48. තිත්ථියපක්කන්තකකථා

110. පක්කමතීති පක්කන්තො, ‘‘පවිට්ඨො’’ති ඉමිනා කමුධාතුයා පදවික්ඛෙපත්ථං දස්සෙති, ඉච්ඡාකන්තිඅත්ථෙ නිවත්තෙති. සොති තිත්ථියපක්කන්තකො. තත්‍රාති තිත්ථියපක්කන්තකෙ. උපසම්පන්නො භික්ඛු ගච්ඡතීති සම්බන්ධො. තෙසන්ති තිත්ථියානං. ‘‘තිත්ථියො භවිස්සාමී’’ති පුබ්බෙව ලද්ධිගහිතත්තා වුත්තං ‘‘ලිඞ්ගෙ ආදින්නමත්තෙ’’ති. කුසචීරාදීනීති එත්ථ කුසො වුච්චති සලාකා. චීරොති පන්ති, ආවලීති අත්ථො. කුසෙ රජ්ජුනා ආවුනිත්වා කතො චීරො කුසචීරො, සො ආදි යෙසං තානීති කුසචීරාදීනි. ආදිසද්දෙන ඵලකචීරාදයො සඞ්ගණ්හාති. කුසතිණෙහි කතො චීරො කුසචීරොතිපි වදන්ති. නග්ගොති අචෙලකො. ආජීවකොති අචෙලකවතමාදාය ජීවතීති ආජීවකො. තෙසන්ති ආජීවකානං. ඔවදිතො හුත්වාති සම්බන්ධො.

කින්ති කිං වතං. ලුඤ්චාපෙතීති අපනයාපෙති. මොරපිඤ්ඡාදීනීති එත්ථ පිඤ්ඡං වුච්චති පක්ඛො. සො හි පිඤ්ඡති ආකාසෙ ගච්ඡති අනෙනාති පිඤ්ඡන්ති වුච්චති. පිඡි ගතියන්ති ධාතුපාඨො. මොරස්ස පිඤ්ඡං මොරපිඤ්ඡං, තං ආදි යෙසං තානීති මොරපිඤ්ඡාදීනි. ආදිසද්දෙන උලූකපිඤ්ඡාදයො සඞ්ගණ්හාති. යාව න සම්පටිච්ඡතීති යාව ලද්ධිං න සම්පටිච්ඡති. නන්ති වීමංසමානං භික්ඛුං. ලද්ධීති තිත්ථියලද්ධි. රක්ඛතීති තිත්ථියපක්කන්තකතො රක්ඛති. ලද්ධියා අභාවෙන තිත්ථියපක්කන්තකො න හොතීති අධිප්පායො. අච්ඡිද්දචීවරොති එත්ථ ආකාරො කොධත්ථො, අඩ්ඩත්ථො වා හොති, ඡිද්දසද්දො දූසනත්ථො හොති. තස්මා ආකොධෙන අඩ්ඩෙන වා ඡිද්දො දූසිතොති අච්ඡිද්දොති අත්ථො දට්ඨබ්බො. ‘‘අච්ඡින්නො’’තිපි පාඨො. අච්ඡිද්දං චීවරමෙතස්සාති අච්ඡිද්දචීවරො. තිත්ථායතනන්ති තිත්ථීනං නිවාසට්ඨානං, තිත්ථියානං උපස්සයන්ති අත්ථො.