5. සහසෙය්‍යසික්ඛාපදං
49. තෙන සමයෙන බුද්ධො භගවා ආළවියං විහරති අග්ගාළවෙ චෙතියෙ. තෙන ඛො පන සමයෙන උපාසකා ආරාමං ආගච්ඡන්ති ධම්මස්සවනාය. ධම්මෙ භාසිතෙ ථෙරා භික්ඛූ යථාවිහාරං ගච්ඡන්ති. නවකා භික්ඛූ තත්ථෙව උපට්ඨානසාලායං උපාසකෙහි සද්ධිං මුට්ඨස්සතී, අසම්පජානා, නග්ගා, විකූජමානා, කාකච්ඡමානා සෙය්‍යං කප්පෙන්ති. උපාසකා උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භදන්තා මුට්ඨස්සතී අසම්පජානා නග්ගා විකූජමානා කාකච්ඡමානා සෙය්‍යං කප්පෙස්සන්තී’’ති! අස්සොසුං ඛො භික්ඛූ තෙසං උපාසකානං උජ්ඣායන්තානං ඛිය්‍යන්තානං විපාචෙන්තානං. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම භික්ඛූ අනුපසම්පන්නෙන සහසෙය්‍යං කප්පෙස්සන්තී’’ති! අථ ඛො තෙ භික්ඛූ තෙ නවකෙ භික්ඛූ අනෙකපරියායෙන විගරහිත්වා භගවතො එතමත්ථං ආරොචෙසුං…පෙ… ‘‘සච්චං කිර, භික්ඛවෙ, භික්ඛූ අනුපසම්පන්නෙන සහසෙය්‍යං කප්පෙන්තී’’ති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම තෙ, භික්ඛවෙ, මොඝපුරිසා අනුපසම්පන්නෙන සහසෙය්‍යං කප්පෙස්සන්ති! නෙතං, භික්ඛවෙ, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
‘‘යො පන භික්ඛු අනුපසම්පන්නෙන සහසෙය්‍යං කප්පෙය්‍ය පාචිත්තිය’’න්ති.
එවඤ්චිදං භගවතා භික්ඛූනං සික්ඛාපදං පඤ්ඤත්තං හොති.
50. අථ ඛො භගවා ආළවියං යථාභිරන්තං විහරිත්වා යෙන කොසම්බී තෙන චාරිකං පක්කාමි. අනුපුබ්බෙන චාරිකං චරමානො යෙන කොසම්බී තදවසරි. තත්‍ර සුදං භගවා කොසම්බියං විහරති බදරිකාරාමෙ. භික්ඛූ ආයස්මන්තං රාහුලං එතදවොචුං – ‘‘භගවතා, ආවුසො රාහුල, සික්ඛාපදං පඤ්ඤත්තං – ‘න අනුපසම්පන්නෙන සහසෙය්‍යා කප්පෙතබ්බා’ති. සෙය්‍යං, ආවුසො රාහුල, ජානාහී’’ති. අථ ඛො ආයස්මා රාහුලො සෙය්‍යං අලභමානො වච්චකුටියා සෙය්‍යං කප්පෙසි. අථ ඛො භගවා රත්තියා පච්චූසසමයං පච්චුට්ඨාය යෙන වච්චකුටි තෙනුපසඞ්කමි; උපසඞ්කමිත්වා උක්කාසි. ආයස්මාපි රාහුලො උක්කාසි. ‘‘කො එත්ථා’’ති? ‘‘අහං, භගවා, රාහුලො’’ති. ‘‘කිස්ස ත්වං, රාහුල, ඉධ නිසින්නොසී’’ති? අථ ඛො ආයස්මා රාහුලො භගවතො එතමත්ථං ආරොචෙසි. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘අනුජානාමි, භික්ඛවෙ, අනුපසම්පන්නෙන දිරත්තතිරත්තං සහසෙය්‍යං කප්පෙතුං. එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
51. ‘‘යො පන භික්ඛු අනුපසම්පන්නෙන උත්තරිදිරත්තතිරත්තං සහසෙය්‍යං කප්පෙය්‍ය, පාචිත්තිය’’න්ති.
52. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.
අනුපසම්පන්නො නාම භික්ඛුං ඨපෙත්වා අවසෙසො අනුපසම්පන්නො නාම.
උත්තරිදිරත්තතිරත්තන්ති අතිරෙකදිරත්තතිරත්තං.
සහාති එකතො.
සෙය්‍යා නාම සබ්බච්ඡන්නා, සබ්බපරිච්ඡන්නා, යෙභුය්‍යෙනච්ඡන්නා, යෙභුය්‍යෙන පරිච්ඡන්නා.
සෙය්‍යං කප්පෙය්‍යාති චතුත්ථෙ දිවසෙ අත්ථඞ්ගතෙ සූරියෙ, අනුපසම්පන්නෙ නිපන්නෙ, භික්ඛු නිපජ්ජති, ආපත්ති පාචිත්තියස්ස. භික්ඛු නිපන්නෙ, අනුපසම්පන්නො නිපජ්ජති, ආපත්ති පාචිත්තියස්ස. උභො වා නිපජ්ජන්ති, ආපත්ති පාචිත්තියස්ස. උට්ඨහිත්වා පුනප්පුනං නිපජ්ජන්ති, ආපත්ති පාචිත්තියස්ස.
53. අනුපසම්පන්නෙ අනුපසම්පන්නසඤ්ඤී උත්තරිදිරත්තතිරත්තං සහසෙය්‍යං කප්පෙති, ආපත්ති පාචිත්තියස්ස. අනුපසම්පන්නෙ වෙමතිකො උත්තරිදිරත්තතිරත්තං සහසෙය්‍යං කප්පෙති, ආපත්ති පාචිත්තියස්ස. අනුපසම්පන්නෙ උපසම්පන්නසඤ්ඤී උත්තරිදිරත්තතිරත්තං සහසෙය්‍යං කප්පෙති, ආපත්ති පාචිත්තියස්ස.
උපඩ්ඪච්ඡන්නෙ උපඩ්ඪපරිච්ඡන්නෙ, ආපත්ති දුක්කටස්ස. උපසම්පන්නෙ අනුපසම්පන්නසඤ්ඤී, ආපත්ති දුක්කටස්ස. උපසම්පන්නෙ වෙමතිකො, ආපත්ති දුක්කටස්ස. උපසම්පන්නෙ උපසම්පන්නසඤ්ඤී, අනාපත්ති.
54. අනාපත්ති ද්වෙතිස්සො රත්තියො වසති, ඌනකද්වෙතිස්සො රත්තියො වසති, ද්වෙ රත්තියො වසිත්වා තතියාය රත්තියා පුරාරුණා නික්ඛමිත්වා පුන වසති, සබ්බච්ඡන්නෙ, සබ්බඅපරිච්ඡන්නෙ, සබ්බපරිච්ඡන්නෙ සබ්බඅච්ඡන්නෙ [වසති, සබ්බඅච්ඡන්නෙ සබ්බඅපරිච්ඡන්නෙ, (සී.)], යෙභුය්‍යෙන අච්ඡන්නෙ, යෙභුය්‍යෙන අපරිච්ඡන්නෙ, අනුපසම්පන්නෙ නිපන්නෙ භික්ඛු නිසීදති, භික්ඛු නිපන්නෙ අනුපසම්පන්නො නිසීදති, උභො වා නිසීදන්ති, උම්මත්තකස්ස, ආදිකම්මිකස්සාති.
සහසෙය්‍යසික්ඛාපදං නිට්ඨිතං පඤ්චමං.