10. චීවරඅපනිධානසික්ඛාපදං

377. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන සත්තරසවග්ගියා භික්ඛූ අසන්නිහිතපරික්ඛාරා හොන්ති. ඡබ්බග්ගියා භික්ඛූ සත්තරසවග්ගියානං භික්ඛූනං පත්තම්පි චීවරම්පි අපනිධෙන්ති. සත්තරසවග්ගියා භික්ඛූ ඡබ්බග්ගියෙ භික්ඛූ එතදවොචුං – ‘‘දෙථාවුසො, අම්හාකං පත්තම්පි චීවරම්පී’’ති. ඡබ්බග්ගියා භික්ඛූ හසන්ති, තෙ රොදන්ති. භික්ඛූ එවමාහංසු – ‘‘කිස්ස තුම්හෙ, ආවුසො, රොදථා’’ති? ‘‘ඉමෙ, ආවුසො, ඡබ්බග්ගියා භික්ඛූ අම්හාකං පත්තම්පි චීවරම්පි අපනිධෙන්තී’’ති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ භික්ඛූනං පත්තම්පි චීවරම්පි අපනිධෙස්සන්තී’’ති…පෙ… සච්චං කිර තුම්හෙ, භික්ඛවෙ, භික්ඛූනං පත්තම්පි චීවරම්පි අපනිධෙථාති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම තුම්හෙ, මොඝපුරිසා, භික්ඛූනං පත්තම්පි චීවරම්පි අපනිධෙස්සථ! නෙතං, මොඝපුරිසා, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –

378. ‘‘යො පන භික්ඛු භික්ඛුස්ස පත්තං වා චීවරං වා නිසීදනං වා සූචිඝරං වා කායබන්ධනං වා අපනිධෙය්‍ය වා අපනිධාපෙය්‍ය වා, අන්තමසො හසාපෙක්ඛොපි, පාචිත්තිය’’න්ති.

379. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.

භික්ඛුස්සාති අඤ්ඤස්ස භික්ඛුස්ස.

පත්තො නාම ද්වෙ පත්තා – අයොපත්තො, මත්තිකාපත්තො.

චීවරං නාම ඡන්නං චීවරානං අඤ්ඤතරං චීවරං, විකප්පනුපගං පච්ඡිමං.

නිසීදනං නාම සදසං වුච්චති.

සූචිඝරං නාම සසූචිකං වා අසූචිකං වා.

කායබන්ධනං නාම ද්වෙ කායබන්ධනානි – පට්ටිකා, සූකරන්තකං.

අපනිධෙය්‍ය වාති සයං අපනිධෙති, ආපත්ති පාචිත්තියස්ස.

අපනිධාපෙය්‍ය වාති අඤ්ඤං ආණාපෙසි, ආපත්ති පාචිත්තියස්ස. අපනිධාපෙය්‍ය වා ති අය්‍යං ආණාපෙති, ආපත්ති පාචිත්තියස්ස. සකිං ආණත්තො බහුකම්පි අපනිධෙති, ආපත්ති පාචිත්තියස්ස.

අන්තමසො හසාපෙක්ඛොපීති කීළාධිප්පායො.

380. උපසම්පන්නෙ උපසම්පන්නසඤ්ඤී පත්තං වා චීවරං වා නිසීදනං වා සූචිඝරං වා කායබන්ධනං වා අපනිධෙති වා අපනිධාපෙති වා, අන්තමසො හසාපෙක්ඛොපි, ආපත්ති පාචිත්තියස්ස. උපසම්පන්නෙ වෙමතිකො…පෙ… උපසම්පන්නෙ අනුපසම්පන්නසඤ්ඤී පත්තං වා චීවරං වා නිසීදනං වා සූචිඝරං වා කායබන්ධනං වා අපනිධෙති වා අපනිධාපෙති වා, අන්තමසො හසාපෙක්ඛොපි, ආපත්ති පාචිත්තියස්ස.

අඤ්ඤං පරික්ඛාරං අපනිධෙති වා අපනිධාපෙති වා, අන්තමසො හසාපෙක්ඛොපි, ආපත්ති දුක්කටස්ස. අනුපසම්පන්නස්ස පත්තං වා චීවරං වා අඤ්ඤං වා පරික්ඛාරං අපනිධෙති වා අපනිධාපෙති වා, අන්තමසො හසාපෙක්ඛොපි, ආපත්ති දුක්කටස්ස. අනුපසම්පන්නෙ උපසම්පන්නසඤ්ඤී, ආපත්ති දුක්කටස්ස. අනුපසම්පන්නෙ වෙමතිකො, ආපත්ති දුක්කටස්ස. අනුපසම්පන්නෙ අනුපසම්පන්නසඤ්ඤී, ආපත්ති දුක්කටස්ස.

381. අනාපත්ති නහසාධිප්පායො, දුන්නික්ඛිත්තං පටිසාමෙති, ‘‘ධම්මිං කථං කත්වා දස්සාමී’’ති පටිසාමෙති, උම්මත්තකස්ස, ආදිකම්මිකස්සාති.

චීවරඅපනිධානසික්ඛාපදං නිට්ඨිතං දසමං.

සුරාපානවග්ගො ඡට්ඨො.

තස්සුද්දානං –

සුරා අඞ්ගුලි හාසො ච [තොයඤ්ච (ඉතිපි)], අනාදරියඤ්ච භිංසනං;

ජොතිනහානදුබ්බණ්ණං, සාමං අපනිධෙන චාති.