8. අට්ඨමසික්ඛාපදං
824. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරො බ්‍රාහ්මණො නිබ්බිට්ඨරාජභටො ‘‘තඤ්ඤෙව භටපථං යාචිස්සාමී’’ති සීසං නහායිත්වා භික්ඛුනුපස්සයං නිස්සාය රාජකුලං ගච්ඡති. අඤ්ඤතරා භික්ඛුනී කටාහෙ වච්චං කත්වා තිරොකුට්ටෙ ඡඩ්ඩෙන්තී තස්ස බ්‍රාහ්මණස්ස මත්ථකෙ ආසුම්භි. අථ ඛො සො බ්‍රාහ්මණො උජ්ඣායති ඛිය්‍යති විපාචෙති – ‘‘අස්සමණියො ඉමා මුණ්ඩා බන්ධකිනියො. කථඤ්හි නාම ගූථකටාහං මත්ථකෙ ආසුම්භිස්සන්ති! ඉමාසං උපස්සයං ඣාපෙස්සාමී’’ති! උම්මුකං ගහෙත්වා උපස්සයං පවිසති. අඤ්ඤතරො උපාසකො උපස්සයා නික්ඛමන්තො අද්දස තං බ්‍රාහ්මණං උම්මුකං ගහෙත්වා උපස්සයං පවිසන්තං. දිස්වාන තං බ්‍රාහ්මණං එතදවොච – ‘‘කිස්ස ත්වං, භො, උම්මුකං ගහෙත්වා උපස්සයං පවිසසී’’ති? ‘‘ඉමා මං, භො, මුණ්ඩා බන්ධකිනියො ගූථකටාහං මත්ථකෙ ආසුම්භිංසු. ඉමාසං උපස්සයං ඣාපෙස්සාමී’’ති. ‘‘ගච්ඡ, භො බ්‍රාහ්මණ, මඞ්ගලං එතං. සහස්සං ලච්ඡසි තඤ්ච භටපථ’’න්ති. අථ ඛො සො බ්‍රාහ්මණො සීසං නහායිත්වා රාජකුලං ගන්ත්වා සහස්සං අලත්ථ තඤ්ච භටපථං. අථ ඛො සො උපාසකො උපස්සයං පවිසිත්වා භික්ඛුනීනං එතමත්ථං ආරොචෙත්වා පරිභාසි. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛුනියො උච්චාරං තිරොකුට්ටෙ ඡඩ්ඩෙස්සන්තී’’ති…පෙ… සච්චං කිර, භික්ඛවෙ, භික්ඛුනියො උච්චාරං තිරොකුට්ටෙ ඡඩ්ඩෙන්තීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, භික්ඛුනියො උච්චාරං තිරොකුට්ටෙ ඡඩ්ඩෙස්සන්ති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –
825. ‘‘යා පන භික්ඛුනී උච්චාරං වා පස්සාවං වා සඞ්කාරං වා විඝාසං වා තිරොකුට්ටෙ වා තිරොපාකාරෙ වා ඡඩ්ඩෙය්‍ය වා ඡඩ්ඩාපෙය්‍ය වා, පාචිත්තිය’’න්ති.
826. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.
උච්චාරො නාම ගූථො වුච්චති. පස්සාවො නාම මුත්තං වුච්චති.
සඞ්කාරං නාම කචවරං වුච්චති.
විඝාසං නාම චලකානි වා අට්ඨිකානි වා උච්ඡිට්ඨොදකං වා.
කුට්ටො නාම තයො කුට්ටා – ඉට්ඨකාකුට්ටො, සිලාකුට්ටො, දාරුකුට්ටො.
පාකාරො නාම තයො පාකාරා – ඉට්ඨකාපාකාරො, සිලාපාකාරො, දාරුපාකාරො.
තිරොකුට්ටෙති කුට්ටස්ස පරතො. තිරොපාකාරෙති පාකාරස්ස පරතො.
ඡඩ්ඩෙය්‍යාති සයං ඡඩ්ඩෙති, ආපත්ති පාචිත්තියස්ස.
ඡඩ්ඩාපෙය්‍යාති අඤ්ඤං ආණාපෙති, ආපත්ති දුක්කටස්ස. සකිං ආණත්තා බහුකම්පි ඡඩ්ඩෙති, ආපත්ති පාචිත්තියස්ස.
827. අනාපත්ති ඔලොකෙත්වා ඡඩ්ඩෙති, අවළඤ්ජෙ ඡඩ්ඩෙති, උම්මත්තිකාය, ආදිකම්මිකායාති.
අට්ඨමසික්ඛාපදං නිට්ඨිතං.