අධිට්ඨානහාරවණ්ණනා

‘‘අවණ්ණ’’න්ති සාමඤ්ඤතො අධිට්ඨානං. තමවිකප්පෙත්වා විසෙසවචනං ‘‘මමං වා’’ති. ධම්මස්ස වා සඞ්ඝස්ස වාති පක්ඛෙපි එස නයො. තථා ‘‘සීල’’න්ති සාමඤ්ඤතො අධිට්ඨානං. තමවිකප්පෙත්වා විසෙසවචනං ‘‘පාණාතිපාතා පටිවිරතො’’තිආදි. ‘‘අඤ්ඤෙව ධම්මා’’තිආදි සාමඤ්ඤතො අධිට්ඨානං, තමවිකප්පෙත්වා විසෙසවචනං ‘‘තයිදං භික්ඛවෙ, තථාගතො පජානාතී’’තිආදි, තථා ‘‘පුබ්බන්තකප්පිකා’’තිආදි සාමඤ්ඤතො අධිට්ඨානං. තමවිකප්පෙත්වා විසෙසවචනං ‘‘සස්සතවාදා’’තිආදි. ඉමිනා නයෙන සබ්බත්ථ යථාදෙසිතමෙව සාමඤ්ඤවිසෙසා නිද්ධාරෙතබ්බා. අයං සුත්තාගතානං ධම්මානං අවිකප්පනාවසෙන යථාදෙසිතමෙව සාමඤ්ඤවිසෙසනිද්ධාරණලක්ඛණො අධිට්ඨානහාරො නාම, යථාහ ‘‘එකත්තතාය ධම්මා, යෙපි ච වෙමත්තතාය නිද්දිට්ඨා’’තිආදි (නෙත්ති. 4.14).