10. වෙවචනහාරවණ්ණනා

‘‘සබ්බධම්මා සකලධම්මා අනවසෙසධම්මා’’ති පරියායවචනං, ‘‘මූලපරියායං මූලකාරණං අසාධාරණහෙතු’’න්ති පරියායවචනං, ‘‘මූලපරියායන්ති වා මූලදෙසනං කාරණතථන’’න්ති පරියායවචනං, ‘‘වො තුම්හාකං තුම්හ’’න්ති පරියායවචනං, ‘‘භික්ඛවෙ, සමණා තපස්සිනො’’ති පරියායවචනං, ‘‘දෙසෙස්සාමී කථෙස්සාමී පඤ්ඤපෙස්සාමී’’ති පරියායවචනං, ‘‘සුණාථ සොතං ඔදහථ සොතද්වාරානුසාරෙන උපධාරෙථා’’ති පරියායවචනං, ‘‘සාධුකං සම්මා සක්කච්ච’’න්ති පරියායවචනං, ‘‘මනසි කරොථ චිත්තෙ ඨපෙථ සමන්නාහරථා’’ති පරියායවචනං, ‘‘භාසිස්සාමි බ්‍යත්තං කථෙස්සාමි විභජිස්සාමී’’ති පරියායවචනං, ‘‘එවං, භන්තෙ, සාධු සුට්ඨු භන්තෙ’’ති පරියායවචනං, ‘‘පච්චස්සොසුං සම්පටිච්ඡිංසු සම්පටිග්ගහෙසු’’න්ති පරියායවචනං. ඉමිනා නයෙන සබ්බපදෙසු වෙවචනං වත්තබ්බන්ති. අයං වෙවචනො හාරො.