සොධනහාරවණ්ණනා

‘‘මමං වා භික්ඛවෙ, පරෙ අවණ්ණං භාසෙය්‍යු’’න්ති ආරම්භො. ‘‘ධම්මස්ස වා අවණ්ණං භාසෙය්‍යුං සඞ්ඝස්ස වා අවණ්ණං භාසෙය්‍යු’’න්ති පදසුද්ධි, නො ආරම්භසුද්ධි. ‘‘තත්‍ර තුම්හෙහි න ආඝාතො, න අප්පච්චයො, න චෙතසො අනභිරද්ධි කරණීයා’’ති පදසුද්ධි චෙව ආරම්භසුද්ධි ච. දුතියනයාදීසුපි එසෙව නයො, තථා ‘‘අප්පමත්තකං ඛො පනෙත’’න්තිආදි ආරම්භො. ‘‘කතම’’න්තිආදි පුච්ඡා. ‘‘පාණාතිපාතං පහායා’’තිආදි පදසුද්ධි, නො ආරම්භසුද්ධි. නො ච පුච්ඡාසුද්ධි. ‘‘ඉදං ඛො’’තිආදි පුච්ඡාසුද්ධි චෙව පදසුද්ධි ච, ආරම්භසුද්ධි.

තථා ‘‘අත්ථි භික්ඛවෙ’’තිආදි ආරම්භො. ‘‘කතමෙ ච තෙ’’තිආදි පුච්ඡා. ‘‘සන්ති භික්ඛවෙ’’තිආදි ආරම්භො. ‘‘කිමාගම්මා’’තිආදි ආරම්භපුච්ඡා. ‘‘යථා සමාහිතෙ’’තිආදි පදසුද්ධි, නො ආරම්භසුද්ධි, නො ච පුච්ඡාසුද්ධි. ‘‘ඉමෙ ඛො’’තිආදි පදසුද්ධි චෙව පුච්ඡාසුද්ධි ච ආරම්භසුද්ධි ච. ඉමිනා නයෙන සබ්බත්ථ ආරම්භාදයො වෙදිතබ්බා. අයං පදාරම්භානං සොධිතාසොධිතභාවවිචාරණලක්ඛණො සොධනහාරො නාම, වුත්තම්පි ච ‘‘විස්සජ්ජිතම්හි පඤ්හෙ, ගාථායං පුච්ඡිතායමාරබ්භා’’තිආදි (නෙත්ති. 4.13).