3. නග්ගවග්ගවණ්ණනා

1-2. පඨමදුතියසික්ඛාපදවණ්ණනා

883. නග්ගවග්ගස්ස පඨමදුතියානි උත්තානානි. පඨමෙ අයං විසෙසො – භික්ඛුස්ස තථා න්හායන්තස්ස දුක්කටං අඤ්ඤත්‍ර ජන්තාඝරඋදකපටිච්ඡාදීහි. න ච විගරහි තත්ථ භගවා අත්තනාව අනනුඤ්ඤාතත්තා උදකසාටිකායාති පොරාණා. ‘‘එකමෙව නිවාසෙත්වා, පාරුපිත්වා ච නහායිතුං න වට්ටතී’’ති පොරාණගණ්ඨිපදෙ වුත්තං.

පඨමදුතියසික්ඛාපදවණ්ණනා නිට්ඨිතා.

3. තතියසික්ඛාපදවණ්ණනා

894. තතියෙ අන්තොචතූහපඤ්චාහං ධුරං නික්ඛිපන්තියාපි ආපත්ති එව. ලිඞ්ගපරිවත්තෙ ධුරං නික්ඛිපන්තියා දුක්කටං තිකදුක්කටත්තා. ‘‘සම්බහුලාහි භික්ඛුනීහි සද්ධින්ති එත්ථ චතස්සොපි සම්බහුලා’’ති පොරාණගණ්ඨිපදෙ වුත්තං.

තතියසික්ඛාපදවණ්ණනා නිට්ඨිතා.

4. චතුත්ථසික්ඛාපදවණ්ණනා

898. චතුත්ථෙ සඞ්ඝාටිචාරන්ති එත්ථ සඞ්ඝාටිආදිවසෙන අධිට්ඨිතානංයෙවායං විධි, නෙතරාසං කිර. තත්ථ තිචීවරෙ එව විප්පවාසපච්චයා නිස්සග්ගියං. අන්තොචීවරකාලෙපි පඤ්චාහිකං සඞ්ඝාටිචාරං අතික්කාමෙන්තියා ආපත්තියෙව. ‘‘විනා එතෙහි චීවරෙහි උපසම්පදං කාතුං න වට්ටතී’’ති පොරාණගණ්ඨිපදෙ වුත්තං.

චතුත්ථසික්ඛාපදවණ්ණනා නිට්ඨිතා.

5. පඤ්චමසික්ඛාපදවණ්ණනා

906. පඤ්චමස්ස අනාපත්තිවාරෙ තාය වා අවිප්පවාසායාති අත්ථතො ලබ්භති.

පඤ්චමසික්ඛාපදවණ්ණනා නිට්ඨිතා.

907-911. ඡට්ඨසත්තමානි උත්තානානි.

8. අට්ඨමසික්ඛාපදවණ්ණනා

916. සොකජ්ඣායිකා නාම කිර මායාකාරා. විලුම්පකා භණ්ඩකාති ච පොරාණා.

අට්ඨමසික්ඛාපදවණ්ණනා නිට්ඨිතා.

9. නවමසික්ඛාපදවණ්ණනා

920. ‘‘කථඤ්හි නාම අතික්කාමෙස්සතී’’ති වුත්තත්තා ථුල්ලනන්දා චීවරකාලසමයං ආගමෙථාති අතික්කමාපෙසීති සිද්ධං හොති.

නවමසික්ඛාපදවණ්ණනා නිට්ඨිතා.

10. දසමසික්ඛාපදවණ්ණනා

927. දසමෙ එකකුලං එතදවොචුන්ති එත්ථ කුලං නාම තස්මිං මනුස්සා, තස්මා බහුවචනං.

දසමසික්ඛාපදවණ්ණනා නිට්ඨිතා.

නග්ගවග්ගවණ්ණනා නිට්ඨිතා.