5. චිත්තාගාරවග්ගො

1. පඨමසික්ඛාපද-අත්ථයොජනා

978. චිත්තාගාරවග්ගස්ස පඨමෙ රඤ්ඤො කීළනට්ඨානං අගාරං රාජාගාරන්ති වචනත්ථං දස්සෙන්තො ආහ ‘‘රඤ්ඤො කීළනඝර’’න්ති. චිත්තං අගාරං චිත්තාගාරං. ආරාමන්ති නගරතො නාතිදූරආරාමොති ආහ ‘‘උපවන’’න්ති. උය්‍යානන්ති සම්පන්නපුප්ඵඵලතාය උද්ධං උල්ලොකෙත්වා මනුස්සා යන්ති ගච්ඡන්ති එත්ථාති උය්‍යානං. පොක්ඛරණින්ති පොක්ඛරං පදුමං නෙතීති පොක්ඛරණී. පඤ්චපීති රාජාගාරාදීනි පඤ්චපි. සබ්බත්ථාති දස්සනත්ථාය ගමනෙ ච ගන්ත්වා පස්සනෙ චාති සබ්බෙසු.

981. ‘‘අජ්ඣාරාමෙ’’තිආදිනා ආරාමෙ ඨිතාය ආරාමතො බහි කතෙ රාජාගාරාදිකෙ පස්සන්තියාපි අනාපත්තීති දස්සෙති. තානීති රාජාගාරාදීනීති. පඨමං.

2. දුතියසික්ඛාපදං

982. දුතියෙ අනුත්තානට්ඨානං නත්ථීති. දුතියං.

3. තතියසික්ඛාපදං

988. තතියෙ යත්තකන්ති යත්තකං සුත්තන්ති සම්බන්ධො. අඤ්ඡිතන්ති කඩ්ඪිතං. තස්මින්ති තත්තකෙ සුත්තෙති සම්බන්ධො. තක්කම්හීති එත්ථ තක්කොති එකො අයොමයො සුත්තකන්තනස්ස උපකරණවිසෙසො. සො හි තකීයති සුත්තං බන්ධීයති එත්ථ, එතෙනාති වා තක්කොති වුච්චති, තස්මිං. කන්තනතොති කන්තීයතෙ කප්පාසාදිභාවස්ස ඡින්දීයතෙ කන්තනං, තතො.

989. දසිකසුත්තාදින්ති එත්ථ දසාති වත්ථස්සාවයවො. සො හි දිය්‍යති අවඛණ්ඩීයතීති දසාති වුච්චති, තස්සං දසායං පවත්තං දසිකං, තමෙව සුත්තං දසිකසුත්තං. ආදිසද්දෙන වක්ඛමානං දුක්කන්තිතසුත්තාදිං සඞ්ගණ්හාතීති. තතියං.

4. චතුත්ථසික්ඛාපදං

992. චතුත්ථෙ ආදිං කත්වාති ධොවනාදීනි ආදිං කත්වා. ඛාදනීයාදීසූති පූවඛාදනීයාදීසු. රූපගණනායාති පූවාදීනං සණ්ඨානගණනාය.

993. යාගුපානෙත්ත යාගුසඞ්ඛාතෙ පානෙ. තෙසන්ති මනුස්සානං. වෙය්‍යාවච්චකරට්ඨානෙ ඨපෙත්වාති මාතාපිතරො අත්තනො වෙය්‍යාවච්චකරට්ඨානෙ ඨපෙත්වාති. චතුත්ථං.

5. පඤ්චමසික්ඛාපදං

996. පඤ්චමෙ විනිච්ඡිනන්තීති අධිකරණං විනිච්ඡිනන්තී භික්ඛුනීති යොජනාති. පඤ්චමං.

6. ඡට්ඨසික්ඛාපදං

999. ඡට්ඨෙ අනුත්තානවචනං නත්ථීති.

7. සත්තමසික්ඛාපදං

1007. සත්තමෙ ‘‘පුන පරියායෙ’’ති එත්ථ පරියායසද්දො වාරවෙවචනොති ආහ ‘‘පුන වාරෙ’’ති. මහග්ඝචීවරන්ති මහග්ඝං ආවසථචීවරන්ති. සත්තමං.

8. අට්ඨමසික්ඛාපදං

1008. අට්ඨමෙ අනිස්සජ්ජිත්වාති එත්ථ බ්‍රහ්මදෙය්‍යෙන න අනිස්සජ්ජනං, අථ ඛො තාවකාලිකමෙවාති දස්සෙන්තො ආහ ‘‘රක්ඛනත්ථායා’’තිආදි.

1012. පටිජග්ගිකන්ති රක්ඛණකං. වචීභෙදන්ති ‘‘පටිජග්ගාහී’’ති වචීභෙදං. රට්ඨෙති විජිතෙ. තඤ්හි රඨන්ති ගාමනිගමාදයො තිට්ඨන්ති එත්ථාති රට්ඨන්ති වුච්චතීති. අට්ඨමං.

9. නවමසික්ඛාපදං

1015. නවමෙ සිප්පසද්දො පච්චෙකං යොජෙතබ්බො ‘‘හත්ථිසිප්පඤ්ච අස්සසිප්පඤ්ච රථසිප්පඤ්ච ධනුසිප්පඤ්ච ථරුසිප්පඤ්චා’’ති. තත්ථ ථරුසිප්පන්ති අසිකීළනසිප්පං. මන්තසද්දොපි පච්චෙකං යොජෙතබ්බො ‘‘ආථබ්බණමන්තො ච ඛීලනමන්තො ච වසීකරණමන්තො ච සොසාපනමන්තො චා’’ති. තත්ථ ආථබ්බණමන්තොති ආථබ්බණවෙදෙන විහිතො පරූපඝාතකරො මන්තො. ඛීලනමන්තොති සාරදාරුඛීලං මන්තෙන ජප්පිත්වා පථවියං නිඛණිත්වා ධාරණමන්තො. වසීකරණමන්තොති මන්තෙන ජප්පිත්වා පරස්ස උම්මත්තභාවමාපන්නකරණො මන්තො. සොසාපනමන්තොති පරස්ස මංසලොහිතාදිසොසාපනමන්තො. අගදපයොගොති භුසවිසස්ස පයොජනං. ආදිසද්දෙන අඤ්ඤෙපි පරූපඝාතකරණෙ සිප්පෙ සඞ්ගණ්හාති. යක්ඛපරිත්තන්ති යක්ඛෙහි සමන්තතො තාණං. නාගමණ්ඩලන්ති සප්පානං පවෙසනනිවාරණත්ථං මණ්ඩලබන්ධමන්තො. ආදිසද්දෙන විසපටිහනනමන්තාදයො සඞ්ගණ්හාතීති. නවමං.

10. දසමසික්ඛාපදං

1018. දසමෙ අනුත්තානවචනං නත්ථීති. දසමං.

චිත්තාගාරවග්ගො පඤ්චමො.