5. ධම්මිකාධම්මිකපාතිමොක්ඛට්ඨපනකථා

387. තෙන පුග්ගලෙනාති තෙන චුදිතකෙන පුග්ගලෙන. සා විපත්තීති සීලවිපත්තිආදිසඞ්ඛාතා සා විපත්ති. සඤ්ඤාඅමූලිකවසෙනාති ‘‘කතා’’ ඉති සඤ්ඤාය අමූලිකවසෙන. කතඤ්චාති එකන්තෙන කතඤ්ච. අකතඤ්චාති එකන්තෙන අකතඤ්ච.

කොපෙතුකාමතාය නෙව ආගච්ඡතීති සම්බන්ධො. තෙනාති අනාගමනාදිකාරණෙන. ආපජ්ජතීති පාතිමොක්ඛට්ඨපනකො ආපජ්ජති. ඉච්චස්සාපීති ඉති එවං අස්ස පාතිමොක්ඛට්ඨපනකස්සාපි. පච්චාදියතීති පති ආදියති, ‘‘අකතං කම්මං, පුන කාතබ්බං කම්ම’’න්තිආදිනා පුන ආදීයති, පුන ආරභතීති අත්ථො.