1. කොසියසික්ඛාපදවණ්ණනා

542. කොසියකාරකොති එත්ථ කොසං කරොන්තීති ‘‘කොසකාරා’’ති ලද්ධවොහාරානං පාණකානං කොසතො නිබ්බත්තං කොසියං නාම. අත්තනා කතං චෙ? නිස්සජ්ජනකාලෙ ‘‘සයං කතං නිස්සග්ගිය’’න්ති වත්තබ්බං. උභොහි චෙ කතං, යථාපාඨමෙව වත්තබ්බං. අත්තනා ච පරෙහි ච විප්පකතං අත්තනා පරියොසාපෙතීතිආදිචතුක්කම්පි සම්භවන්තං න දස්සිතං. විනයධම්මතා හෙසා, යදිදං එකස්මිං තිකෙ වා චතුක්කෙ වා දස්සිතෙ ඉතරං සම්භවන්තම්පි න වුච්චතීති.

කොසියසික්ඛාපදවණ්ණනා නිට්ඨිතා.