7. මහානාමසික්ඛාපදං

303. තෙන සමයෙන බුද්ධො භගවා සක්කෙසු විහරති කපිලවත්ථුස්මිං නිග්‍රොධාරාමෙ. තෙන ඛො පන සමයෙන මහානාමස්ස සක්කස්ස භෙසජ්ජං උස්සන්නං හොති. අථ ඛො මහානාමො සක්කො යෙන භගවා තෙනුපසඞ්කමි; උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො මහානාමො සක්කො භගවන්තං එතදවොච – ‘‘ඉච්ඡාමහං, භන්තෙ, සඞ්ඝං චතුමාසං [චතුම්මාසං (සී.) චාතුමාසං (ස්‍යා.)] භෙසජ්ජෙන පවාරෙතු’’න්ති. ‘‘සාධු සාධු, මහානාම! තෙන හි ත්වං, මහානාම, සඞ්ඝං චතුමාසං භෙසජ්ජෙන පවාරෙහී’’ති. භික්ඛූ කුක්කුච්චායන්තා නාධිවාසෙන්ති. භගවතො එතමත්ථං ආරොචෙසුං…පෙ… අනුජානාමි, භික්ඛවෙ, චතුමාසං භෙසජ්ජප්පච්චයපවාරණං සාදිතුන්ති.

304. තෙන ඛො පන සමයෙන භික්ඛූ මහානාමං සක්කං පරිත්තං භෙසජ්ජං විඤ්ඤාපෙන්ති. තථෙව මහානාමස්ස සක්කස්ස භෙසජ්ජං උස්සන්නං හොති. දුතියම්පි ඛො මහානාමො සක්කො යෙන භගවා තෙනුපසඞ්කමි; උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො මහානාමො සක්කො භගවන්තං එතදවොච – ‘‘ඉච්ඡාමහං, භන්තෙ, සඞ්ඝං අපරම්පි චතුමාසං භෙසජ්ජෙන පවාරෙතු’’න්ති. ‘‘සාධු සාධු, මහානාම! තෙන හි ත්වං, මහානාම, සඞ්ඝං අපරම්පි චතුමාසං භෙසජ්ජෙන පවාරෙහී’’ති. භික්ඛූ කුක්කුච්චායන්තා නාධිවාසෙන්ති. භගවතො එතමත්ථං ආරොචෙසුං…පෙ… අනුජානාමි, භික්ඛවෙ, පුන පවාරණම්පි සාදිතුන්ති.

305. තෙන ඛො පන සමයෙන භික්ඛූ මහානාමං සක්කං පරිත්තංයෙව භෙසජ්ජං විඤ්ඤාපෙන්ති. තථෙව මහානාමස්ස සක්කස්ස භෙසජ්ජං උස්සන්නං හොති. තතියම්පි ඛො මහානාමො සක්කො යෙන භගවා තෙනුපසඞ්කමි; උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො මහානාමො සක්කො භගවන්තං එතදවොච – ‘‘ඉච්ඡාමහං, භන්තෙ, සඞ්ඝං යාවජීවං භෙසජ්ජෙන පවාරෙතු’’න්ති. ‘‘සාධු සාධු, මහානාම! තෙන හි ත්වං, මහානාම, සඞ්ඝං යාවජීවං භෙසජ්ජෙන පවාරෙහී’’ති. භික්ඛූ කුක්කුච්චායන්තා නාධිවාසෙන්ති. භගවතො එතමත්ථං ආරොචෙසුං…පෙ… අනුජානාමි, භික්ඛවෙ, නිච්චපවාරණම්පි සාදිතුන්ති.

