4. පවාරණාක්ඛන්ධකවණ්ණනා

අඵාසුකවිහාරකථාවණ්ණනා

210. ‘‘සඞ්ඝං ආවුසො පවාරෙමී’’ති වුත්තත්තා පච්ඡාපි ‘‘වදතු මං සඞ්ඝො’’ති වත්තබ්බං විය දිස්සති. අයං පනෙත්ථ අධිප්පායො – යස්මා අහං සඞ්ඝං පවාරෙමි, තස්මා තත්ථ පරියාපන්නා ථෙරා, මජ්ඣිමා, නවා වා අවිසෙසෙනායස්මන්තො සබ්බෙපි මං වදන්තූති.

පවාරණාභෙදවණ්ණනා

212. ද්වෙමා, භික්ඛවෙ, පවාරණාති එත්ථ තාදිසෙ කිච්චෙ සති යත්ථ කත්ථචි පවාරෙතුං වට්ටති. තෙනෙව මහාවිහාරෙ භික්ඛූ චාතුද්දසියං පවාරෙත්වා පන්නරසියං කායසාමග්ගිං ඉදානිපි දෙන්ති. චෙතියගිරි මහාදස්සනත්ථම්පි අට්ඨමියං ගච්ඡන්ති, තම්පි චාතුද්දසියං පවාරෙතුකාමානංයෙව හොති. ‘‘සත්තාහං අනාගතාය පවාරණාය සකරණීයො පක්කමති, අනාපත්තීති වචනතො ඉදං ආචිණ්ණ’’න්ති ලිඛිතං. ‘‘නො චෙ අධිට්ඨහෙය්‍ය, ආපත්ති දුක්කටස්සා’’ති එකස්ස වුත්තදුක්කටං, තස්සෙව වුත්තං පුබ්බකිච්චඤ්ච සඞ්ඝගණානම්පි නෙතබ්බං.

පවාරණාදානානුජානනකථාවණ්ණනා

213. තෙන ච භික්ඛුනාති පවාරණාදායකෙන.

අනාපත්තිපන්නරසකාදිකථාවණ්ණනා

‘‘තස්සා ච පවාරණාය ආරොචිතාය සඞ්ඝෙන ච පවාරිතෙ සබ්බෙසං සුප්පවාරිතං හොතීති වචනතො කෙවලං පවාරණාය පවාරණාදායකොපි පවාරිතොව හොතී’’ති වදන්තීති.

222. අවුට්ඨිතාය පරිසායාති පවාරෙත්වා පච්ඡා අඤ්ඤමඤ්ඤං කථෙන්තියා. එකච්චාය වුට්ඨිතායාති එකච්චෙසු යථානිසින්නෙසු එකච්චෙසු සකසකට්ඨානං ගතෙසු. පුන පවාරෙතබ්බන්ති පුනපි සබ්බෙහි සමාගන්ත්වා පවාරෙතබ්බං. ආගච්ඡන්ති සමසමා, තෙසං සන්තිකෙ පවාරෙතබ්බන්ති ‘‘ගතෙ අනානෙත්වා නිසින්නානංයෙව සන්තිකෙ පවාරෙතබ්බං, උපොසථක්ඛන්ධකෙපි එසෙව නයො’’ති ලිඛිතං. සබ්බාය වුට්ඨිතාය පරිසාය ආගච්ඡන්ති සමසමා, තෙසං සන්තිකෙ පවාරෙතබ්බන්ති ‘‘යදි සබ්බෙ වුට්ඨහිත්වා ගතා, සන්නිපාතෙතුඤ්ච න සක්කා, එකච්චෙ සන්නිපාතාපෙත්වා පවාරෙතුං වට්ටතී’’ති වදන්ති. කස්මා? ඤත්තිං ඨපෙත්වා කත්තබ්බසඞ්ඝකම්මාභාවා වග්ගං න හොති කිර. එත්ථ පන එකච්චෙසු ගතෙසුපි සබ්බෙසු ගතෙසුපි සබ්බෙ සන්නිපාතාපෙත්වා ඤත්තිං අට්ඨපෙත්වා කෙවලං පවාරෙතබ්බං. එකච්චෙ සන්නිපාතාපෙත්වා පවාරෙතුං න වට්ටති ‘‘සඞ්ඝං, භන්තෙ, පවාරෙමී’’ති වචනතො. සබ්බෙපි හි සන්නිපතිතා පච්ඡා දිට්ඨං වා සුතං වා පරිසඞ්කිතං වා වත්තාරො හොන්ති. අනාගතානං අත්ථිභාවං ඤත්වාපි එකච්චානං සන්තිකෙ පවාරණාවචනං විය හොති. සම්මුඛීභූතෙ චත්තාරො සන්නිපාතාපෙත්වා නිස්සග්ගියං ආපන්නචීවරාදිනිස්සජ්ජනං විය පවාරණා න හොති සබ්බායත්තත්තා. ‘‘සමග්ගානං පවාරණා පඤ්ඤත්තා’’ති වචනඤ්චෙත්ථ සාධකං. ‘‘ඉතො අඤ්ඤථා න වට්ටති අට්ඨකථායං අනනුඤ්ඤාතත්තා’’ති උපතිස්සත්ථෙරො වදති. ‘‘ථොකතරෙහි තෙසං සන්තිකෙ පවාරෙතබ්බං ඤත්තිං අට්ඨපෙත්වාවා’’ති වුත්තං. ආගන්තුකා නාම නවමිතො පට්ඨායාගතා වා වජසත්ථනාවාසු වුත්ථවස්සා වා හොන්ති.

237. ‘‘දසවත්ථුකා මිච්ඡාදිට්ඨි හොති තථාගතොතිආදී’’ති ලිඛිතං. ‘‘නත්ථි දින්නන්තිආදී’’ති වුත්තං.

239. ‘‘උපපරික්ඛිත්වා ජානිස්සාමාති තෙන සහ පවාරෙතබ්බ’’න්ති ලිඛිතං.

පවාරණාක්ඛන්ධකවණ්ණනා නිට්ඨිතා.