3. තතියපාටිදෙසනීයසික්ඛාපදං

562. තතියෙ ‘‘උභතො’’ති එත්ථ කරණත්ථෙ තොති ආහ ‘‘ද්වීහී’’ති. ‘‘උභතොපසන්න’’න්ති බ්‍යාසොපි සමාසොපි යුත්තොයෙව, සමාසෙ තොපච්චයස්ස අලොපො හොති. ‘‘උභතො’’තිපදස්ස සරූපං දස්සෙතුං වුත්තං ‘‘උපාසකෙනපි උපාසිකායපී’’ති. කස්මා උභතො පසන්නං හොතීති ආහ ‘‘තස්මිං කිරා’’තිආදි. යස්මා තස්මිං කුලෙ…පෙ… සොතාපන්නායෙව හොන්ති කිර, තස්මා ‘‘උභතොපසන්න’’න්ති වුත්තං හොති. ‘‘සචෙපී’’ති එත්ථ පිසද්දෙන අසීතිකොටිධනතො අධිකම්පි සම්පිණ්ඩෙති. හායනස්ස කාරණං දස්සෙති ‘‘යස්මා’’තිආදිනා.

569. ‘‘ඝරතො නීහරිත්වා’’ති එත්ථ ‘‘නීහරිත්වා’’ති පදස්ස කම්මං දස්සෙතුං වුත්තං ‘‘ආසනසාලං වා විහාරං වා’’ති. ‘‘ආනෙත්වා’’තිඉමිනා නීපුබ්බහරධාතුයා අත්ථං දස්සෙති. ද්වාරෙති අත්තනො ගෙහද්වාරෙති. තතියං.