උපාලිපඤ්චකවණ්ණනා

අනිස්සිතවග්ගවණ්ණනා

419. කායිකඋපඝාතිකා නාම කායෙන වීතික්කමො.

නප්පටිප්පස්සම්භනවග්ගවණ්ණනා

420. ඔමද්දකාරකොති ඔමද්දිත්වා අභිභවිත්වා කාරකො.

වොහාරවග්ගවණ්ණනා

424. භෙදකරවත්ථූනි නිස්සාය විවාදාධිකරණං සමුට්ඨාති, එවං යථාසඞ්ඛ්‍යං ගච්ඡති. කොධොපනාහාදිද්වාදසමූලපයොගං විවාදාධිකරණං, තථා සෙසෙසු. ඔසාරණාදීසු නවසු ඨානෙසු කම්මඤත්තියා කරණං. ද්වීසු ඨානෙසු ඤත්තිදුතියඤත්තිචතුත්ථකම්මෙසු. යස්මා මහාඅට්ඨකථායං වුත්තනයෙනෙව උභතොවිභඞ්ගා අසඞ්ගහිතා, තස්මා යං කුරුන්දියං වුත්තං, තං ගහෙතබ්බන්ති සම්බන්ධො.

දිට්ඨාවිකම්මවග්ගවණ්ණනා

425. තිණ්ණන්නං උපරි සහ ආපත්තිං දෙසෙතුං න ලබ්භන්ති. කම්මනානාසංවාසකානං ලද්ධිග්ගහිතකොව ලද්ධිනානාසංවාසකො. ‘‘අවිප්පවාසසීමාය ඨිතස්සා’’ති මහාසීමං කිර සන්ධාය වුත්තං.

433. ‘‘උම්මාදා චිත්තක්ඛෙපා’’ති පාඨො.

මුසාවාදවග්ගවණ්ණනා

444. පරියායෙන ජානන්තස්සාති යස්ස කස්සචි ජානන්තස්ස පරියායෙන වුත්තමුසාවාදොති අත්ථො.

446. අනුයොගො න දාතබ්බොති තෙන වුත්තං අනාදියිත්වා තුණ්හී භවිතබ්බන්ති අත්ථො.

භික්ඛුනොවාදවග්ගවණ්ණනා

454. වොහාරනිරුත්තියං සද්දනිරුත්තියං. මග්ගපච්චවෙක්ඛණාදයො එකූනවීසති.

උබ්බාහිකවග්ගවණ්ණනා

455. පසාරෙතා මොහෙතා.

අධිකරණවූපසමවග්ගවණ්ණනා

458. ‘‘යථාරත්තන්ති අනුපසම්පන්නෙ අපෙක්ඛතී’’තිපි වදන්ති. ‘‘යථාවුඩ්ඪන්ති උපසම්පන්නෙ අපෙක්ඛතී’’ති ලිඛිතං.

කථිනත්ථාරවග්ගවණ්ණනා

467. ‘‘එකාවත්තො’’තිපි පඨන්ති, තස්ස කුද්ධො කොධාභිභූතොති කිරත්ථො. එකවත්ථොතිපි කෙචි, උත්තරාසඞ්ගං අපනෙත්වා ඨිතොති කිරත්ථො, තං සබ්බං අට්ඨකථායං උද්ධටපාළියා විරුජ්ඣතීති. එකාවට්ටොති හි උද්ධටං, තස්මා න ගහෙතබ්බං. අන්තරා වුත්තකාරණෙනාති ‘‘කිච්චයපසුතත්තා වන්දනං අසමන්නාහරන්තො නලාටං පටිහඤ්ඤෙය්‍යා’’තිආදිවුත්තකාරණෙන.

උපාලිපඤ්චකවණ්ණනා නිට්ඨිතා.

ආපත්තිසමුට්ඨානවණ්ණනා

470. පුබ්බෙ වුත්තමෙවාති සහසෙය්‍යාදිපණ්ණත්තිවජ්ජං. ඉතරන්ති සචිත්තකං. දෙසෙන්තො, දොමනස්සිකො අඤ්ඤෙහි භිංසාපනාදීනි කත්වා ආපත්තිං ආපජ්ජිත්වාති අධිප්පායො.