105. වජ්ජනීයපුග්ගලසන්දස්සනකථා

183. හත්ථපාසූපගමනමෙවාති උපොසථසඞ්ඝාදීනං හත්ථපාසස්ස උපගමනමෙව. ඉදං පාරිවාසියපාරිසුද්ධිදානං නාම න වට්ටතීති යොජනා. තස්සාති පාරිවාසියපාරිසුද්ධිදානස්ස. අනුපොසථෙති එත්ථ අකාරස්ස අඤ්ඤත්ථං දස්සෙන්තො ආහ ‘‘අඤ්ඤස්මිං දිවසෙ’’ති. තත්ථ අඤ්ඤස්මින්ති ද්වීහි උපොසථෙහි අඤ්ඤස්මිං. යා සඞ්ඝසාමග්ගී කරියති, තථාරූපින්ති යොජනා. කොසම්බකභික්ඛූනන්ති කොසම්බියං නිවාසීනං භික්ඛූනං. සාමග්ගී විය යා සාමග්ගීති යොජනා. ‘‘ඨපෙත්වා’’ති ඉමිනා අඤ්ඤත්‍රාති නිපාතස්ස අත්ථං දස්සෙති. යෙ පනාති භික්ඛූ පන සමග්ගා හොන්තීති සම්බන්ධො. උපොසථෙයෙවාති උපොසථදිවසෙයෙව.

ඉති උපොසථක්ඛන්ධකවණ්ණනාය යොජනා සමත්තා.