10. ජීවිතින්ද්‍රියකථාවණ්ණනා
540. අන්තං ගහෙත්වා වදතීති ‘‘අත්ථි අරූපධම්මානං ආයු ඨිති යපනා යාපනා ඉරියනා වත්තනා පාලනා, අත්ථි අරූපජීවිතින්ද්‍රිය’’න්ති තස්මිං පඤ්හෙ ‘‘අත්ථි අරූපජීවිතින්ද්‍රිය’’න්ති ඉමං අන්තං පරියොසානං ගහෙත්වා වදති. වත්තුං යුත්තො සමුදායස්ස ඉච්ඡන්තො තදවයවස්ස ඉච්ඡතීති. න හි අවයවෙහි විනා සමුදායො නාම අත්ථි.
541. තමෙවාති අරූපං චිත්තවිප්පයුත්තමෙව.
542. තදාපීති සමාපජ්ජනවුට්ඨානකාලෙපි.
544-545. සො යුත්තො ද්වින්නං රූපාරූපජීවිතින්ද්‍රියානං සකසමයෙ ඉච්ඡිතත්තා.
ජීවිතින්ද්‍රියකථාවණ්ණනා නිට්ඨිතා.