6. ආරාමවග්ගවණ්ණනා
1021. පඨමසික්ඛාපදං උත්තානත්ථමෙව.
2. දුතියසික්ඛාපදවණ්ණනා
1030. භික්ඛුනී චෙ භික්ඛුං අක්කොසති, ඉමිනා සික්ඛාපදෙන පාචිත්තියං. භික්ඛුනිං චෙ අක්කොසති, ඔමසවාදෙන ආපජ්ජති. ඔමසවාදෙ සම්මුඛාව රුහති, ඉධ පන පරම්මුඛාපි.
තත්‍රායං විචාරණා – භික්ඛුවිභඞ්ගෙ ඔසමවාදසික්ඛාපදෙ භික්ඛුනී අනුපසම්පන්නට්ඨානෙ තිට්ඨතීති කත්වා භික්ඛුනිවිභඞ්ගෙපි ඔමසවාදසික්ඛාපදෙ භික්ඛු භික්ඛුනියා අනුපසම්පන්නට්ඨානෙ තිට්ඨතීති සිද්ධං. ඉධ ච අනුපසම්පන්නස්ස අක්කොසනෙ දුක්කටං වුත්තං, භික්ඛුස්ස උපසම්පන්නස්ස අක්කොසනෙ පාචිත්තියං වුත්තං, තස්මා ඉමානි ද්වෙ සික්ඛාපදානි භික්ඛුම්හි සංසන්දියමානානි අඤ්ඤමඤ්ඤං න සමෙන්ති. යථා සමෙන්ති, තථා ජානිතබ්බං. තත්ථ පොරාණගණ්ඨිපදෙ වුත්තනයෙන භික්ඛුනීනං ඔමසවාදසික්ඛාපදෙ අනුපසම්පන්නොති න ගහෙතබ්බො, ඉදමෙත්ථ යුත්තං. පරිභාසෙය්‍යාති අඤ්ඤත්‍ර අක්කොසවත්ථූහි. තෙසු හි අඤ්ඤතරස්මිං සති ඔමසවාදපාචිත්තියමෙවාති එකෙ, තං න යුත්තං. ඔමසවාදෙ පාළිමුත්තකඅක්කොසෙ හි දුක්කටං හොතීති. දුක්කටොකාසෙ ඉදං පාචිත්තියං තෙහි නිද්දිට්ඨං හොති, තස්මා ‘‘බාලා එතා’’ති පාළියං ඉධ ආගතපදානංයෙව වසෙන පරිභාසනං වෙදිතබ්බං.
දුතියසික්ඛාපදවණ්ණනා නිට්ඨිතා.
1033. තතියසික්ඛාපදං උත්තානත්ථමෙව.
4. චතුත්ථසික්ඛාපදවණ්ණනා
1038. නිමන්තිතා වා පවාරිතා වාති එත්ථ පොරාණගණ්ඨිපදෙ තාව එවං වුත්තං ‘‘පවාරිතාපි යාගුං පාතුං ලභති, භොජ්ජයාගුං න ලභති. යාගු පනෙත්ථ ඛාදනීයභොජනීයසඞ්ඛ්‍යං න ගච්ඡති. නිමන්තිතා භික්ඛුනී පිණ්ඩාය චරිත්වා භුඤ්ජිතුකාමා සාමිකෙ අපලොකෙත්වාව භුඤ්ජිතුං ලභති. පරම්පරභොජනාපත්ති භික්ඛුනීනං නත්ථි. නිමන්තිතා තං භත්තං භුඤ්ජිත්වා වා අභුඤ්ජිත්වා වා පවාරිතා කප්පියං කාරාපෙත්වා භුඤ්ජිතුං න ලභති, අකප්පියනිමන්තනෙන නිමන්තියමානා ද්වෙ නිමන්තනානි සම්පටිච්ඡිතුඤ්ච න ලභතී’’ති. තත්ථ ‘‘පවාරිතාපි යාගුං පාතුං ලභතී’’ති වුත්තං පාළියං, අට්ඨකථායඤ්ච අනුඤ්ඤාතත්තා. ‘‘නිමන්තිතා අප්පවාරිතා යාගුං පිවතී’’ති හි පාළියං වුත්තං. තත්‍රිදං සික්ඛාපදවණ්ණනාපුබ්බඞ්ගමසන්නිට්ඨානං – නිමන්තිතා වා පවාරිතා වාති එත්ථ වාසද්දෙන අකප්පියනිමන්තනෙන නිමන්තිතා අප්පවාරිතා ඨපෙත්වා යාගුං අඤ්ඤං ඛාදනීයං වා භොජනීයං වා ඛාදෙය්‍ය වා භුඤ්ජෙය්‍ය වා, පාචිත්තියං අඤ්ඤත්‍ර සාමිකානං අපලොකනා. පරම්පරභොජනාභාවෙන භික්ඛුනීනං කො ගුණො ජාතොති? න එතාසං ගුණලාභො, කෙවලං පාකටතරං ජාතං. භික්ඛූපි විකප්පෙත්වා මිස්සෙත්වාව භුඤ්ජිතුං ලභන්ති. සමයෙ යථාසුඛං ලභන්ති. ඉමිනා අපලොකනෙන කින්ති? පවාරිතා වා අනිමන්තිතා වා න කිඤ්චි කප්පියං කාරාපෙත්වා ගිලානාතිරිත්තම්පි ලභන්ති, නිමන්තිතා ච පවාරිතා ච යාගුම්පි න ලභන්ති, අපලොකෙත්වාපි න ලභන්තීති.
චතුත්ථසික්ඛාපදවණ්ණනා නිට්ඨිතා.
ආරාමවග්ගවණ්ණනා නිට්ඨිතා.