස. අත්ථතෙ කථිනෙ කථිනුද්ධාරදිවසං අතික්කාමෙති, ආපත්ති පාචිත්තියස්ස.

923. දුබ්බලචීවරෙ දුබ්බලචීවරසඤ්ඤා චීවරකාලසමයං අතික්කාමෙති, ආපත්ති පාචිත්තියස්ස. දුබ්බලචීවරෙ වෙමතිකා චීවරකාලසමයං අතික්කාමෙති, ආපත්ති දුක්කටස්ස. දුබ්බලචීවරෙ අදුබ්බලචීවරසඤ්ඤා චීවරකාලසමයං අතික්කාමෙති, අනාපත්ති.

අදුබ්බලචීවරෙ දුබ්බලචීවරසඤ්ඤා, ආපත්ති දුක්කටස්ස. අදුබ්බලචීවරෙ වෙමතිකා, ආපත්ති දුක්කටස්ස. අදුබ්බලචීවරෙ අදුබ්බලචීවරසඤ්ඤා, අනාපත්ති.

924. අනාපත්ති ආනිසංසං දස්සෙත්වා නිවාරෙති, උම්මත්තිකාය, ආදිකම්මිකායාති.

නවමසික්ඛාපදං නිට්ඨිතං.

10. දසමසික්ඛාපදං

925. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරෙන උපාසකෙන සඞ්ඝං උද්දිස්ස විහාරො කාරාපිතො හොති. සො තස්ස විහාරස්ස මහෙ උභතොසඞ්ඝස්ස අකාලචීවරං දාතුකාමො හොති. තෙන ඛො පන සමයෙන උභතොසඞ්ඝස්ස කථිනං අත්ථතං හොති. අථ ඛො සො උපාසකො සඞ්ඝං උපසඞ්කමිත්වා කථිනුද්ධාරං යාචි. භගවතො එතමත්ථං ආරොචෙසුං. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘අනුජානාමි, භික්ඛවෙ, කථිනං උද්ධරිතුං. එවඤ්ච පන භික්ඛවෙ කථිනං උද්ධරිතබ්බං. බ්‍යත්තෙන භික්ඛුනා පටිබලෙන සඞ්ඝො ඤාපෙතබ්බො –

926. ‘‘සුණාතු මෙ, භන්තෙ, සඞ්ඝො. යදි සඞ්ඝස්ස පත්තකල්ලං, සඞ්ඝො කථිනං උද්ධරෙය්‍ය. එසා ඤත්ති.

‘‘සුණාතු මෙ, භන්තෙ, සඞ්ඝො. සඞ්ඝො කථිනං උද්ධරති. යස්සායස්මතො ඛමති කථිනස්ස උද්ධාරො, සො තුණ්හස්ස; යස්ස නක්ඛමති, සො භාසෙය්‍ය.

‘‘උබ්භතං සඞ්ඝෙන කථිනං, ඛමති සඞ්ඝස්ස, තස්මා තුණ්හී, එවමෙතං ධාරයාමී’’ති.

927. අථ ඛො සො උපාසකො භික්ඛුනිසඞ්ඝං උපසඞ්කමිත්වා කථිනුද්ධාරං යාචි. ථුල්ලනන්දා භික්ඛුනී – ‘‘චීවරං අම්හාකං භවිස්සතී’’ති කථිනුද්ධාරං පටිබාහි. අථ ඛො සො උපාසකො උජ්ඣායති ඛිය්‍යති විපාචෙති – ‘‘කථඤ්හි නාම භික්ඛුනියො අම්හාකං කථිනුද්ධාරං න දස්සන්තී’’ති! අස්සොසුං ඛො භික්ඛුනියො තස්ස උපාසකස්ස උජ්ඣායන්තස්ස ඛිය්‍යන්තස්ස විපාචෙන්තස්ස. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා ධම්මිකං කථිනුද්ධාරං පටිබාහිස්සතී’’ති…පෙ… සච්චං කිර, භික්ඛවෙ, ථුල්ලනන්දා භික්ඛුනී ධම්මිකං කථිනුද්ධාරං පටිබාහතීති [පටිබාහීති (ක.)]? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී ධම්මිකං කථිනුද්ධාරං පටිබාහිස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –

928. ‘‘යා පන භික්ඛුනී ධම්මිකං කථිනුද්ධාරං පටිබාහෙය්‍ය, පාචිත්තිය’’න්ති.

929. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.

ධම්මිකො නාම කථිනුද්ධාරො සමග්ගො භික්ඛුනිසඞ්ඝො සන්නිපතිත්වා උද්ධරති.

පටිබාහෙය්‍යාති ‘‘කථං ඉදං කථිනං න උද්ධරෙය්‍යා’’ති [කථිනං උද්ධරෙය්‍යාති (ක.)] පටිබාහති, ආපත්ති පාචිත්තියස්ස.

930. ධම්මිකෙ ධම්මිකසඤ්ඤා පටිබාහති, ආපත්ති පාචිත්තියස්ස. ධම්මිකෙ වෙමතිකා පටිබාහති, ආපත්ති දුක්කටස්ස. ධම්මිකෙ අධම්මිකසඤ්ඤා පටිබාහති, අනාපත්ති. අධම්මිකෙ ධම්මිකසඤ්ඤා, ආපත්ති දුක්කටස්ස. අධම්මිකෙ වෙමතිකා, ආපත්ති දුක්කටස්ස. අධම්මිකෙ අධම්මිකසඤ්ඤා, අනාපත්ති.

931. අනාපත්ති අනිසංසං දස්සෙත්වා පටිබාහති, උම්මත්තිකාය, ආදිකම්මිකායාති.

දසමසික්ඛාපදං නිට්ඨිතං.

නග්ගවග්ගො තතියො.