7. ගබ්භිනිවග්ගවණ්ණනා

1. පඨමාදිසික්ඛාපදවණ්ණනා

1067. ‘‘ගබ්භිනි’’න්ති දස්සනාදීහිපි ගබ්භසම්භවතො වුත්තං. පදභාජනෙපි පවාරිතභාවො න දිස්සති.

1074. ධාති වාති එත්ථ දාරකං සාමිකානං දත්වා ආහටෙ වඩ්ඪෙති, තථා මාතාපීති කෙචි.

1080. ‘‘සික්ඛමාන’’න්ති පාඨං දීපවාසිනො රොචෙන්ති කිරියාකිරියත්තා, ජම්බුදීපවාසිනො ‘‘සික්ඛමානා’’ති. තස්සත්ථො සික්ඛාධම්මමානනතො සික්ඛමානාති. ඉධ කිරියා න හොති, සඤ්ඤාව අධිප්පෙතා. න එතාසු අසික්ඛිතා උපසම්පාදෙතබ්බා උපජ්ඣායිනීආදීනං ආපත්තිභාවා. ‘‘තස්සා උපසම්පදා හොති එවා’’ති වදන්ති.

1082. ධම්මකම්මෙති උපසම්පදකම්මං අධිප්පෙතං.

1112. වුට්ඨාපිතන්ති සාමණෙරිභූමිතො යාය ථෙරියා උපසම්පදාපෙක්ඛා වුට්ඨපිතා, සා ථෙරී වුට්ඨාපිතා නාම, තෙනෙව පුන විසෙසනත්ථං ‘‘පවත්තිනි’’න්ති ආහ.

පඨමාදිසික්ඛාපදවණ්ණනා නිට්ඨිතා.

ගබ්භිනිවග්ගවණ්ණනා නිට්ඨිතා.