දුතියගාථාසඞ්ගණිකවණ්ණනා

කායිකාදිආපත්තිවණ්ණනා

474-5. නිදානුද්දෙසං විනා සෙසුද්දෙසාභාවා ‘‘සබ්බපාතිමොක්ඛුද්දෙසානඤ්ච සඞ්ගහො හොතී’’ති වුත්තං. විනයෙ ගරුකා විනයගරුකා. ඉදං පන ද්වීසු ගාථාසු කිඤ්චාපි ආගතං, අඤ්ඤෙහි පන මිස්සෙත්වා වුත්තභාවා නානාකරණං පච්චෙතබ්බං. නවසු ඨානෙසු කම්මං හොතීති කම්මඤත්ති හොති. වාචාති වචීසම්භවා. අද්ධානහීනො ඌනවීසතිවස්සො. ‘‘අපිචෙත්ථාති කුරුන්දිවාදො’’ති වුත්තං. වනප්පතින්ති එවං අදින්නාදානෙ ආගතං වනප්පතිං. විස්සට්ඨිඡඩ්ඩනෙති සුක්කවිස්සට්ඨියං. දුක්කටා කතාති දුක්කටං වුත්තං. ආමකධඤ්ඤං විඤ්ඤාපෙත්වා භුඤ්ජන්තියා පුබ්බපයොගෙ දුක්කටං, අජ්ඣොහාරෙ පාචිත්තියං.

පාචිත්තියවණ්ණනා

476. මහාසඞ්ඝිකා සාමණෙරෙපි ආපත්තිං දෙසාපෙන්ති කිර, තෙන වුත්තං ‘‘න දෙසාපෙතබ්බා’’ති, දණ්ඩකම්මං පන තෙසං කාතබ්බං තථාරූපෙ ඔළාරිකවීතික්කමෙ.

අවන්දනීයපුග්ගලාදිවණ්ණනා

477. දසසතං ආපත්තියොති සහස්සං ආපත්තියො. චම්පායං විනයවත්ථුස්මින්ති චම්පෙය්‍යක්ඛන්ධකෙ. අධම්මෙන වග්ගන්තිආදීනි චත්තාරි කම්මානියෙව භගවතා වුත්තානීති අත්ථො. න කෙවලං ආපත්තියෙව, අථ ඛො ඡ සමථා…පෙ… සම්මුඛාවිනයෙන සම්මන්ති, සමායොගං ගච්ඡන්ති සම්මුඛාවිනයෙන සම්පයොගං ගච්ඡන්තීති අත්ථො. විනා සමථෙහි සම්මති, සමථභාවං ගච්ඡති. පටිසෙධත්ථෙ සති විනා සමථෙහීති සමථෙහි විනාති අත්ථො.

සොළසකම්මාදිවණ්ණනා

478. අසුත්තකන්ති සුත්තවිරහිතං, උසුත්තං තත්‍ර නත්ථීති අධිප්පායො.

දුතියගාථාසඞ්ගණිකවණ්ණනා නිට්ඨිතා.