8. අරිට්ඨසික්ඛාපදවණ්ණනා

417. ගහට්ඨස්සාපි භික්ඛුනීදූසකකම්මං මොක්ඛන්තරායිකමෙව, තස්මා තස්ස පබ්බජ්ජාපි පටික්ඛිත්තා. විපාකන්තරායිකා අහෙතුකත්තා. පුබ්බෙ සඤ්චිච්ච ආපන්නා සම්මුට්ඨා සුද්ධසඤ්ඤිනො අන්තරායිකා එව. සෙසාති ජාතිකා. රසෙනාති භාවෙන. අධිකුට්ටනට්ඨෙනාති අධිකරණං කත්වා කුට්ටනට්ඨෙන ඡින්දනට්ඨෙන. අසිසූනූපමා කුසලධම්මච්ඡෙදනට්ඨෙන. සත්තිසූලූපමා චිත්තවිතුදනට්ඨෙනාති පොරාණා. අනාපත්තිපාළියං ‘‘ආදිකම්මිකස්සා’’ති මුඛාරුළ්හවසෙන ලිඛිතං.

අරිට්ඨසික්ඛාපදවණ්ණනා නිට්ඨිතා.