11. පඤ්චසතිකක්ඛන්ධකවණ්ණනා

සඞ්ගීතිනිදානකථාවණ්ණනා

437. ඡින්නපාතන්ති භාවනපුංසකං, තෙනාකාරෙන පතන්තීති අත්ථො. උපද්දුතා ච මයං හොමාති අතීතත්ථෙ වත්තමානවචනං, අහුම්හාති අත්ථො. අථ වා තස්මිං සති හොම. ‘‘පඤ්ච භික්ඛුසතානී’’ති ගණනවසෙන වත්වා ‘‘වස්සං වසන්තා’’ති පුග්ගලනිද්දෙසො කතො.

ඛුද්දානුඛුද්දකකථාවණ්ණනා

443. ‘‘වස්සිකසාටිකං අක්කමිත්වා’’ති වචනතො භගවතො චතුත්ථචීවරම්පි අත්ථීති සිද්ධං. තෙනෙවාහ චීවරක්ඛන්ධකෙ ‘‘චතුත්ථං චීවරං පාරුපී’’ති.

444. ‘‘අපිච යථෙව මයා’’තිආදි සඞ්ගීතියා අග්ගහණාධිප්පායවසෙන වුත්තං, කින්තු සුසඞ්ගීතා ආවුසො ථෙරෙහි ධම්මො ච විනයො ච. අපිචාහං නාම තථෙවාහං ධාරෙස්සාමීති යථෙව මයා භගවතො සම්මුඛා සුතං සම්මුඛා පටිග්ගහිතං, තථෙව ථෙරෙහි භගවතා සයමෙව එතදග්ගං ආරොපිතෙහි, තස්මා සුසඞ්ගහිතා සඞ්ගීතීති වුත්තං හොති.

බ්‍රහ්මදණ්ඩකථාවණ්ණනා

445. ‘‘ත්වංයෙව ආණාපෙහී’’ති එත්තකමෙව වුත්තං, ථෙරා පන බ්‍රහ්මදණ්ඩං කත්වා වුත්තංයෙව ‘‘ඡන්නස්සා’’තිආදිමාහංසූති වෙදිතබ්බං. එත්ථ ච ආනන්දත්ථෙරො විය අඤ්ඤොපි සඞ්ඝෙන ආණත්තො භික්ඛු බ්‍රහ්මදණ්ඩකතෙන භික්ඛුනා ආලපිතුං ලභති, න අඤ්ඤො. උජ්ජවනිකායාති පටිසොතගාමිනියා. ආගමා නු ඛො ඉධ ආගමා නු ඛ්විධ. ආගමා ඛො ඉධ, තෙ ඔරොධා ඉධ ආගමා ඛො. ‘‘භිසිච්ඡවීති භිසිත්ථවිකා’’ති ලිඛිතං. සබ්බෙවිමෙති සබ්බමෙව. කුලවං ගමෙන්තීති නිරත්ථකවිනාසං ගමෙන්ති. කුච්ඡිතො ලවො කුලවො, අනයවිනාසොති වුත්තං හොති. ඉමාය ඛො පන ‘‘ධම්මවිනයසඞ්ගීතියා’’ති වත්තබ්බෙ විසෙසෙන විනයස්ස සාසනමූලභාවදස්සනත්ථං, තස්මිං ඨිතෙ සකලසාසනඨිතිසිද්ධිදීපනත්ථඤ්ච ‘‘ඉදං වො කප්පති, ඉදං වො න කප්පතී’’ති වත්ථුස්මිං ආරද්ධත්තා, ඉමිස්සා ච පරියත්තියා විනයපිටකත්තා ‘‘විනයසඞ්ගීතියා’’ති ඉධ වුත්තං.

පඤ්චසතිකක්ඛන්ධකවණ්ණනා නිට්ඨිතා.