සෙදමොචනගාථාවණ්ණනා

අවිප්පවාසපඤ්හාවණ්ණනා

479. තහින්ති තස්මිං පුග්ගලෙ. අකප්පියසම්භොගො නාම මෙථුනධම්මාදි. ‘‘වරසෙනාසනරක්ඛණත්ථාය විස්සජ්ජෙත්වා පරිභුඤ්ජිතුං වට්ටතී’’ති ගරුභණ්ඩවිනිච්ඡයෙ වුත්තො. එකාදසාවන්දියෙ පණ්ඩකාදයො එකාදස. උපෙති සපරිසං. න ජීවති නිම්මිතරූපත්තා. ‘‘උබ්භක්ඛකෙන වදාමී’’ති ඉමිනා මුඛෙ මෙථුනධම්මාභාවං දීපෙති. අධොනාභිවිවජ්ජනෙන වච්චමග්ගප්පස්සාවමග්ගෙසු. ගාමන්තරපරියාපන්නං නදිපාරං ඔක්කන්තභික්ඛුනිං සන්ධායාති භික්ඛුනියා ගාමාපරියාපන්නපරතීරෙ නදිසමීපමෙව සන්ධාය වුත්තා. තත්ථ පරතීරෙ ගාමූපචාරො එකලෙඩ්ඩුපාතො නදිපරියන්තෙන පරිච්ඡින්නො, තස්මා පරතීරෙ රතනමත්තම්පි අරඤ්ඤං න අත්ථි, තඤ්ච තිණාදීහි පටිච්ඡන්නත්තා දස්සනූපචාරවිරහිතං කරොති. තත්ථ අත්තනො ගාමෙ ආපත්ති නත්ථි. පරතීරෙ පන එකලෙඩ්ඩුපාතසඞ්ඛාතෙ ගාමූපචාරෙයෙව පදං ඨපෙති. අන්තරෙ අභිධම්මවසෙන අරඤ්ඤභූතං සකගාමං අතික්කමති නාම, තස්මා ගණම්හා ඔහීයනා ච හොතීති ඤාතබ්බං. එත්තාවතාපි සන්තොසමකත්වා විචාරෙත්වා ගහෙතබ්බං. භික්ඛූනං සන්තිකෙ උපසම්පන්නා පඤ්චසතා මහාපජාපතිප්පමුඛා. මහාපජාපතිපි හි ආනන්දත්ථෙරෙන දින්නඔවාදස්ස පටිග්ගහිතත්තා භික්ඛූනං සන්තිකෙ උපසම්පන්නා නාම.

පාරාජිකාදිපඤ්හාවණ්ණනා

480. ‘‘දුස්සකුටිං සන්ධායා’’ති සහ දුස්සෙන වීතික්කමනස්ස සක්කුණෙය්‍යතාය වුත්තං. ලිඞ්ගපරිවත්තෙ පටිග්ගහණස්ස විජහනතො සාමං ගහෙත්වා භුඤ්ජිතුං න වට්ටති. කාකඌහදනං වාති කාකෙන ඌහදනං වා. ‘‘තයො පුරිසෙපි උපගන්ත්වා’’ති පාඨසෙසො.

පාචිත්තියාදිපඤ්හාවණ්ණනා

481. මෙථුනධම්මපච්චයා නාම කායසංසග්ගො. තංහෙතු මෙථුනධම්මස්ස පුබ්බභාගභූතං කායසංසග්ගං වායාමන්තියාති අට්ඨවත්ථුපූරණං සන්ධාය. පරිභොගප්පච්චයාති පරිභොගකාරණා. තස්මාති යස්මා පරිභොගප්පච්චයා ආපජ්ජති, තස්මා භොජනපරියොසානෙ හොතීති අත්ථො. පොරාණපොත්ථකෙසු ‘‘තස්සා’’ති පාඨො. ‘‘කාරණවචනං සුන්දරං භොජනපරිච්ඡෙදදස්සනතො’’ති වදන්ති.

සෙදමොචනගාථාවණ්ණනා නිට්ඨිතා.