7. ගබ්භිනිවග්ගො

1. පඨමසික්ඛාපද-අත්ථයොජනා

1069. ගබ්භිනිවග්ගස්ස පඨමෙ කුච්ඡිං පවිට්ඨො සත්තො එතිස්සා අත්ථීති කුච්ඡිපවිට්ඨසත්තා. ‘‘කුච්ඡි’’න්තිපි පාඨො. ඉමිනා ගබ්භිනීති එත්ථ ගබ්භසද්දො කුච්ඡිට්ඨසත්තවාචකොති දස්සෙති. ගබ්භසද්දො (අභිධානප්පදීපිකායං 944 ගාථායං) හි කුච්ඡිට්ඨසත්තෙ ච කුච්ඡිම්හි ච ඔවරකෙ ච වත්තතීති. පඨමං.

2. දුතියසික්ඛාපදං

1073. දුතියෙ ථඤ්ඤං පිවතීති පායන්තො, දාරකො, සො එතිස්සා අත්ථීති පායන්තීති දස්සෙන්තො ආහ ‘‘ථඤ්ඤං පායමානි’’න්ති. දුතියං.

3. තතියසික්ඛාපදං

1077. තතියෙ නිත්ථරිස්සතීති වට්ටදුක්ඛතො නිත්ථරිස්සති.

1079. පාණාතිපාතා වෙරමණින්ති එත්ථ පාණාතිපාතා විරමති ඉමායාති වෙරමණීති අත්ථෙන සික්ඛාපදං වෙරමණි නාමාති ආහ ‘‘පාණාතිපාතා වෙරමණිසික්ඛාපද’’න්ති. යං තං සික්ඛාපදන්ති සම්බන්ධො. සබ්බත්ථාති ‘‘අදින්නාදානා වෙරමණි’’න්තිආදීසු සබ්බෙසු වාක්‍යෙසු. පබ්බජිතාය සාමණෙරියාති සම්බන්ධො. එතාසූති ඡසු සික්ඛාසූති. තතියං.

4. චතුත්ථසික්ඛාපදං

1084. චතුත්ථෙ ‘‘වුට්ඨානසම්මුතී’’ති පදං ‘‘හොතී’’ති පදෙ කත්තා, ‘‘දාතබ්බායෙවා’’ති පදෙ කම්මන්ති. චතුත්ථං.

5-9. පඤ්චමාදිසික්ඛාපදං

1095. පඤ්චමාදීසු නවමපරියොසානෙසු සික්ඛාපදෙසු අනුත්තානට්ඨානං නත්ථීති. පඤ්චමඡට්ඨසත්තමට්ඨමනවමානි.

10. දසමසික්ඛාපදං

1116. දසමෙ වූපකාසෙය්‍යාති එත්ථ කාසධාතුයා ගත්‍යත්ථං දස්සෙන්තො ආහ ‘‘ගච්ඡෙය්‍යා’’ති. දසමං.

ගබ්භිනිවග්ගො සත්තමො.