2. දුතියසඞ්ඝාදිසෙසසික්ඛාපදං
682. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන වෙසාලියං අඤ්ඤතරස්ස ලිච්ඡවිස්ස පජාපති අතිචාරිනී හොති. අථ ඛො සො ලිච්ඡවි තං ඉත්ථිං එතදවොච – ‘‘සාධු විරමාහි, අනත්ථං ඛො තෙ කරිස්සාමී’’ති. එවම්පි සා වුච්චමානා නාදියි. තෙන ඛො පන සමයෙන වෙසාලියං ලිච්ඡවිගණො සන්නිපතිතො හොති කෙනචිදෙව කරණීයෙන. අථ ඛො සො ලිච්ඡවි තෙ ලිච්ඡවයො එතදවොච – ‘‘එකං මෙ, අය්‍යො, ඉත්ථිං අනුජානාථා’’ති. ‘‘කා නාම සා’’ති? ‘‘මය්හං පජාපති අතිචරති, තං ඝාතෙස්සාමී’’ති. ‘‘ජානාහී’’ති. අස්සොසි ඛො සා ඉත්ථී – ‘‘සාමිකො කිර මං ඝාතෙතුකාමො’’ති. වරභණ්ඩං ආදාය සාවත්ථිං ගන්ත්වා තිත්ථියෙ උපසඞ්කමිත්වා පබ්බජ්ජං යාචි. තිත්ථියා න ඉච්ඡිංසු පබ්බාජෙතුං. භික්ඛුනියො උපසඞ්කමිත්වා පබ්බජ්ජං යාචි. භික්ඛුනියොපි න ඉච්ඡිංසු පබ්බාජෙතුං. ථුල්ලනන්දං භික්ඛුනිං උපසඞ්කමිත්වා භණ්ඩකං දස්සෙත්වා පබ්බජ්ජං යාචි. ථුල්ලනන්දා භික්ඛුනී භණ්ඩකං ගහෙත්වා පබ්බාජෙසි.
අථ ඛො සො ලිච්ඡවි තං ඉත්ථිං ගවෙසන්තො සාවත්ථිං ගන්ත්වා භික්ඛුනීසු පබ්බජිතං දිස්වාන යෙන රාජා පසෙනදි කොසලො තෙනුපසඞ්කමි; උපසඞ්කමිත්වා රාජානං පසෙනදිං කොසලං එතදවොච – ‘‘පජාපති මෙ, දෙව, වරභණ්ඩං ආදාය සාවත්ථිං අනුප්පත්තා. තං දෙවො අනුජානාතූ’’ති. ‘‘තෙන හි, භණෙ, විචිනිත්වා ආචික්ඛා’’ති. ‘‘දිට්ඨා, දෙව, භික්ඛුනීසු පබ්බජිතා’’ති. ‘‘සචෙ, භණෙ, භික්ඛුනීසු පබ්බජිතා, න සා ලබ්භා කිඤ්චි කාතුං. ස්වාක්ඛාතො භගවතා ධම්මො, චරතු බ්‍රහ්මචරියං සම්මා දුක්ඛස්ස අන්තකිරියායා’’ති. අථ ඛො සො ලිච්ඡවි උජ්ඣායති ඛිය්‍යති විපාචෙති – ‘‘කථඤ්හි නාම භික්ඛුනියො චොරිං පබ්බාජෙස්සන්තී’’ති! අස්සොසුං ඛො භික්ඛුනියො තස්ස ලිච්ඡවිස්ස උජ්ඣායන්තස්ස ඛිය්‍යන්තස්ස විපාචෙන්තස්ස. යා තා භික්ඛුනියො අප්පිච්ඡා…පෙ… තා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම අය්‍යා ථුල්ලනන්දා චොරිං පබ්බාජෙස්සතී’’ති! අථ ඛො තා භික්ඛුනියො භික්ඛූනං එතමත්ථං ආරොචෙසුං…පෙ… සච්චං කිර, භික්ඛවෙ, ථුල්ලනන්දා භික්ඛුනී චොරිං පබ්බාජෙතීති [පබ්බාජෙසීති (ක.)]? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම, භික්ඛවෙ, ථුල්ලනන්දා භික්ඛුනී චොරිං පබ්බාජෙස්සති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, භික්ඛුනියො ඉමං සික්ඛාපදං උද්දිසන්තු –
683. ‘‘යා පන භික්ඛුනී ජානං චොරිං වජ්ඣං විදිතං අනපලොකෙත්වා රාජානං වා සඞ්ඝං වා ගණං වා පූගං වා සෙණිං වා අඤ්ඤත්‍ර කප්පා වුට්ඨාපෙය්‍ය, අයම්පි භික්ඛුනී පඨමාපත්තිකං ධම්මං ආපන්නා නිස්සාරණීයං සඞ්ඝාදිසෙස’’න්ති.
