16. වච්චපස්සාවට්ඨානිකනිද්දෙසවණ්ණනා
156. වච්චපස්සාවට්ඨානිකන්ති ඨානම්හි ඨානෙ වා භවං වච්චපස්සාවට්ඨානිකං. යථාවුඩ්ඪං වච්චං න කරෙය්‍යාති සම්බන්ධො. යෙ යෙ වුඩ්ඪා යථාවුඩ්ඪං, ආගතප්පටිපාටිං හිත්වා වුඩ්ඪප්පටිපාටියාති අත්ථො. වච්චන්ති උපලක්ඛණමත්තං, පස්සාවඤ්ච නහානඤ්ච න කරෙය්‍යාති අධිප්පායො. තදෙව සමත්ථෙති ‘‘යාතානුපුබ්බියා’’තිආදිනා. යාතානුපුබ්බියාති යාතානං ගතානං අනුපුබ්බි අනුක්කමො යාතානුපුබ්බි, තාය. වච්ච…පෙ… තිත්ථඤ්චාති එතං තයං ලබ්භතීති අත්ථො, භික්ඛුනාති විඤ්ඤායති.
157. උබ්භජිත්වා ච සහසා ච නො පවිසෙය්‍යාති සම්බන්ධො. උබ්භජිත්වාති චීවරං දූරතොව උක්ඛිපිත්වා. සහසාති සීඝං. උක්කාසිත්වා පවිසෙය්‍යාති යොජනා.
158. වච්චපස්සාවදොණීනං බහීති සම්බන්ධො. උභයන්ති වච්චම්පි පස්සාවම්පි.
159. කූපෙති වච්චාවාටෙ. කට්ඨන්ති අවලෙඛනකට්ඨං. ඵරුසෙනාති ඛරෙන අවලෙඛනකට්ඨෙන. උහතඤ්චාපීති අත්තනා වා පරෙන වා උහතඤ්චාපි වච්චමක්ඛිතඤ්චාපීති අත්ථො. ධොවයෙති සති උදකෙ, උදකෙ අසති කට්ඨෙනපි සොධෙය්‍ය.
160. න නික්ඛමෙති න නික්ඛමෙය්‍ය. චපු චපූති අනුකරණං, විච්ඡායං ද්විත්තෙ චපු චපු කත්වාති කිරියාවිසෙසනං. නාචමෙය්‍යාති න ධොවෙය්‍ය. සති පන උදකෙ ආචමිතබ්බං, අසති යෙන කෙනචි පුඤ්ඡිත්වා ගන්තබ්බං, සබ්බසාධාරණට්ඨානෙ ච ආචමනකුම්භියා උදකං න සෙසෙතබ්බං. උක්ලාපන්ති කචවරං. විසොධයෙති විහාරසොධනෙ විය වච්චපස්සාවකුටියො, පරිවෙණකොට්ඨකෙ ච සම්මජ්ජෙය්‍ය. සබ්බත්ථෙව ච පන වත්තභෙදෙ දුක්කටං.
වච්චපස්සාවට්ඨානිකනිද්දෙසවණ්ණනා නිට්ඨිතා.