5. චිත්තාගාරවග්ගවණ්ණනා

1. පඨමසික්ඛාපදවණ්ණනා

978. කීළනඋපවනං නාම කඤ්චිනගරස්ස නගරුපවනං විය දට්ඨබ්බං. උය්‍යානං නාම තත්ථෙව නන්දවනඋය්‍යානං විය දට්ඨබ්බං. ‘‘තත්ථෙව ඨත්වා තං තං දිසාභාගං විලොකෙත්වා පස්සන්තියා පන පාටෙක්කා ආපත්තියො’’ති පාඨො. එවං වුත්තෙ යං පුබ්බෙ වුත්තං පදං ‘‘අනුද්ධරමානා’’ති, තං එකස්මිංයෙව දිසාභාගෙති සිද්ධන්ති එකෙ. උපචාරො ද්වෙ ලෙඩ්ඩුපාතොති ච.

පඨමසික්ඛාපදවණ්ණනා නිට්ඨිතා.

2. දුතියසික්ඛාපදවණ්ණනා

984. ‘‘ආහරිමෙහි වාළෙහී’’ති ‘‘අසංහාරිමෙනා’’ති ච දුවිධො පාඨො. ‘‘විසුං කත්වා පච්ඡා සද්ධිං තෙහි වාළෙහී’’ති ලිඛිතං. යථා තථා වාළරූපෙ උට්ඨපෙත්වා කතපාදං ‘‘පල්ලඞ්ක’’න්ති වුච්චති අනාපත්තිවාරෙ ‘‘අසංහාරිමෙහි වාළෙහි කතං පරිභුඤ්ජතී’’ති වචනාභාවතො.

දුතියසික්ඛාපදවණ්ණනා නිට්ඨිතා.

3. තතියසික්ඛාපදවණ්ණනා

988. ‘‘උජ්ජවුජ්ජවෙති හත්ථප්පසාරණෙ’’ති ලිඛිතං, තං න යුත්තං ‘‘යත්තකං හත්ථෙන අඤ්ඡිතං හොති, තස්මිං තක්කම්හි වෙඨිතෙ එකාපත්තී’’ති වචනතො.

තතියසික්ඛාපදවණ්ණනා නිට්ඨිතා.

4. චතුත්ථසික්ඛාපදවණ්ණනා

993. ‘‘යාගුපානෙති යාගුදානෙ’’ති ලිඛිතං. පොරාණගණ්ඨිපදෙ ‘‘මාතාපිතූනං දාතුං වට්ටතී’’ති වුත්තං.

චතුත්ථසික්ඛාපදවණ්ණනා නිට්ඨිතා.

994. පඤ්චමසික්ඛාපදං උත්තානත්ථමෙව.

6. ඡට්ඨසික්ඛාපදවණ්ණනා

1001. ඡට්ඨෙ භික්ඛුවිභඞ්ගෙ අචෙලකසික්ඛාපදෙන එකපරිච්ඡෙදං. ඉධ අගාරිකො විසෙසො, තස්මා ‘‘අසාධාරණ’’න්ති වදන්ති.

ඡට්ඨසික්ඛාපදවණ්ණනා නිට්ඨිතා.

1003-8. සත්තමට්ඨමෙසු වත්තබ්බං නත්ථි.

9. නවමසික්ඛාපදවණ්ණනා

1015. ‘‘ඛීලනමන්තං දාරුසාරඛීලං මන්තෙත්වා පථවියං පවෙසෙත්වා මාරණමන්තං. නාගමණ්ඩලංනාම නාගරොධමන්තං, පිට්ඨාදීහි වා පරික්ඛෙපං කත්වා තත්ථ මනුස්සෙ පවෙසෙන්ති ගුත්තත්ථායා’’ති ලිඛිතං.

නවමසික්ඛාපදවණ්ණනා නිට්ඨිතා.

1017. දසමසික්ඛාපදං උත්තානත්ථමෙව.

චිත්තාගාරවග්ගවණ්ණනා නිට්ඨිතා.