4. ආමිසසික්ඛාපදං

164. චතුත්ථෙ බහුං මානං කතං යෙහීති බහුකතා. බහුකතා හුත්වා න ඔවදන්තීති අත්ථං දස්සෙන්තො ආහ ‘‘න බහුකතා’’තිආදි. ධම්මෙති සීලාදිධම්මෙ. අධිප්පායොති ‘‘න බහුකතා’’තිපදස්ස, ඡබ්බග්ගියානං වා අධිප්පායොති යොජනා. ‘‘කත්තුකාමොති ආදීන’’න්තිපදං ‘‘අත්ථො’’තිපදෙ වාචකසම්බන්ධො.

අසම්මතො නාම ඨපිතො වෙදිතබ්බොති යොජනා. සම්මුතින්ති භික්ඛුනොවාදකසම්මුතිං. පච්ඡා සාමණෙරභූමියං ඨිතොති යොජනාති. චතුත්ථං.