2. උජ්ජග්ඝිකවග්ග-අත්ථයොජනා

586. උච්චාසද්දං කත්වා ජග්ඝනං හසනං උජ්ජග්ඝො, සොයෙව උජ්ජග්ඝිකා, තාය. ඉති ඉමමත්ථං දස්සෙන්තො ආහ ‘‘මහාහසිතං හසන්තො’’ති. එත්ථාති ‘‘උජ්ජග්ඝිකායා’’තිපදෙ.

588. කිත්තාවතාති කිත්තකෙන පමාණෙන, එවං නිසින්නෙසු ථෙරෙසූති සම්බන්ධො, නිද්ධාරණෙ චෙතං භුම්මවචනං. වවත්ථපෙතීති ඉදඤ්චීදඤ්ච කථෙතීති වවත්ථපෙති. එත්තාවතාති එත්තකෙන පමාණෙන.

590. නිච්චලං කත්වා කායස්ස උජුට්ඨපනං කායපග්ගහො නාමාති ආහ ‘‘නිච්චලං කත්වා’’තිආදි. එසෙව නයො බාහුපග්ගහසීසපග්ගහෙසුපීති. දුතියො වග්ගො.