10. දසමසික්ඛාපදං

973. දසමෙ අහුන්දරිකාති තස්මිං කාලෙ, දෙසෙ වා සම්බාධස්ස නාමමෙතන්ති ආහ ‘‘අහුන්දරිකාති සම්බාධා’’ති.

975. යථා ‘‘උත්තරිඡප්පඤ්චවාචාහී’’ති (පාචි. 62-65) එත්ථ පඤ්චසද්දො න කොචි අත්ථො, වාචාසිලිට්ඨත්ථං ලොකවොහාරවසෙන වුත්තො, න එවමිධ, ඉධ පන අත්ථො අත්ථි, පඤ්ච යොජනානි ගච්ඡන්තියාපි අනාපත්තියෙවාති ආහ ‘‘පවාරෙත්වා…පෙ… අනාපත්තී’’ති. පච්චාගච්ඡතීති පටිනිවත්තෙත්වා ආගච්ඡතීති. දසමං.

තුවට්ටවග්ගො චතුත්ථො.