සාසනපට්ඨානවණ්ණනා
ඉදං පන සුත්තං සොළසවිධෙ සාසනපට්ඨානෙ සංකිලෙසවාසනාසෙක්ඛභාගියං තණ්හාදිට්ඨාදිසංකිලෙසානං සීලාදිපුඤ්ඤකිරියස්ස, අසෙක්ඛසීලාදික්ඛන්ධස්ස ච විභත්තත්තා, සංකිලෙසවාසනානිබ්බෙධාසෙක්ඛභාගියමෙව වා යථාවුත්තත්ථානං සෙක්ඛසීලක්ඛන්ධාදිකස්ස ච විභත්තත්තා. අට්ඨවීසතිවිධෙ පන සාසනපට්ඨානෙ ලොකියලොකුත්තරං සත්තධම්මාධිට්ඨානං ඤාණඤෙය්‍යං දස්සනභාවනං සකවචනපරවචනං විස්සජ්ජනීයාවිස්සජ්ජනීයං කම්මවිපාකං කුසලාකුසලං අනුඤ්ඤාතපටික්ඛිත්තං භවො ච ලොකියලොකුත්තරාදීනමත්ථානං ඉධ විභත්තත්තාති. අයං සාසනපට්ඨානයොජනා.
පකරණනයවණ්ණනා නිට්ඨිතා.
ඉති සුමඞ්ගලවිලාසිනියා දීඝනිකායට්ඨකථාය පරමසුඛුමගම්භීරදුරනුබොධත්ථපරිදීපනාය සුවිමලවිපුලපඤ්ඤාවෙය්‍යත්තියජනනාය අජ්ජවමද්දවසොරච්චසද්ධාසතිධිතිබුද්ධිඛන්තිවීරියාදිධම්මසමඞ්ගිනා සාට්ඨකථෙ පිටකත්තයෙ අසඞ්ගාසංහීරවිසාරදඤාණචාරිනා අනෙකප්පභෙදසකසමයසමයන්තරගහනජ්ඣොගාහිනා මහාගණිනා මහාවෙය්‍යාකරණෙන ඤාණාභිවංසධම්මසෙනාපතිනාමථෙරෙන මහාධම්මරාජාධිරාජගරුනා කතාය සාධුවිලාසිනියා නාම ලීනත්ථපකාසනියා බ්‍රහ්මජාලසුත්තවණ්ණනාය ලීනත්ථවිභාවනා.
බ්‍රහ්මජාලසුත්තවණ්ණනා නිට්ඨිතා.
පඨමො භාගො නිට්ඨිතො.