තෙන ඛො පන සමයෙන ඡබ්බග්ගියා භික්ඛූ දුන්නිවත්ථා හොන්ති දුප්පාරුතා අනාකප්පසම්පන්නා. මහානාමො සක්කො වත්තා හොති – ‘‘කිස්ස තුම්හෙ, භන්තෙ, දුන්නිවත්ථා දුප්පාරුතා අනාකප්පසම්පන්නා? නනු නාම පබ්බජිතෙන සුනිවත්ථෙන භවිතබ්බං සුපාරුතෙන ආකප්පසම්පන්නෙනා’’ති? ඡබ්බග්ගියා භික්ඛූ මහානාමෙ සක්කෙ උපනන්ධිංසු. අථ ඛො ඡබ්බග්ගියානං භික්ඛූනං එතදහොසි – ‘‘කෙන නු ඛො මයං උපායෙන මහානාමං සක්කං මඞ්කු කරෙය්‍යාමා’’ති? අථ ඛො ඡබ්බග්ගියානං භික්ඛූනං එතදහොසි – ‘‘මහානාමෙන ඛො, ආවුසො, සක්කෙන සඞ්ඝො භෙසජ්ජෙන පවාරිතො. හන්ද මයං, ආවුසො, මහානාමං සක්කං සප්පිං විඤ්ඤාපෙමා’’ති. අථ ඛො ඡබ්බග්ගියා භික්ඛූ යෙන මහානාමො සක්කො තෙනුපසඞ්කමිංසු; උපසඞ්කමිත්වා මහානාමං සක්කං එතදවොචුං – ‘‘දොණෙන, ආවුසො, සප්පිනා අත්ථො’’ති. ‘‘අජ්ජණ්හො, භන්තෙ, ආගමෙථ. මනුස්සා වජං ගතා සප්පිං ආහරිතුං. කාලං ආහරිස්සථා’’ති [කාලෙ හරිස්සථාති (ස්‍යා.)].

දුතියම්පි ඛො…පෙ… තතියම්පි ඛො ඡබ්බග්ගියා භික්ඛූ මහානාමං සක්කං එතදවොචුං – ‘‘දොණෙන, ආවුසො, සප්පිනා අත්ථො’’ති. ‘‘අජ්ජණ්හො, භන්තෙ, ආගමෙථ. මනුස්සා වජං ගතා සප්පිං ආහරිතුං. කාලං ආහරිස්සථා’’ති. ‘‘කිං පන තයා, ආවුසො, අදාතුකාමෙන පවාරිතෙන, යං ත්වං පවාරෙත්වා න දෙසී’’ති! අථ ඛො මහානාමො සක්කො උජ්ඣායති ඛිය්‍යති විපාචෙති – ‘‘කථඤ්හි නාම භදන්තා – ‘අජ්ජණ්හො, භන්තෙ, ආගමෙථා’ති වුච්චමානා නාගමෙස්සන්තී’’ති! අස්සොසුං ඛො භික්ඛූ මහානාමස්ස සක්කස්ස උජ්ඣායන්තස්ස ඛිය්‍යන්තස්ස විපාචෙන්තස්ස. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ මහානාමෙන සක්කෙන – ‘අජ්ජණ්හො, භන්තෙ, ආගමෙථා’ති වුච්චමානා නාගමෙස්සන්තී’’ති…පෙ… සච්චං කිර තුම්හෙ, භික්ඛවෙ, මහානාමෙන සක්කෙන – ‘‘අජ්ජණ්හො, භන්තෙ, ආගමෙථා’’ති වුච්චමානා නාගමෙථාති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම තුම්හෙ, මොඝපුරිසා, මහානාමෙන සක්කෙන – ‘‘අජ්ජණ්හො, භන්තෙ ආගමෙථා’’ති වුච්චමානා නාගමෙස්සථ! නෙතං, මොඝපුරිසා, අප්පසන්නානං වා පසාදාය…පෙ… එවඤ්ච පන, භික්ඛවෙ ඉමං සික්ඛාපදං උද්දිසෙය්‍යාථ –

306. ‘‘අගිලානෙන භික්ඛුනා චතුමාසප්පච්චයපවාරණා සාදිතබ්බා, අඤ්ඤත්‍ර පුනපවාරණාය, අඤ්ඤත්‍ර නිච්චපවාරණාය; තතො චෙ උත්තරි සාදියෙය්‍ය, පාචිත්තිය’’න්ති.

307. අගිලානෙන භික්ඛුනා චතුමාසප්පච්චයපවාරණා සාදිතබ්බාති ගිලානප්පච්චයපවාරණා සාදිතබ්බා.

පුනපවාරණාපි සාදිතබ්බාති යදා ගිලානො භවිස්සාමි තදා විඤ්ඤාපෙස්සාමීති.

නිච්චපවාරණාපි සාදිතබ්බාති යදා ගිලානො භවිස්සාමි තදා විඤ්ඤාපෙස්සාමීති.

තතො චෙ උත්තරි සාදියෙය්‍යාති අත්ථි පවාරණා භෙසජ්ජපරියන්තා න රත්තිපරියන්තා, අත්ථි පවාරණා රත්තිපරියන්තා න භෙසජ්ජපරියන්තා, අත්ථි පවාරණා භෙසජ්ජපරියන්තා ච රත්තිපරියන්තා ච, අත්ථි පවාරණා නෙව භෙසජ්ජපරියන්තා න රත්තිපරියන්තා.

