2. සප්පාණකසික්ඛාපදං

387. දුතියෙ සහ පාණෙහීති සප්පාණකං උදකන්ති දස්සෙන්තො ආහ ‘‘යෙ පාණකා’’තිආදි. හීති සච්චං. පත්තපූරම්පි උදකන්ති සම්බන්ධො. තාදිසෙනාති සප්පාණකෙන. ධොවතොපි පාචිත්තියන්ති යොජනා. උදකසොණ්ඩින්ති සිලාමයං උදකසොණ්ඩිං. පොක්ඛරණින්ති සිලාමයං පොක්ඛරණිං. උට්ඨාපයතොපි පාචිත්තියන්ති සම්බන්ධො. තතොති සොණ්ඩිපොක්ඛරණීහි. උදකස්සාති උදකෙන, පූරෙ ඝටෙ ආසිඤ්චිත්වාති සම්බන්ධො. තත්ථාති උදකෙ. උදකෙති උදකසණ්ඨානකපදෙසෙ ආසිඤ්චිතඋදකෙ. පතිස්සතීති සොණ්ඩිපොක්ඛරණීහි ගහිතඋදකං පතිස්සතීති. දුතියං.