8. වත්තක්ඛන්ධකවණ්ණනා

ආගන්තුකවත්තකථාවණ්ණනා

357. එකස්මිං ගාමෙ අඤ්ඤවිහාරතො ආගතොපි ආගන්තුකොව. තත්ථ කෙචි එවං වදන්ති ‘‘ආවාසිකො කත්ථචි ගන්ත්වා සචෙ ආගතො, ‘තෙනාපි ආගන්තුකභත්තං භුඤ්ජිතබ්බ’න්ති වුත්තත්තා දූරාගමනං වුත්තං හොති, න ගාමෙ, තස්මා න යුත්ත’’න්ති. තෙ වත්තබ්බා ‘‘ආගන්තුකභත්තං නාම ගහට්ඨෙහි ඨපිතං. යස්මිං නිබද්ධං, තතො අඤ්ඤගාමතොති ආපන්නං. තථා විහාරාධිකාරත්තා අඤ්ඤවිහාරතො ආගතොපි ආගන්තුකො වා’’ති ආචරියානං සන්නිට්ඨානං. පානීයං පුච්ඡිතබ්බං, පරිභොජනීයං පුච්ඡිතබ්බන්ති උද්ධරිත්වා ඝටසරාවාදිගතං සන්ධාය පඨමං, දුතියං කූපතළාකාදිගතන්ති ආචරියො. දුතියවාරෙ අත්තනො වසනට්ඨානත්තා විසුං පුච්ඡිතබ්බමෙව, තස්මා වුත්තං එතං ‘‘පරිච්ඡින්නභික්ඛො වා ගාමො’’ති. බහූසු පොත්ථකෙසු දුවිධාපි යුජ්ජති.

අනුමොදනවත්තකථාවණ්ණනා

362-4. පඤ්චමෙ අනුමොදනත්ථාය නිසින්නෙ. ‘‘මනුස්සානං පරිවිසනට්ඨානන්ති යත්ථ මනුස්සා සපුත්තදාරා ආවසිත්වා දෙන්තී’’ති ලිඛිතං. ඉමස්මිං ඛන්ධකෙ ආගන්තුකාවාසිකගමිකානුමොදනභත්තග්ගපිණ්ඩචාරිකාරඤ්ඤකසෙනාසනජන්තාඝරවච්චකුටිඋපජ්ඣාචරියසද්ධිවිහාරිකන්තෙවාසිකවත්තානි චුද්දස මහාවත්තානි නාම. අග්ගහිතග්ගහණෙන ගණියමානානි අසීති ඛන්ධකවත්තානි නාම හොන්ති.

වත්තක්ඛන්ධකවණ්ණනා නිට්ඨිතා.