684. යා පනාති යා යාදිසා…පෙ… භික්ඛුනීති…පෙ… අයං ඉමස්මිං අත්ථෙ අධිප්පෙතා භික්ඛුනීති.
ජානාති නාම සාමං වා ජානාති අඤ්ඤෙ වා තස්සා ආරොචෙන්ති, සා වා ආරොචෙති.
චොරී නාම යා පඤ්චමාසකං වා අතිරෙකපඤ්චමාසකං වා අග්ඝනකං අදින්නං ථෙය්‍යසඞ්ඛාතං ආදියති, එසා චොරී නාම.
වජ්ඣා නාම යං කත්වා වජ්ඣප්පත්තා හොති.
විදිතා නාම අඤ්ඤෙහි මනුස්සෙහි ඤාතා හොති ‘‘වජ්ඣා එසා’’ති.
අනපලොකෙත්වාති අනාපුච්ඡා.
රාජා නාම යත්ථ රාජා අනුසාසති, රාජා අපලොකෙතබ්බො.
සඞ්ඝො නාම භික්ඛුනිසඞ්ඝො වුච්චති, භික්ඛුනිසඞ්ඝො අපලොකෙතබ්බො.
ගණො නාම යත්ථ ගණො අනුසාසති, ගණො අපලොකෙතබ්බො.
පූගො නාම යත්ථ පූගො අනුසාසති, පූගො අපලොකෙතබ්බො.
සෙණි නාම යත්ථ සෙණි අනුසාසති, සෙණි අපලොකෙතබ්බො.
අඤ්ඤත්‍ර කප්පාති ඨපෙත්වා කප්පං. කප්පං නාම ද්වෙ කප්පානි – තිත්ථියෙසු වා පබ්බජිතා හොති අඤ්ඤාසු වා භික්ඛුනීසු පබ්බජිතා. අඤ්ඤත්‍ර කප්පා ‘‘වුට්ඨාපෙස්සාමී’’ති ගණං වා ආචරිනිං වා පත්තං වා චීවරං වා පරියෙසති, සීමං වා සම්මන්නති, ආපත්ති දුක්කටස්ස. ඤත්තියා දුක්කටං. ද්වීහි කම්මවාචාහි ථුල්ලච්චයා. කම්මවාචාපරියොසානෙ උපජ්ඣායාය ආපත්ති සඞ්ඝාදිසෙසස්ස. ගණස්ස ච ආචරිනියා ච ආපත්ති දුක්කටස්ස.
අයම්පීති පුරිමං උපාදාය වුච්චති.
පඨමාපත්තිකන්ති සහ වත්ථුජ්ඣාචාරා ආපජ්ජති අසමනුභාසනාය.
නිස්සාරණීයන්ති සඞ්ඝම්හා නිස්සාරීයති.
සඞ්ඝාදිසෙසන්ති…පෙ… තෙනපි වුච්චති සඞ්ඝාදිසෙසොති.
685. චොරියා චොරිසඤ්ඤා අඤ්ඤත්‍ර කප්පා වුට්ඨාපෙති, ආපත්ති සඞ්ඝාදිසෙසස්ස. චොරියා වෙමතිකා අඤ්ඤත්‍ර කප්පා වුට්ඨාපෙති, ආපත්ති දුක්කටස්ස. චොරියා අචොරිසඤ්ඤා අඤ්ඤත්‍ර කප්පා වුට්ඨාපෙති, අනාපත්ති. අචොරියා චොරිසඤ්ඤා, ආපත්ති දුක්කටස්ස. අචොරියා වෙමතිකා, ආපත්ති දුක්කටස්ස. අචොරියා අචොරිසඤ්ඤා, අනාපත්ති.
686. අනාපත්ති අජානන්තී වුට්ඨාපෙති, අපලොකෙත්වා වුට්ඨාපෙති, කප්පකතං වුට්ඨාපෙති, උම්මත්තිකාය, ආදිකම්මිකායාති.
දුතියසඞ්ඝාදිසෙසසික්ඛාපදං නිට්ඨිතං.