සමුට්ඨානසීසවණ්ණනා

257. අනත්තාති අත්තවිරහිතා ‘‘අලවණභොජන’’න්තිආදීසු විය. කරුණාසීතලභාවෙන චන්දසදිසො. කිලෙසතිමිරප්පහානතො ආදිච්චො. යස්මා තෙ දෙසයන්ති, තස්මා අඞ්ගීරසොපි. පිටකෙ තීණි දෙසයි තෙසං අඤ්ඤතරත්තාති අත්ථො. විනයො යදි තිට්ඨති, එවං පටිපත්තිසද්ධම්මාදි නීයති පවත්තතීති අත්ථො. අයං පන කථං තිට්ඨතීති? ආහ ‘‘උභතො චා’’තිආදි. පරිවාරෙන ගන්ථිතා තිට්ඨන්තීති අත්ථො. තස්සෙව පරිවාරස්ස සුත්තෙ. නියතසමුට්ඨානං කතං, වුත්තන්ති අධිප්පායො. අසම්භින්නසමුට්ඨානානි අසඞ්කරසමුට්ඨානානි, අඤ්ඤෙහි අසදිසසමුට්ඨානානීති අත්ථො. යස්මා පරිවාරෙ සති විනයො තිට්ඨති, විනයෙ සති සද්ධම්මො තිට්ඨති, යස්මා සමුට්ඨානානි ච සුත්තෙ දිස්සන්ති, තස්මා සික්ඛෙති අත්ථො. ‘‘ධම්මකාමො සුපෙසලො’’ති පරිවාරෙ ගාරවජනනත්ථං වුත්තං. තත්ථාති ‘‘දිස්සන්තී’’ති තත්ථ. ‘‘එකෙන සමුට්ඨානෙන සමුට්ඨාතීති පඨමපාරාජිකං එකෙන සමුට්ඨානෙන සමුට්ඨාතී’’ති වුත්තං. පාළියඤ්හි නිද්දිට්ඨසමුට්ඨානඤ්ච දිස්සති. ‘‘තස්සෙව පරිවාරස්ස, සමුට්ඨානං නියතො කත’’න්ති වුත්තං පුරිමනයෙති අත්ථො. යථාඤායන්ති යථාභූතං. ‘‘සඤ්චරිත්තාභාසනඤ්චා’’ති පාඨො. ‘‘සඤ්චරිත්තානුභාසනඤ්චා’’තිපි අත්ථි. නයවජ්ජෙහි විනයවජ්ජෙහීති අත්ථො.

පඨමපාරාජිකසමුට්ඨානවණ්ණනා

258. නානුබන්ධෙ පවත්තිනින්ති ‘‘යා පන භික්ඛුනී වුත්ථාපිතං පවත්තිනිං ද්වෙ වස්සානි නානුබන්ධෙය්‍යා’’ති වුත්තසික්ඛාපදඤ්ච. අයං පාඨො එකච්චෙසු පොත්ථකෙසු න දිස්සති. ඡසත්තති පඨමපාරාජිකසමුට්ඨානා.

දුතියපාරාජිකසමුට්ඨානවණ්ණනා

259. ‘‘කුක්කුච්චං චීවරං දත්වාති කුක්කුච්චුප්පාදනඤ්ච ධම්මිකානං කම්මානං ඡන්දං දත්වා ඛීයනඤ්ච චීවරං දත්වා ඛීයනඤ්චා’’ති පාඨො. ‘‘දත්වා’’ති උප්පටිපාටියා වුත්තං, තස්මා ‘‘කුක්කුච්චං ධම්මිකං දත්වාති පාඨො සුන්දරො’’ති වදන්ති, විචාරෙත්වා ගහෙතබ්බං.

269. අකතන්ති අභිනවං.