භෙසජ්ජපරියන්තා නාම භෙසජ්ජානි පරිග්ගහිතානි හොන්ති – ‘‘එත්තකෙහි භෙසජ්ජෙහි පවාරෙමී’’ති. රත්තිපරියන්තා නාම රත්තියො පරිග්ගහිතායො හොන්ති – ‘‘එත්තකාසු රත්තීසු පවාරෙමී’’ති. භෙසජ්ජපරියන්තා ච රත්තිපරියන්තා ච නාම භෙසජ්ජානි ච පරිග්ගහිතානි හොන්ති රත්තියො ච පරිග්ගහිතායො හොන්ති – ‘‘එත්තකෙහි භෙසජ්ජෙහි එත්තකාසු රත්තීසු පවාරෙමී’’ති. නෙව භෙසජ්ජපරියන්තා න රත්තිපරියන්තා නාම භෙසජ්ජානි ච අපරිග්ගහිතානි හොන්ති රත්තියො ච අපරිග්ගහිතායො හොන්ති.

308. භෙසජ්ජපරියන්තෙ – යෙහි භෙසජ්ජෙහි පවාරිතො හොති තානි භෙසජ්ජානි ඨපෙත්වා අඤ්ඤානි භෙසජ්ජානි විඤ්ඤාපෙති, ආපත්ති පාචිත්තියස්ස. රත්තිපරියන්තෙ – යාසු රත්තීසු පවාරිතො හොති, තා රත්තියො ඨපෙත්වා අඤ්ඤාසු රත්තීසු විඤ්ඤාපෙති, ආපත්ති පාචිත්තියස්ස. භෙසජ්ජපරියන්තෙ ච රත්තිපරියන්තෙ ච – යෙහි භෙසජ්ජෙහි පවාරිතො හොති, තානි භෙසජ්ජානි ඨපෙත්වා යාසු රත්තීසු පවාරිතො හොති, තා රත්තියො ඨපෙත්වා අඤ්ඤානි භෙසජ්ජානි අඤ්ඤාසු රත්තීසු විඤ්ඤාපෙති, ආපත්ති පාචිත්තියස්ස. නෙව භෙසජ්ජපරියන්තෙ න රත්තිපරියන්තෙ, අනාපත්ති.

309. න භෙසජ්ජෙන කරණීයෙන [කරණීයෙ (සී. ස්‍යා.)] භෙසජ්ජං විඤ්ඤාපෙති, ආපත්ති පාචිත්තියස්ස. අඤ්ඤෙන භෙසජ්ජෙන කරණීයෙන අඤ්ඤං භෙසජ්ජං විඤ්ඤාපෙති, ආපත්ති පාචිත්තියස්ස. තතුත්තරි තතුත්තරිසඤ්ඤී භෙසජ්ජං විඤ්ඤාපෙති, ආපත්ති පාචිත්තියස්ස. තතුත්තරි වෙමතිකො භෙසජ්ජං විඤ්ඤාපෙති, ආපත්ති පාචිත්තියස්ස. තතුත්තරි නතතුත්තරිසඤ්ඤී භෙසජ්ජං විඤ්ඤාපෙති, ආපත්ති පාචිත්තියස්ස.

නතතුත්තරි තතුත්තරිසඤ්ඤී, ආපත්ති දුක්කටස්ස. නතතුත්තරි වෙමතිකො, ආපත්ති දුක්කටස්ස. නතතුත්තරි නතතුත්තරිසඤ්ඤී, අනාපත්ති.

310. අනාපත්ති යෙහි භෙසජ්ජෙහි පවාරිතො හොති තානි භෙසජ්ජානි විඤ්ඤාපෙති, යාසු රත්තීසු පවාරිතො හොති තාසු රත්තීසු විඤ්ඤාපෙති, ‘‘ඉමෙහි තයා භෙසජ්ජෙහි පවාරිතාම්හ, අම්හාකඤ්ච ඉමිනා ච ඉමිනා ච භෙසජ්ජෙන අත්ථො’’ති ආචික්ඛිත්වා විඤ්ඤාපෙති, ‘‘යාසු තයා රත්තීසු පවාරිතාම්හ තායො ච රත්තියො වීතිවත්තා අම්හාකඤ්ච භෙසජ්ජෙන අත්ථො’’ති ආචික්ඛිත්වා විඤ්ඤාපෙති, ඤාතකානං පවාරිතානං, අඤ්ඤස්සත්ථාය, අත්තනො ධනෙන, උම්මත්තකස්ස, ආදිකම්මිකස්සාති.

මහානාමසික්ඛාපදං නිට්ඨිතං සත්තමං.