203. සෙට්ඨිභරියාදිවත්ථුකථා

330. යා නාමාති යා නාම ඝරණී. කිම්පි මායන්ති එත්ථ එකාරලොපසන්ධීති ආහ ‘‘කිම්පි මෙ අය’’න්ති. ඉමිනා යකාරාදෙසසන්ධිං නිවත්තෙති, ‘‘ම්‍යාය’’න්තිපි පාඨො, එවං සති ආදෙසසන්ධියෙව, න ලොපසන්ධි. අයං ඝරණී මෙ කිඤ්චි දෙය්‍යධම්මං කිම්පි දස්සතීති යොජනා. තස්ස චාති සබ්බිස්ස ච, කතස්සාතිපි පාඨො. රොගූපසමස්ස චාති මම රොගස්ස උපසමස්ස ච, ඉමෙහි පදෙහි සංයමස්සාති පදස්ස අත්ථං දස්සෙති. ‘‘උපකාර’’න්ති ඉමිනා උපජානාමීති එත්ථ උපසද්දස්ස අත්ථං දස්සෙති. අධිප්පායොති ඝරණියා ආසයො.

331. ‘‘සබ්බාලඞ්කාරං තුය්හං හොතූ’’ති ඉදං වචනං රාජා සභාවතො ආහ, උදාහු කිඤ්චි චින්තෙත්වාති ආහ ‘‘රාජා’’තිආදි. තත්ථ ඉමන්ති අලඞ්කාරං. පමාණයුත්තෙති කාරණානුරූපෙ. නන්ති ජීවකං. නාටකානම්පීති පඤ්චසතිකානං නාටකානම්පි. සොපීති ජීවකොපි. තෙසන්ති අභයකුමාරනාටකානං. මෙති මය්හං, න පතිරූපන්ති සම්බන්ධො. අය්‍යිකානන්ති මාතාමහීනං. කතස්ස මෙ උපකාරන්ති යොජනා. ඉමිනා අධිකාරො ච උපකාරො ච අත්ථතො සදිසන්ති දස්සෙති. රාජා පසන්නො දත්වා ආහාති සම්බන්ධො.