4. චතුත්ථපාරාජිකසික්ඛාපදං

675. චතුත්ථෙ මෙථුනරාගෙන අවස්සුතා නාධිප්පෙතා, කායසංසග්ගරාගෙන අවස්සුතාවාධිප්පෙතාති ආහ ‘‘කායසංසග්ගරාගෙන අවස්සුතා’’ති. ‘‘පුරිසපුග්ගලස්සා’’තිපදං න හත්ථසද්දෙන සම්බන්ධිතබ්බං, ගහණසද්දෙනෙව සම්බන්ධිතබ්බන්ති දස්සෙන්තො ආහ ‘‘යං පුරිසපුග්ගලෙනා’’තිආදි. තන්ති ගහණං, ‘‘හත්ථග්ගහණ’’න්ති වුත්තවචනං උපලක්ඛණමත්තමෙවාති ආහ ‘‘අඤ්ඤම්පී’’තිආදි. තත්ථ ‘‘අඤ්ඤම්පී’’ති හත්ථගහණතො ඉතරම්පි. අපාරාජිකක්ඛෙත්තෙති උබ්භක්ඛකෙ අධොජාණුමණ්ඩලෙ. අස්සාති ‘‘හත්ථග්ගහණ’’න්තිපදස්ස. එත්ථාති ‘‘අසද්ධම්මස්ස පටිසෙවනත්ථායා’’තිපදෙ. කායසංසග්ගොති කායසංසග්ගො එව. තෙන වුත්තං ‘‘න මෙථුනධම්මො’’ති. හීති සච්චං, යස්මා වා. එත්ථාති කායසංසග්ගගහණෙ. සාධකන්ති ඤාපකං.

තිස්සිත්ථියොති භුම්මත්ථෙ චෙතං උපයොගවචනං. තීසු ඉත්ථීසූති හි අත්ථො, තිස්සො ඉත්ථියො උපගන්ත්වාති වා යොජෙතබ්බො. එසෙව නයො පරතොපි. යං මෙථුනං අත්ථි, තං න සෙවෙති යොජනා. න සෙවෙති ච න සෙවති. තිකාරස්ස හි එකාරො. තයො පුරිසෙති තීසු පුරිසෙසු, තෙ වා උපගන්ත්වා. තයො ච අනරියපණ්ඩකෙති තීසු අනරියසඞ්ඛාතෙසු උභතොබ්‍යඤ්ජනකෙසු ච පණ්ඩකෙසු ච, තෙ වා උපගන්ත්වාති යොජනා. න චාචරෙ මෙථුනං බ්‍යඤ්ජනස්මින්ති අත්තනො නිමිත්තස්මිං මෙථුනං න ච ආචරති. ඉදං අනුලොමපාරාජිකං සන්ධාය වුත්තං. ඡෙජ්ජං සියා මෙථුනධම්මපච්චයාති මෙථුනධම්මකාරණා ඡෙජ්ජං සියා, පාරාජිකං භවෙය්‍යාති අත්ථො. කුසලෙහීති පඤ්හාවිසජ්ජනෙ ඡෙකෙහි, ඡෙකකාමෙහි වා. අයං පඤ්හො අට්ඨවත්ථුකං සන්ධාය වුත්තො.

පඤ්හාවිසජ්ජනත්ථාය චින්තෙන්තානං සෙදමොචනකාරණත්තා ‘‘සෙදමොචනගාථා’’ති වුත්තා. විරුජ්ඣතීති ‘‘න මෙථුනධම්මො’’ති වචනෙන ‘‘ඡෙජ්ජං සියා මෙථුනධම්මපච්චයා’’ති වචනං විරුජ්ඣති, න සමෙතීති අත්ථො. ඉති චෙ වදෙය්‍ය, න විරුජ්ඣති. කස්මා? මෙථුනධම්මස්ස පුබ්බභාගත්තාති යොජනා. ඉමිනා මෙථුනධම්මස්ස පුබ්බභාගභූතො කායසංසග්ගොව උපචාරෙන තත්ථ මෙථුනධම්මසද්දෙන වුත්තො, න ද්වයංද්වයසමාපත්තීති දීපෙති. හිසද්දො විත්ථාරජොතකො. පරිවාරෙයෙව වුත්තානීති සම්බන්ධො. වණ්ණාවණ්ණොති සුක්කවිසට්ඨි. ධනමනුප්පාදානන්ති සඤ්චරිත්තං. ‘‘ඉමිනා පරියායෙනා’’ති ඉමිනා ලෙසෙන සමීපූපචාරෙනාති අත්ථො. එතෙනුපායෙනාති ‘‘හත්ථග්ගහණං සාදියෙය්‍යා’’තිපදෙ වුත්තඋපායෙන. සබ්බපදෙසූති සබ්බෙසු ‘‘සඞ්ඝාටිකණ්ණග්ගහණං සාදියෙය්‍යා’’තිආදීසු පදෙසු. අපි චාති එකංසෙන, විසෙසං වක්ඛාමීති අධිප්පායො. ‘‘එවංනාමකං ඨාන’’න්ති ඉමිනා ‘‘ඉත්ථංනාමං ඉමස්ස ඨානස්සා’’ති වචනත්ථං දීපෙති.

676. එකන්තරිකාය වාති එත්ථ වාසද්දෙන ද්වන්තරිකාදීනිපි සඞ්ගය්හන්ති. යෙන තෙනාති යෙන වා තෙන වා. ද්විතිචතුප්පඤ්චඡවත්ථූනි පෙය්‍යාලවසෙන වා වාසද්දෙන වා ගහෙතබ්බානි. අපි චාති කිඤ්ච භිය්‍යො, වත්තබ්බවිසෙසං වක්ඛාමීති අධිප්පායො. එත්ථාති ‘‘ආපත්තියො දෙසෙත්වා’’ති වචනෙ. හීති සච්චං. වුත්තන්ති පරිවාරෙ වුත්තං. තත්‍රාති පුරිමවචනාපෙක්ඛං. දෙසිතා ආපත්ති ගණනූපිකාති යොජනා. එකං වත්ථුං ආපන්නා යා භික්ඛුනීති යොජනා. ධුරනික්ඛෙපං කත්වාති ‘‘ඉමඤ්ච වත්ථුං, අඤ්ඤම්පි ච වත්ථුං නාපජ්ජිස්සාමී’’ති ධුරනික්ඛෙපං කත්වා. යා පන සඋස්සාහාව දෙසෙතීති යොජනාති. චතුත්ථං.

සාධාරණාති භික්ඛුනීහි සාධාරණා. එත්ථාති ‘‘උද්දිට්ඨා ඛො අය්‍යායො’’තිආදිවචනෙ.

ඉති සමන්තපාසාදිකාය විනයසංවණ්ණනාය

භික්ඛුනිවිභඞ්ගෙ පාරාජිකකණ්ඩවණ්ණනාය යොජනා සමත්තා.