6. ආරාමවග්ගො

1. පඨමසික්ඛාපද-අත්ථයොජනා

1025. ආරාමවග්ගස්ස පඨමෙ උපචාරන්ති අපරික්ඛිත්තස්ස ආරාමස්ස පරික්ඛෙපාරහට්ඨානං උපචාරං.

1027. ‘‘සීසානුලොකිකා’’ති සාමඤ්ඤතො වුත්තෙපි භික්ඛුනීනමෙව සීසන්ති ආහ ‘‘භික්ඛුනීන’’න්ති. යත්ථාති යස්මිං ඨානෙති. පඨමං.

2. දුතියසික්ඛාපදං

1028. දුතියෙ අබ්භන්තරොති අබ්භන්තරෙ පරියාපන්නො, ජාතො වා. ‘‘සඞ්කාමෙසී’’ති ඉමිනා සංහරීති එත්ථ හරධාතුයා සඞ්කමනත්ථං දස්සෙති. න්හාපිතාති කප්පකා. තෙ හි නහාපෙන්ති සොචාපෙන්තීති න්හාපිතාති වුච්චන්ති. තන්ති කාසාවනිවාසනන්ති. දුතියං.

3-4. තතිය-චතුත්ථසික්ඛාපදං

1036. තතියචතුත්ථෙසු අනුත්තානට්ඨානං නත්ථීති. තතියචතුත්ථානි.

5. පඤ්චමසික්ඛාපදං

1043. පඤ්චමෙ ‘‘කුලෙ මච්ඡරො’’ති එත්ථ මච්ඡරනං මච්ඡරොති වචනත්ථො කාතබ්බො. ‘‘තං කුලං අස්සද්ධං අප්පසන්න’’න්ති කුලස්ස අවණ්ණං භාසතීති යොජනා. ‘‘භික්ඛුනියො දුස්සීලා පාපධම්මා’’ති භික්ඛුනීනං අවණ්ණං භාසතීති යොජනා.

1045. ‘‘සන්තංයෙව ආදීනව’’න්ති සම්බන්ධියා සම්බන්ධං දස්සෙතුං වුත්තං ‘‘කුලස්ස වා භික්ඛුනීනං වා’’ති ඉමිනා ද්වීසු අඤ්ඤතරමෙව න සම්බන්ධො හොති, අථ ඛො ද්වයම්පීති දස්සෙතීති. පඤ්චමං.

6. ඡට්ඨසික්ඛාපදං

1048. ඡට්ඨෙ ඔවාදායාති එත්ථ න යො වා සො වා ඔවාදො හොති, අථ ඛො ගරුධම්මොයෙවාති ආහ ‘‘ගරුධම්මත්ථායා’’ති. සහ වසති එත්ථ, එතෙනාති වා සංවාසොති වචනත්ථෙන උපොසථපවාරණා සංවාසො නාමාති ආහ ‘‘උපොසථපවාරණාපුච්ඡනත්ථායා’’ති. ‘‘පුච්ඡනත්ථායා’’ති ඉමිනා ‘‘සංවාසායා’’ති එත්ථ උත්තරපදලොපභාවං දස්සෙති. එත්ථාති භික්ඛුනිවිභඞ්ගෙ, සික්ඛාපදෙ වා පාළියං වාති. ඡට්ඨං.

7-9. සත්තම-අට්ඨම-නවමසික්ඛාපදං

1053. සත්තමට්ඨමනවමෙසු අනුත්තානවචනං නත්ථි. කෙවලං පන ‘‘ඉමිස්සාපී’’ති පදං විසෙසො, ඉමිස්සාපි පාළියාති අත්ථොති. සත්තමට්ඨමනවමානි.

10. දසමසික්ඛාපදං

1062. දසමෙ ද්වෙ කායා උපරිමකායො හෙට්ඨිමකායොති. තත්ථ කටිතො උද්ධං උපරිමකායො, හෙට්ඨා හෙට්ඨිමකායො. තත්ථ ‘‘පසාඛෙ’’ති ඉදං හෙට්ඨිමකායස්ස නාමන්ති ආහ ‘‘අධොකායෙ’’ති. හීති සච්චං. තතොති අධොකායතො. ඉමිනා පඤ්චමීබාහිරත්ථසමාසං දස්සෙති. රුක්ඛස්ස සාඛා පභිජ්ජිත්වා ගතා විය උභො ඌරූ පභිජ්ජිත්වා ගතාති යොජනා.

1065. ඵාලෙහීති එත්ථ ඉතිසද්දො ආද්‍යත්ථො. තෙන ‘‘ධොවා’’තිආදීනි චත්තාරි පදානි සඞ්ගණ්හාති. ආණත්තිදුක්කටානීති හෙට්ඨා වුත්තෙසු අට්ඨසු දුක්කටෙසු විනයදුක්කටමෙව. සෙසෙසූති භින්දනතො සෙසෙසු ඵාලනාදීසූති. දසමං.

ආරාමවග්ගො ඡට්ඨො.