2. පාරිවාසිකක්ඛන්ධකවණ්ණනා

පාරිවාසිකවත්තකථාවණ්ණනා

75. පාරිවාසිකක්ඛන්ධකෙ ‘‘මා මං ගාමප්පවෙසනං ආපුච්ඡථාති වුත්තෙ අනාපුච්ඡාපි ගාමං පවිසිතුං වට්ටතී’’ති වදන්ති. සඞ්ඝො අත්තනො පත්තට්ඨානෙ ගහෙතුං වට්ටති. ඔණොජනං නාම විස්සජ්ජනං. ‘‘තං පන පාරිවාසිකෙන පාපිතස්ස අත්තනා සම්පටිච්ඡිතස්සෙව පුනදිවසාදිඅත්ථාය විස්සජ්ජනං කාතබ්බං, අසම්පටිච්ඡිත්වායෙව චෙ විස්සජ්ජෙති, න ලභතී’’ති වුත්තං.

76. පකතියාව නිස්සයොති එත්ථ ‘‘අන්තෙවාසිකානං ආලයසබ්භාවෙ යාව වස්සූපනායිකදිවසො, තාව කප්පති, තස්ස ආලයස්ස සබ්භාවෙ නිස්සයො න පටිප්පස්සම්භතීති චෙ? න වට්ටති. තත්ථ ඉදානි ඛමාපෙය්‍යාමීතිආදිනා වට්ටතී’’ති වුත්තං. තත්ථ එකන්තෙන විස්සට්ඨත්තා, ඉධ පන එකන්තෙනෙව ද්වින්නම්පි සමභාවො ඉච්ඡිතබ්බො එවාති එකෙ. පටිබලස්ස වා භික්ඛුස්සාති එත්ථ ‘‘ලද්ධසම්මුතිකෙන ආණත්තොපි ගරුධම්මෙහි, අඤ්ඤෙහි වා ඔවදිතුං න ලභතී’’ති ලිඛිතං. තතො වා පාපිට්ඨතරාති එත්ථ ‘‘අසඤ්චිච්ච ආපන්නසඤ්චරිත්තතො සුක්කවිස්සට්ඨි පාපිට්ඨතරාති අයම්පි නයො යොජෙතබ්බො’’ති වුත්තං. පච්චයන්ති වස්සාවාසිකං. සෙනාසනං න ලභති සෙය්‍යපරියන්තභාගිතාය. ‘‘උද්දෙසාදීනි දාතුම්පි න ලභතී’’ති වදන්ති. ‘‘සචෙ ද්වෙ පාරිවාසිකා ගතට්ඨානෙ අඤ්ඤමඤ්ඤං පස්සන්ති, උභොහිපි අඤ්ඤමඤ්ඤස්ස ආරොචෙතබ්බං අවිසෙසෙන ‘ආගන්තුකෙන ආරොචෙතබ්බං, ආගන්තුකස්ස ආරොචෙතබ්බ’න්ති වුත්තත්තා’’ති වුත්තං. අඤ්ඤවිහාරගතෙනාපි තත්ථ පුබ්බෙ ආරොචිතස්ස පුනාරොචනකිච්චං නත්ථි. ‘‘අනික්ඛිත්තවත්තස්ස බහි ආරොචිතස්ස යථා පුන විහාරෙ ආරොචනකිච්චං නත්ථි, එවං ‘ආගන්තුකසොධනත්ථං උපොසථදිවසෙ ආරොචෙතබ්බ’න්ති වචනඤ්හෙත්ථ සාධක’’න්ති වදන්ති.

81. එකච්ඡන්නෙ නිසින්නස්සාපි රත්තිච්ඡෙදදුක්කටාපත්තියො හොන්තීති එකෙ. අවිසෙසෙනාති පාරිවාසිකස්ස උක්ඛිත්තකස්සාති ඉමං භෙදං අකත්වා. ‘‘තදහුපසම්පන්නෙපි පකතත්තෙ’’ති වචනතො අනුපසම්පන්නෙහි වසිතුං වට්ටති. ‘‘සමවස්සාති එතෙන අපච්ඡා අපුරිමං නිපජ්ජනෙ ද්වින්නම්පි වත්තභෙදාපත්තිභාවං දීපෙතී’’ති ලිඛිතං.

පාරිවාසිකවත්තකථාවණ්ණනා නිට්ඨිතා.

මූලායපටිකස්සනාරහවත්තකථාවණ්ණනා

86. අත්තනො අත්තනො නවකතරන්ති පාරිවාසිකාදිනවකතරං. පඨමං සඞ්ඝමජ්ඣෙ පරිවාසං ගහෙත්වා නික්ඛිත්තවත්තෙන පුන එකස්සපි සන්තිකෙ සමාදියිතුං, නික්ඛිපිතුඤ්ච වට්ටති. මානත්තෙ පන නික්ඛිපිතුං වට්ටති. ඌනෙ ගණෙ චරණදොසත්තා න ගහෙතුන්ති එකෙ. පඨමං ආදින්නවත්තං එකස්ස සන්තිකෙ යථා නික්ඛිපිතුං වට්ටති, තථා සමාදියිතුම්පි වට්ටතීති පොරාණගණ්ඨිපදෙ.

පාරිවාසිකක්ඛන්ධකවණ්ණනා නිට්ඨිතා.