ධූමනෙත්තකථා

ධූමනෙත්තකථායං ‘‘අනුජානාමි, භික්ඛවෙ, ධූමං පාතු’’න්ති (මහාව. 266) වචනතො යමකනත්ථුකරණියා නක්ඛමනීයෙ සති ධූමං පාතුං වට්ටති. ‘‘අනුජානාමි, භික්ඛවෙ, ධූමනෙත්ත’’න්ති (මහාව. 266) වචනතො තමෙව වට්ටිං ආලිම්බෙත්වා පිවනපච්චයා කණ්ඨෙ දහන්තෙන ධූමනෙත්තධූමො පිවිතබ්බො. ‘‘න, භික්ඛවෙ, උච්චාවචානි ධූමනෙත්තානි ධාරෙතබ්බානි, යො ධාරෙය්‍ය, ආපත්ති දුක්කටස්ස. අනුජානාමි, භික්ඛවෙ, අට්ඨිමයං…පෙ… සඞ්ඛනාභිමය’’න්ති (මහාව. 266) වචනතො එතානි එව ධූමනෙත්තානි ධාරෙතබ්බානි. ‘‘අනුජානාමි, භික්ඛවෙ, අපිධාන’’න්ති (මහාව. 266) වචනතො පාණකාදිඅප්පවිසනත්ථං ධූමනෙත්තත්ථවිකම්පි වට්ටති. ‘‘අනුජානාමි, භික්ඛවෙ, යමකත්ථවික’’න්ති (මහාව. 266) වචනතො එකතො ඝංසියමානෙ සති යමකත්ථවිකං වට්ටති. ‘‘අනුජානාමි, භික්ඛවෙ, අංසබද්ධකං බන්ධනසුත්තක’’න්ති (මහාව. 266) වචනතො ධූමනෙත්තත්ථවිකස්ස අංසබද්ධබන්ධනසුත්තං වට්ටති.