5. අචෙලකවග්ගො

1. අචෙලකසික්ඛාපදවණ්ණනා

269. විඝාසාදානං අන්තරා පූවලාභෙන අඤ්ඤතරා පරිබ්බාජිකා පවිසිත්වා ඨිතා. දාපෙතීති අනුපසම්පන්නෙන.

අචෙලකසික්ඛාපදවණ්ණනා නිට්ඨිතා.

2. උය්‍යොජනසික්ඛාපදවණ්ණනා

276. විජහන්තස්සාති අනාදරත්ථෙ සාමිවචනං. උය්‍යොජකස්ස විජහන්තස්ස සතො ආපත්ති දුක්කටස්සාතිපි අත්ථො. ඉධ අනුපසම්පන්නො නාම සාමණෙරොවාධිප්පෙතො.

උය්‍යොජනසික්ඛාපදවණ්ණනා නිට්ඨිතා.

3. සභොජනසික්ඛාපදවණ්ණනා

280. සභොජනෙති එත්ථ පඨමවිකප්පො ‘‘ඉත්ථී ච පුරිසො චා’’ති ඉමිනා තතියපදෙන යුජ්ජති, දුතියවිකප්පො පඨමෙහි ද්වීහි. කුලෙති ඝරෙ. අනුපවිසිත්වා නිසීදනචිත්තෙන සචිත්තකං.

සභොජනසික්ඛාපදවණ්ණනා නිට්ඨිතා.

4. රහොපටිච්ඡන්නසික්ඛාපදවණ්ණනා

284. ඉධ පඤ්චමං උපනන්දස්ස චතුත්ථං හොති, තස්මා භික්ඛුනිවග්ගස්ස දසමට්ඨකථායං උපරි උපනන්දස්ස ‘‘තතියසික්ඛාපදෙනා’’ති න පාඨො, ‘‘චතුත්ථෙනා’’ති පාඨොති වෙදිතබ්බො.

රහොපටිච්ඡන්නසික්ඛාපදවණ්ණනා නිට්ඨිතා.

5. රහොනිසජ්ජසික්ඛාපදවණ්ණනා

289. රහොනිසජ්ජසික්ඛාපදං උත්තානත්ථමෙව.

6. චාරිත්තසික්ඛාපදවණ්ණනා

294. සභත්තොති නිමන්තනභත්තොති පොරාණා.

පුරෙභත්තඤ්ච පිණ්ඩාය, චරිත්වා යදි භුඤ්ජති;

සියා පරම්පරාපත්ති, පච්ඡාභත්තං න සා සියා.

පච්ඡාභත්තඤ්ච ගමිකො, පුබ්බගෙහං යදි ගච්ඡෙ;

එකෙ ආපත්තියෙවාති, අනාපත්තීති එකච්චෙ.

කුලන්තරස්සොක්කමනෙ, ආපත්තිමතයො හි තෙ;

සමානභත්තපච්චාසා, ඉති ආහු ඉධාපරෙ.

මතා ගණිකභත්තෙන, සමෙන්ති නං නිමන්තනෙ;

විස්සජ්ජනං සමානන්ති, එකෙ සම්මුඛතාපරෙ.

සන්නිට්ඨානත්ථිකෙහෙව, විචාරෙතබ්බභෙදතො;

විඤ්ඤූ චාරිත්තමිච්චෙව, සික්ඛාපදමිදං විදූති.

චාරිත්තසික්ඛාපදවණ්ණනා නිට්ඨිතා.

7. මහානාමසික්ඛාපදවණ්ණනා

310. කාලන්ති සො. යස්මා සඞ්ඝපවාරණායමෙවායං විධි, තස්මා ‘‘ඤාතකානං පවාරිතාන’’න්ති වුත්තං. ‘‘ඉමිනා හි තයා පවාරිතම්හ, අම්හාකඤ්ච ඉමිනා ච ඉමිනා ච අත්ථො’’ති යථාභූතං ආචික්ඛිත්වා විඤ්ඤාපෙතුං ගිලානොව ලභති. යං පන වුත්තං පණීතභොජනසික්ඛාපදෙ ‘‘මහානාමසික්ඛාපදෙන කාරෙතබ්බො’’ති, තං සඞ්ඝවසෙන පවාරිතං, භෙසජ්ජත්ථාය සප්පිආදිභෙසජ්ජපඤ්චකං විඤ්ඤාපෙති චෙ, ‘‘න භෙසජ්ජෙන කරණීයෙන භෙසජ්ජං විඤ්ඤාපෙතී’ති වචනෙන පාචිත්තියන්ති අත්ථො’’ති (පාචි. 309) ලිඛිතං.

මහානාමසික්ඛාපදවණ්ණනා නිට්ඨිතා.

8. උය්‍යුත්තසෙනාසික්ඛාපදවණ්ණනා

311-5. මං දිට්ඨෙනාති මයා දිට්ඨෙන, මම දස්සනෙන වා. එකම්පි සරහත්ථං පුරිසන්ති අඞ්ගපරියාපන්නං.

උය්‍යුත්තසෙනාසික්ඛාපදවණ්ණනා නිට්ඨිතා.

9. සෙනාවාසසික්ඛාපදවණ්ණනා

319. නවමෙ සෙනාපරික්ඛෙපෙන වා පරික්ඛෙපාරහට්ඨානෙන වා සඤ්චරණට්ඨානපරියන්තෙන වා පරිච්ඡින්දිතබ්බා.

සෙනාවාසසික්ඛාපදවණ්ණනා නිට්ඨිතා.

10. උය්‍යොධිකසික්ඛාපදවණ්ණනා

324. දසමෙ එකමෙකං දස්සනාය ගච්ඡති, ආපත්ති දුක්කටස්ස. යත්ථ ඨිතො පස්සති, ආපත්ති පාචිත්තියස්සාතිආදි. අට්ඨමෙ පන එකමෙකං දස්සනාය ගච්ඡති, ආපත්ති දුක්කටස්ස. යත්ථ ඨිතො පස්සති, ආපත්ති දුක්කටස්සාති පාළි. කස්මා? අඞ්ගප්පමාණාභෙදෙපි අනීකවිසෙසතො. දසමෙ පන අට්ඨමඞ්ගස්ස දස්සනෙන දුක්කටං සියාති.

උය්‍යොධිකසික්ඛාපදවණ්ණනා නිට්ඨිතා.

සමත්තො වණ්ණනාක්කමෙන අචෙලකවග්ගො පඤ්චමො.