නිගමනකථා

1. ජම්බුදීපතලෙ රම්මෙ, මරම්මවිසයෙ සුතෙ;

තම්බදීපරට්ඨෙ ඨිතං, පුරං රතනනාමකං.

2. ජිනසාසනපජ්ජොතං, අනෙකරතනාකරං;

සාධුජ්ජනානමාවාසං, සොණ්ණපාසාදලඞ්කතං.

3. තස්මිං රතනපුරම්හි, රාජානෙකරට්ඨිස්සරො;

සිරීසුධම්මරාජාති, මහාඅධිපතීති ච.

4. එවංනාමො මහාතෙජො, රජ්ජං කාරෙසි ධම්මතො;

කාරාපෙසි රාජා මණි-චූළං මහන්තචෙතියං.

5. තස්ස කාලෙ බ්‍රහාරඤ්ඤෙ, තිරියො නාම පබ්බතො;

පුබ්බකාරඤ්ඤවාසීනං, නිවාසො භාවනාරහො.

6. අට්ඨාරසහි දොසෙහි, මුත්තො පඤ්චඞ්ගුපාගතො;

අරඤ්ඤලක්ඛණං පත්තො, බද්ධසීමායලඞ්කතො.

7. තස්මිං පබ්බතෙ වසන්තො, මහාථෙරො සුපාකටො;

තිපෙටකාලඞ්කාරොති, ද්වික්ඛත්තුං ලද්ධලඤ්ඡනො.

8. තෙභාතුකනරින්දානං, ගරුභූතො සුපෙසලො;

කුසලො පරියත්තිම්හි, පටිපත්තිම්හි කාරකො.

9. සොහං ලජ්ජීපෙසලෙහි, භික්ඛූහි අභියාචිතො;

සාසනස්සොපකාරාය, අකාසිං සීලවඩ්ඪනං.

10. විනයාලඞ්කාරං නාම, ලජ්ජීනං උපකාරකං;

සුට්ඨු විනයසඞ්ගහ-වණ්ණනං සාධුසෙවිතං.

11. රූපඡිද්දනාසකණ්ණෙ, සම්පත්තෙ ජිනසාසනෙ;

ඡිද්දසුඤ්ඤසුඤ්ඤරූපෙ, කලියුගම්හි ආගතෙ.

12. නිට්ඨාපිතා අයං ටීකා, මයා සාසනකාරණා;

ද්වීසු සොණ්ණවිහාරෙසු, ද්වික්ඛත්තුං ලද්ධකෙතුනා.

13. ඉමිනා පුඤ්ඤකම්මෙන, අඤ්ඤෙන කුසලෙන ච;

ඉතො චුතාහං දුතියෙ, අත්තභාවම්හි ආගතෙ.

14. හිමවන්තපදෙසම්හි, පබ්බතෙ ගන්ධමාදනෙ;

ආසන්නෙ මණිගුහාය, මඤ්ජූසකදුමස්ස ච.

15. තස්මිං හෙස්සං භුම්මදෙවො, අතිදීඝායුකො වරො;

පඤ්ඤාවීරියසම්පන්නො, බුද්ධසාසනමාමකො.

16. යාව තිට්ඨති සාසනං, තාව චෙතියවන්දනං;

බොධිපූජං සඞ්ඝපූජං, කරෙය්‍යං තුට්ඨමානසො.

17. භික්ඛූනං පටිපන්නානං, වෙය්‍යාවච්චං කරෙය්‍යහං;

පරියත්තාභියුත්තානං, කඞ්ඛාවිනොදයෙය්‍යහං.

18. සාසනං පග්ගණ්හන්තානං, රාජූනං සහායො අස්සං;

සාසනං නිග්ගණ්හන්තානං, වාරෙතුං සමත්ථො අස්සං.

19. සාසනන්තරධානෙ තු, මඤ්ජූසං රුක්ඛමුත්තමං;

නන්දමූලඤ්ච පබ්භාරං, නිච්චං පූජං කරෙය්‍යහං.

20. යදා තු පච්චෙකබුද්ධා, උප්පජ්ජන්ති මහායසා;

තදා තෙසං නිච්චකප්පං, උපට්ඨානං කරෙය්‍යහං.

21. තෙනෙව අත්තභාවෙන, යාව බුද්ධුප්පාදා අහං;

තිට්ඨන්තො බුද්ධුප්පාදම්හි, මනුස්සෙසු භවාමහං.

22. මෙත්තෙය්‍යස්ස භගවතො, පබ්බජිත්වාන සාසනෙ;

තොසයිත්වාන ජිනං තං, ලභෙ බ්‍යාකරණුත්තමං.

23. බ්‍යාකරණං ලභිත්වාන, පූරෙත්වා සබ්බපාරමී;

අනාගතම්හි අද්ධානෙ, බුද්ධො හෙස්සං සදෙවකෙති.

විනයාලඞ්කාරටීකා සමත්තා.