10. දසමසික්ඛාපදං

1062. දසමෙ ද්වෙ කායා උපරිමකායො හෙට්ඨිමකායොති. තත්ථ කටිතො උද්ධං උපරිමකායො, හෙට්ඨා හෙට්ඨිමකායො. තත්ථ ‘‘පසාඛෙ’’ති ඉදං හෙට්ඨිමකායස්ස නාමන්ති ආහ ‘‘අධොකායෙ’’ති. හීති සච්චං. තතොති අධොකායතො. ඉමිනා පඤ්චමීබාහිරත්ථසමාසං දස්සෙති. රුක්ඛස්ස සාඛා පභිජ්ජිත්වා ගතා විය උභො ඌරූ පභිජ්ජිත්වා ගතාති යොජනා.

1065. ඵාලෙහීති එත්ථ ඉතිසද්දො ආද්‍යත්ථො. තෙන ‘‘ධොවා’’තිආදීනි චත්තාරි පදානි සඞ්ගණ්හාති. ආණත්තිදුක්කටානීති හෙට්ඨා වුත්තෙසු අට්ඨසු දුක්කටෙසු විනයදුක්කටමෙව. සෙසෙසූති භින්දනතො සෙසෙසු ඵාලනාදීසූති. දසමං.

ආරාමවග්ගො ඡට්ඨො.